ភ្នំពេញៈ កីឡាករមានរហស្សនាម «អ្នកលេងកាំភ្លើងខ្លី» វ៉ាន់ វឿន បានអះអាងថា ខ្លួនបានប្រើបច្ចេកទេសថ្មី ក្នុងការយកឈ្នះលើម្ចាស់ខ្សែក្រវាត់ មាស អេលីត ចំរើន ដើម្បីបង្កើតឱ្យមានភាគរយឡើងវិញក្នុងការប្រជែងឡើងទៅកាន់វគ្គពាក់កណ្តាលផ្តាច់ព្រ័ត្រ នៃការប្រកួតដណ្តើមពានមាស នៅសង្វៀន ថោន ចំណែក ឈុត សេរីវ៉ាន់ថង បានប្រើក្បាច់ពិសេស ដើម្បីបំបាក់ភាពស៊ូទ្រាំរបស់ សេក ចៅជូត រួចឡើងទៅវគ្គបន្ត។
តាមពិត នៅមុនការប្រកួតជម្រុះសន្សំពិន្ទុ ក្នុងពូល B កាលពីថ្ងៃអាទិត្យ កន្លងមកនេះ វ៉ាន់ វឿន ធ្លាប់បានចាញ់ អេលីត ចំរើន ៣ លើកមកហើយ ក្នុងនោះរាប់ទាំងការប្រកួតផ្តាច់ព្រ័ត្រ ដណ្តើមខ្សែក្រវាត់មាស រដូវកាលទី១ នៅលើសង្វៀន PNN ផងដែរ ប៉ុន្តែការជួបគ្នាលើកនេះ វ៉ាន់ វឿន បានកែប្រែស្ថានភាពប្រកួតបានយ៉ាងល្អ ដើម្បីកែប្រែប្រវត្តិជូរចត់ទាំងនោះ ឱ្យវិលមករកភាពប្រសើរវិញ។
ទាំង វ៉ាន់ វឿន និង អេលីត ចំរើន សុទ្ធតែបានប្តេជ្ញាចិត្តខ្ពស់ ក្នុងការប្រជែងយក ៣ ពិន្ទុ ព្រោះនេះជាជំនួបកាត់សេចក្តី រកអ្នកដែលត្រូវធ្លាក់ចេញពីការប្រកួតនេះមុនគេ ហើយជាមួយការតាំងចិត្តនេះ អ្នកទាំង ២ បានវ៉ៃប្តូរគ្នាទៅវិញទៅមក គួរឱ្យជក់ចិត្តបំផុត ប៉ុន្តែនៅទីបំផុត វ៉ាន់ វឿន គឺជាអ្នកឈ្នះបាន ៣ ពិន្ទុ ដើម្បីបង្កើតឱ្យមានក្តីសង្ឃឹមឡើងវិញ ក្នុងការប្រជែងទៅវគ្គបន្ត បន្ទាប់ពីចៅក្រមទាំង ៥ នាក់ បានសម្រេចឱ្យរូបគេឈ្នះលើ អេលីត ចំរើន ដោយពិន្ទុមិនឯកច្ឆន្ទ ៣-២។
ម្ចាស់ខ្សែក្រវាត់មាស ២ សម័យកាល អេលីត ចំរើន បានទទួល យក ចំពោះការចាញ់ វ៉ាន់ វឿន លើកនេះ ប៉ុន្តែកីឡាករទើបក្លាយជាឪពុករបស់គេរូបនេះ បានអះអាងថា ការហ្វឹកហាត់មិនបានគ្រប់គ្រាន់ ដោយសារតែ រវល់មើលថែប្រពន្ធ និងកូនប្រុសដំបូងនៅមន្ទីរពេទ្យ បានធ្វើឱ្យរូបគេមានអារម្មណ៍ភ័យព្រួយសម្រាប់ការប្រកួតលើកនេះ។
អ្នកប្រដាល់មុខស្ងួត អេលីត ចំរើន បាននិយាយក្រោយការប្រកួតថា៖ «ការប្រកួតលើកនេះ ខ្ញុំហ្វឹកហាត់បានតិចតួចដែរ ព្រោះរវល់មើលកូននៅពេទ្យ ដល់អ៊ីចឹងខ្ញុំដូចជាភ័យ និងពិបាកដែរ។ ខ្ញុំមានការបារម្ភ ទៅលើកម្លាំងស៊ុហ្វ ប៉ុន្តែកីឡា តែងមានឈ្នះ មានចាញ់ ហេតុនេះទើបខ្ញុំចាញ់ក៏ខ្ញុំទទួលស្គាល់ថា វាសមរម្យហើយ»។
