ភ្នំពេញៈ កីឡាករជាក្មេងកំព្រា អេ ណារ័ត្ន មានការបាក់ទឹកចិត្តខ្លាំង ទៅនឹងការរិះគន់របស់អ្នកទស្សនាមួយចំនួន ជុំវិញការសន្លប់របស់គេ ក្រោមកណ្តាប់ដៃ ជើងខ្លាំងជំនាន់ក្រោយ ពេជ្រ សម្បត្តិ ក្នុងការប្រកួត Mas Fight ៩ នាទី នៅលើសង្វៀនថោន កាលពីថ្ងៃអាទិត្យ។
តាមរយៈការប្រកួតនោះ អេ ណារ័ត្ន អាចរក្សាជំហរវាយប្តូរជាមួយ ពេជ្រ សម្បត្តិ បានជាង ១ នាទី ហើយក៏ប្តូរមកតាំងឃុំបិទមុខ នៅពេលរូបគេ ហាក់ជាប់គាំងក្រោមការវាយសម្រុកដោយកណ្តាប់ដៃ និងបុកកែងរបស់ សម្បត្តិ ប៉ុន្តែការព្យាយាមបិទ មិនតបតនេះ ធ្វើឱ្យ សម្បត្តិ កាន់តែវាយសម្រុក ហើយការម៉ាត់ពីក្រោមឡើងលើ ចូលផ្ទៃមុខពេញទំហឹងរបស់គេ បណ្តាលឱ្យ ណារ័ត្ន ដួលទាំងជំហរ និងត្រូវបានអាជ្ញាកណ្តាលរាប់ភ្លាមៗ។
ស្ថិតក្នុងស្ថានភាពដ៏ល្អនេះ ពេជ្រ សម្បត្តិ បានស្ទុះចូល រួចប្រើកណ្តាប់ដៃស្តាំវាយចេញពីចំហៀង ចូលថ្គាមឆ្វេងពេញទំហឹង បណ្តាលឱ្យ ណារ័ត្ន ដួលក្រោកលែងរួច ហើយអាជ្ញាកណ្តាលបញ្ឈប់ការប្រកួតរបស់គេ នៅក្នុងនាទីទី៣។ ទោះ ណារ័ត្ន ពិតជាបាត់បង់ស្មារតី មិនអាចបន្តប្រកួតទៀតបាន ប៉ុន្តែអ្នកទស្សនាមួយចំនួន បានរិះគន់ អេ ណារ័ត្ន ខ្លាំងដោយអ្នកខ្លះបានចោទ ណារ័ត្ន ថា ឡើងទៅឈរឱ្យគេវ៉ៃ រួចធ្វើជាសន្លប់ ដើម្បីបានផលប្រយោជន៍អ្វីមួយ ពីការប្រកួតលើកនេះ។
យ៉ាងណាក៏ដោយ អេ ណារ័ត្ន បានហៅការរិះគន់ទាំងនោះថា ជាការគិតបែបអគតិ ដោយរូបគេបានឆ្លើយតប ជាមួយការសរសេរបង្ហោះនៅលើហ្វេសប៊ុករបស់ខ្លួនថា៖ «ជេរខ្ញុំឆ្អែតនៅ បន្ទោសខ្ញុំឆ្អែតនៅ បំបាក់ទឹកចិត្តខ្ញុំឆ្អែតនៅ គ្មានអ្នកណាចង់ចាញ់ គ្មានអ្នកណាចង់សន្លប់ គ្មានអ្នកណាចង់ឱ្យគេស្អប់ទេ បើអ្នកមួយចំនួនមិនទាន់ឆ្អែតទេ បន្ដការគិតអគតិមកលើខ្ញុំទៀតទៅ។ ខ្ញុំលែងមានកម្លាំងបន្តទៅមុខទៀតហើយ»។
គួរបញ្ជាក់ថា នេះជាលើកទី២ ហើយ ដែល អេ ណារ័ត្ន បានសន្លប់នៅក្នុងការប្រកួតម៉ាសហ្វៃ ខណៈកាលពីថ្ងៃទី ៩ ខែមករានេះ អេ ណារ័ត្ន ដែលបានវ៉ៃ លន់ សៀកឡុង ឱ្យអាជ្ញាកណ្តាលរាប់មុននោះ បែរជាត្រូវ សៀកឡុង ម៉ាត់ឱ្យសន្លប់វិញ។ យ៉ាងណាក៏ដោយ ក្រោយសន្លប់ជាលើកទី២ ក្រោមកណ្តាប់ដៃ ពេជ្រ សម្បត្តិ លើកនេះ ណារ័ត្ន បានខមមិន (ការបញ្ចេញមតិ) តបទៅអ្នកគាំទ្រថា៖ «សុំទោសបងប្អូនទាំងអស់គ្នា សម្រាប់ ១ ប្រកួតហ្នឹងហើយ ខ្ញុំក៏សុំឈប់វ៉ៃ ៩ នាទីដែរ»។
ជុំវិញនឹងបញ្ហានេះ លោក ជួប វុត្ថា អ្នកផ្គូផ្គងកីឡាករ នៅសង្វៀនថោនបានប្រាប់កាលពីថ្ងៃចន្ទថា៖ «ចំពោះ អេ ណារ័ត្ន ការប្រកួតរបស់គាត់ ២ លើកនេះ អាចនិយាយបានថា សមត្ថភាពដៃគូគាត់ គឺទាបជាងគាត់។ ជាក់ស្តែងដូច លន់ សៀកឡុង សមត្ថភាពទាបជាងគាត់ ប៉ុន្តែនៅលើសង្វៀនវាអាស្រ័យទៅលើសំណាងដែរគឺ សៀកឡុង សំណាង វ៉ៃចូល ណារ័ត្ន ១ ដៃ តែ ណារ័ត្ន អត់សូវសំណាង ដែលប្រកួតជាមួយអ្នកមានកម្រិតទាបជាងហើយ តែគាត់នៅតែធ្វើអត់បានល្អ»។
លោកបានបន្ថែមថា៖ «ចំណែក ពេជ្រ សម្បត្តិ ធ្លាប់វ៉ៃតែជាង ១០ ប្រកួតទេ រីឯ អេ ណារ័ត្ន ចូល ៥០ ទៅ ៦០ ប្រកួតហើយ ហើយធ្លាប់ប្រកួតអន្តរជាតិច្រើនទៀត ប៉ុន្តែជាក់ស្តែង សម្បត្តិ បច្ចុប្បន្នគាត់ឡើងជើង ហើយ ណារ័ត្ន ឡើងប្រកួត កាលពីថ្ងៃអាទិត្យនោះ គ្រាន់តែទប់ គឺមើលទៅអត់មានអីវាយចេញទៅលើដៃគូ ដែលធ្វើឱ្យគាត់គិតថា ការប្រកួត ៩ នាទី ឬម៉ាសហ្វៃ វាមិនសូវមានភាពអំណោយផលសម្រាប់គាត់ ព្រោះម៉ាសហ្វៃ យើងទាមទារកីឡាករខ្លាំង និងវាយបុក អ៊ីចឹងកីឡាករថយ វ៉ៃក្បាច់ ប្រហែលជាពិបាកវ៉ៃជាមួយច្បាប់ម៉ាសហ្វៃ ហេតុនេះវាជាការយល់ឃើញរបស់កីឡាករ គឺបើគាត់ (អេ ណារ័ត្ន) ចង់ប្រកួត យើងនឹងរៀបចំ តែបើគាត់មិនចង់ ក៏យើងមិនរៀបចំឱ្យគាត់ដែរ»៕