ក្រុងលីមបេ: កីឡាករ Ismahila Ouedraogo ស៊ុតបាល់ចុងក្រោយ ក្នុងវគ្គប៉េណាល់ទីកាត់ក្ដី ដើម្បីជួយឱ្យក្រុមជម្រើសជាតិប៊ួគីណាហ្វាសូ ឈ្នះក្រុមហ្គាបុង ៧-៦ រួចឡើងទៅវគ្គ ៨ ក្រុមចុងក្រោយ នៃព្រឹត្តិការណ៍ Africa Cup of Nations (AFCON) ខណៈដែលការប្រកួត កាលពីថ្ងៃអាទិត្យ នៅក្រុងលីមបេ (Limbe) ក្នុងម៉ោងធម្មតា និងម៉ោងបន្ថែមពិសេសស្មើគ្នា ១-១។
ក្រុមប៊ួគីណាហ្វាសូ អាចនឹងមានជ័យជម្នះក្នុងម៉ោងធម្មតា ៩០ នាទី សម្រាប់ការប្រកួតក្នុងវគ្គ ១៦ ក្រុមនេះ ដោយសារគ្រាប់បាល់នៅវគ្គទី១ របស់កីឡាករប្រធានក្រុម Bertrand Traore ដែលនៅមុនហ្នឹងប្រមាណជា ១០ នាទី ទាត់បាល់ពិន័យ ១១ ម៉ែត្រប្លាត។
ហើយសំខាន់ទៀតនោះ ក្រុមគូបដិបក្ខហ្គាបុង ត្រូវកាត់បន្ថយសមាជិកមា្នក់ទៀត នៅពេលដែលខ្សែការពារកណ្ដាល Sidney Obissa ទទួលបានកាតលឿងជាលើកទី២ នៅពាក់កណ្ដាលតង់ទី២ តែខ្សែបម្រើការពារ Adama Guira របស់ក្រុមប៊ួគីណាហ្វាសូ សំណាងមិនល្អ បានធ្វើឱ្យបាល់ចូលទីខ្លួនឯង នៅនាទីទី១ នៃម៉ោងបន្ថែមបង្គ្រប់មានរបួស ដែលនាំឱ្យការប្រកួតត្រូវបន្លាយពេលដល់ម៉ោងបន្ថែមពិសេស។
បន្ទាប់ពីមិនមានការស៊ុតបញ្ចូលទីគ្នា ក្នុងម៉ោងបន្ថែមពិសេសនេះ ដើម្បីរកក្រុមឈ្នះឡើងទៅវគ្គបន្ត ការសម្រេចដោយការស៊ុតបាល់ប៉េណាល់ទីកាត់ក្ដី ក៏កើតឡើង ហើយខ្សែការពារ Lloyd Palun បានក្លាយជាកីឡាករហ្គាបុងទី៣ ដែលស៊ុតបាល់ប៉េណាល់ទីនេះអត់ចូល មុនពេលកីឡាករ Ouedraogo ទម្លុះសំណាញ់ទី ដើម្បីបញ្ជូនក្រុមសេះឈ្មោលប៊ួគីណាហ្វាសូ ទៅបង្ហាញមុខនៅវគ្គបន្ត។
ក្រុមជើងឯករងនៅ AFCON ក្នុងឆ្នាំ ២០១៣ ទៅធ្វើការប្រកួតក្នុងវគ្គ ៨ ក្រុម នៅក្រុងហ្គារូអា (Garoua) នាថ្ងៃសៅរ៍នេះ ដោយត្រូវប៉ះក្រុមទុយនីស៊ី ដែលយកឈ្នះក្រុមនីហ្សេរីយ៉ា ក្នុងលទ្ធផល ១-០។
«វាជាហ្គេមដ៏រញ៉េរញ៉ៃមួយ ហើយវាមិនងាយស្រួលនោះទេ ក្នុងការគ្រប់គ្រងអារម្មណ៍របស់ពួកយើង។ យើងមានឱកាស ក្នុងការសម្លាប់ (បញ្ចប់) ការប្រកួតនេះ ដោយមិនចាំបាច់បន្លាយពេល តែនោះ គឺជាបាល់ទាត់។ វាអាចកើតឡើងតាមផ្លូវណាមួយ តែយ៉ាងណា យើងរីករាយនឹងលទ្ធផលនេះ»។ នេះជាការលើកឡើងរបស់គ្រូបង្វឹកក្រុមប៊ួគីណាហ្វាសូ លោក Kamou Malo។
ក្រុមហ្គាបុង ត្រូវត្រឡប់ទៅផ្ទះវិញជាមួយនឹងរឿងរ៉ាវអាប់អួ ដែលកើតឡើងដោយសារតែអវត្តមានរបស់កីឡាករឆ្នើម ២ រូប ពីការប្រកួតប្រជែងនេះ គឺខ្សែប្រយុទ្ធ Pierre-Emerick Aubameyang និងខ្សែបម្រើ Mario Lemina ដោយកីឡាករទាំង ២ រូប ត្រូវបានបញ្ជូនទៅប្រទេសវិញ កាលសប្ដាហ៍មុន ដោយមិនបានចូលលេងសូម្បី ១ នាទី ក្រោយពីទទួលបានលទ្ធផលតេស្តវិជ្ជមាននៃជំងឺកូវីដ ១៩៕ AFP/VN