តាមរយៈការចាញ់ វ៉ាន់ វឿន លើកនេះ អាចបញ្ជាក់បានថា អេលីត ចំរើន បានធ្លាក់ចេញពីការប្រកួតនេះហើយ នោះនៅសល់១ប្រកួតទៀតក្នុងដៃ។ តែទោះបីជាយ៉ាងណា វ៉ាន់ វឿន នៅតែសរសើរពីចំណុចល្អរបស់ ចំរើន ហើយរូបគេ បានបង្ហើបថា ការអាចយកឈ្នះលើ អេលីត ចំរើន លើកនេះ ដោយសារគេប្រើបច្ចេកទេសថ្មី គឺប្រើទម្លាប់ចាស់របស់ ចំរើន ដើម្បីយកប្រៀបលើគេវិញ។
វ៉ាន់ វឿន បាននិយាយថា៖ «គាត់នៅតែល្អ អត់មានថមថយនោះទេ ហើយលើកនេះគាត់ដើរបុកខ្ញុំមុនវិញ ប៉ុន្តែចំណុចនេះ ខ្ញុំបានយកបច្ចេកទេសគាត់ពីមុន មកប្រើ គឺថយ ឱ្យគាត់ចូលវ៉ៃម្តង ព្រោះកន្លងមកខ្ញុំចូលវ៉ៃគាត់មុនរហូត។ តែទោះបីជាយ៉ាងណា ការប្រកួតនេះ មានភាពតានតឹងខ្លាំង ព្រោះមានទៅមកហើយ តែខ្ញុំអាចមានប្រៀបលើគាត់នៅទឹកទី២ និងទឹកទី៣ ខណៈ៣ទឹកទៀត ប្រហែលគ្នាទេ»។
ចំណែក ឈុត សេរីវ៉ាន់ថង បានក្លាយជាបេក្ខភាពទី១ ប្រចាំពូល B នេះ ដែលត្រូវឡើងទៅកាន់ការប្រកួតវគ្គពាក់កណ្តាលផ្តាច់ព្រ័ត្រ បើទោះបីជានៅសល់ ១ ប្រកួតទៀតជាមួយ អេលីត ចំរើន ព្រោះការផ្តួលកីឡាករ សេក ចៅជូត ដោយប្រើក្បាច់ពិសេស នៅក្នុងទឹកទី៥ បន្ថែមទៅលើការឈ្នះពិន្ទុ វ៉ាន់ វឿន កន្លងមក វាគ្រប់គ្រាន់ សម្រាប់រូបគេឡើងទៅវគ្គបន្តហើយ។
ចំពោះការប្រកួតលើកនេះ ត្រូវបានគេគិតថា ជើងខ្លាំង ឈុត សេរីវ៉ាន់ថង នឹងអាចឈ្នះ សេក ចៅជូត ដោយមិនពិបាកទេ នៅពេល ចៅជូត បង្ហាញការឈឺជើងក្រោមការទាត់របស់ វ៉ាន់ថង និងត្រូវបានអាជ្ញាកណ្តាលរាប់ នៅចុងទឹកទី១ នោះ ហើយនៅទឹកទី២ និងទឹកទី៣ ចៅជូត ក៏ត្រូវបាន អាជ្ញាកណ្តាលរាប់ផងដែរ ប៉ុន្តែគ្រប់គ្នា បានសរសើរទៅដល់ស៊ូ និងភាពអំណត់របស់ សេក ចៅជូត ដែលមិនព្រមចុះចាញ់។
ផ្ទុយទៅវិញ នៅក្នុងទឹកទី៤ សេក ចៅជូត បានវ៉ៃប្តូរជាមួយ ឈុត សេរីវ៉ាន់ថង កាន់តែល្អ ហើយក៏មិនបានបង្ហាញការឈឺជើងក្រោមទៀតនោះដែរ ប៉ុន្តែនៅក្នុងទឹកទី៥ វ៉ាន់ថង បានប្រើក្បាច់ពិសេសនាគវាត់កន្ទុយ ធាក់ចំពោះ ចៅជូត ពេញទំហឹង បណ្តាលដួលដេក ហើយត្រូវបានអាជ្ញាកណ្តាលបញ្ឈប់ការប្រកួតតែម្តង។ តែទោះបីជាយ៉ាងណា សេក ចៅជូត នៅសល់ឱកាសប្រជែងជាមួយ វ៉ាន់ វឿន គឺរវាងអ្នកទាំង ២ នេះ អ្នកឈ្នះនឹងត្រូវឡើង ទៅវគ្គបន្តប្រចាំពូល B នេះ ជាមួយ ឈុត សេរីវ៉ាន់ថង៕