.jpg)
Chiesa ត្រូវនៅក្រៅទីលានប្រមាណ ៧ ខែ ក្រោយវះកាត់ជង្គង់។ AFP
ក្រុងមីឡាន: ខ្សែប្រយុទ្ធ Federico Chiesa នឹងអវត្តមានក្នុងរយៈពេលប្រហែលជា ៧ ខែ។ នេះបើតាមការប្រកាសរបស់ក្លិប Juventus កាលពីថ្ងៃអាទិត្យ បន្ទាប់ពីកីឡាករអន្តរជាតិអ៊ីតាលី ទទួលការវះកាត់ជង្គង់ខាងឆ្វេង។
ក្រុមសេះបង្កង់ Juve បានឱ្យដឹងនៅក្នុងសេចក្តីថ្លែងការណ៍មួយ ដែលបានចេញផ្សាយ មុនពេលចាប់ផ្តើមការប្រកួតនៅក្របខ័ណ្ឌ Serie A របស់ពួកគេ នៅឯទឹកដីរបស់ក្រុម AC Milan ថា កីឡាករ Chiesa ត្រូវធ្វើការវះកាត់នៅទីក្រុង Innsbruck ដើម្បីតភ្ជាប់សរសៃពួរនៃជង្គង់ខាងឆ្វេងរបស់គេឡើងវិញ។
«ការវះកាត់បានទទួលផលល្អណាស់។ ពេលវេលានៃការសះស្បើយឡើងវិញ គឺប្រមាណជា ៧ ខែ»។ នេះជាការឱ្យដឹងរបស់ក្លិប Juventus នៅក្នុងសេចក្ដីប្រកាសនោះ។
កីឡាករ Chiesa ដើរដោយដំណើរខ្ញើចៗចេញពីទីលាននៃពហុកីឡដ្ឋានអូឡាំពិក ក្នុងវគ្គទី១ នៃការប្រកួត ដែលក្រុម Juve មានជ័យជម្នះ ៤-៣ លើក្រុមម្ចាស់ផ្ទះ Roma កាលពី ២ សប្ដាហ៍មុន ដោយមិនជាយូរប៉ុន្មាននោះឡើយ បន្ទាប់ពីទើបបានវិលមកមានសកម្មភាពវិញ ក្រោយបាត់មុខប៉ុន្មានសប្ដាហ៍ ដោយសាររបួសសាច់ដុំ។
កីឡាករវ័យ ២៣ ឆ្នាំ Chiesa នឹងខកខាន ក្នុងការរួមចំណែកជួយក្រុមជម្រើសជាតិអ៊ីតាលី ដែលត្រូវប្រឹងប្រែងដណ្ដើមសិទ្ធិ ដើម្បីបានទៅចូលរួមព្រឹត្តិការណ៍ World Cup 2022 តាមរយៈការប្រកួតវគ្គចាញ់ធ្លាក់ ដែលចាប់ផ្តើមដោយការជួបជាមួយក្រុមម៉ាសេដ្វានខាងជើង នៅចុងខែមីនានេះ។
ការអវត្តមានរបស់គេ នឹងកា្លយជាផលប៉ះពាល់ដ៏ធំចំពោះគ្រូបង្វឹកក្រុមអ៊ីតាលី លោក Roberto Mancini ដោយសាររូបគេ គឺជាកីឡាករដ៏សំខាន់មួយរូប ដែលជួយឱ្យក្រុមរហស្សនាម «Azzurri» (ពណ៌ខៀវ) ឈ្នះជើងឯក ក្នុងព្រឹត្តិការណ៍ Euro 2020 ថ្មីៗនេះ៕ AFP/VN
