ក្រុងឡុងដ៍: អតីតអាជ្ញាកណ្តាលរបស់ក្របខ័ណ្ឌ Premier League លោក Mark Clattenburg ដែលបច្ចុប្បន្នសរសេរអត្ថបទឱ្យកាសែត Daily Mail បានលើកឡើងថា លោក Kevin Friend បានធ្វើការសម្រេចចិត្តខុសចំនួន ២លើក ក្នុងការប្រកួតដែលក្រុមហង្សក្រហម Liverpool មានជ័យជម្នះ ៣-១ លើក្រុមម្ចាស់ផ្ទះ Crystal Palace នៅឯកីឡដ្ឋាន Selhurst Park កាលពីថ្ងៃអាទិត្យចុងសប្ដាហ៍កន្លងមក។
ក្នុងការប្រកួតនោះ គ្រាប់បាល់របស់ក្រុម Liverpool បានមកដោយខ្សែការពារ Virgil van Dijk នៅនាទីទី៨ ខ្សែបម្រើ Alex Oxlade-Chamberlain នៅនាទីទី៣២ និងកីឡាករ Fabinho ដែលជាការទាត់បាល់ប៉េណាល់ទី នៅនាទីទី៨៩ ខណៈដែល ១គ្រាប់របស់ក្រុម Palace ស៊ុតបញ្ចូលទី ដោយកីឡាករ Odsonn Edouard នៅនាទីទី៥៥។
តែបញ្ហានៅត្រង់ថា គ្រាប់បាល់ ២ គ្រាប់ចុងក្រោយរបស់ហង្សក្រហម ត្រូវបានលើកយកមកជជែកដេញដោលយ៉ាងខ្លាំង ដោយការស៊ុតរបស់កីឡាករ Oxlade-Chamberlain ត្រូវបានក្រុមម្ចាស់ផ្ទះ យល់ឃើញថា កីឡាករ Roberto Firmino មានសួនរួម ក្នុងការលេងមុនគេ ខណៈដែលពេលនោះ ខ្សែប្រយុទ្ធអន្តរជាតិប្រេស៊ីល កំពុងស្ថិតក្នុងជំហអកហ្សឺ។
ចំពោះគ្រាប់ទី៣ វិញ ក្រុម Palace គិតថា វាមិនគួរជាបាល់ពិន័យ ១១ ម៉ែត្រទេ ព្រោះបើទោះជាខ្សែប្រយុទ្ធ Diogo Jota របស់ក្រុម Liverpool បានបុកទង្គិចជាមួយអ្នកចាំទី Vicente Guaita ក៏ដោយ ក៏គេមិនទាន់ដឹងច្បាស់ដែរថា តើខ្សែប្រយុទ្ធសញ្ជាតិព័រទុយហ្គាល់រូបនេះ នឹងអាចរត់ទៅទាន់បាល់ ឬអត់? ហើយជាក់ស្ដែងពីដំបូង លោក Friend ក៏មិនបានផ្លុំផ្ដល់បាល់ពិន័យដែរ តែពេលពិនិត្យ VAR (វីដេអូជំនួយការអាជ្ញាកណ្ដាល) ឡើងវិញ ក៏ផ្លាស់ប្ដូរការសម្រេច។
លោក Clattenburg បានបញ្ចេញទស្សនៈថា៖ «ក្រុម Crystal Palace សមនឹងខឹង ចំពោះការសម្រេចរបស់អាជ្ញាកណ្តាល ក្នុងការផ្តល់គ្រាប់បាល់ទី២ ឱ្យក្រុម Liverpool ព្រោះនៅពេលដែលកីឡាករ Andy Robertson បានលើកបាល់ចូលទៅក្នុងប្រអប់គ្រោះថ្នាក់នោះ កីឡាករ Roberto Firmino កំពុងឈរនៅក្នុងជំហអកហ្សឺច្បាស់ណាស់ ហើយពេលនោះ រូបគេបានព្យាយាមលោត ដើម្បីយកបាល់។ ប្រសិនបើគេមិនបាននៅទីតាំងនោះ តាំងពីដំបូងទេ ខ្សែការពារឆ្វេងរបស់ Tyrick Mitchell របស់ Palace អាចនឹងលោតតែតផ្ដាច់បាល់ចេញបានហើយ។ ត្រង់នេះ គួរតែពិនិត្យ VAR ឡើងវិញ»។
«លើសពីនេះទៀត លោក Kevin Friend គួរតែរឹងមាំជាមួយនឹងការ-សម្រេចដើមរបស់គាត់ផងដែរ នៅពេលដែល Jota បណ្ដើរបាល់ឆ្លងកាត់ Guita ដោយរូបគេបានព្យាយាមយកខ្លួនឱ្យទៅប៉ះទង្គិចជាមួយអ្នកចាំទី ដោយចេតនា។ ខ្ញុំមិនយល់ថា ហេតុអ្វីលើកនេះ លោក Craig Pawson ដែលជាអាជ្ញាកណ្តាលទទួលបន្ទុក VAR សុំពិនិត្យ ក្នុងចង្វាក់លើកនេះ ដូច្នេះ លោក Friend មិនបានកាត់ក្ដីខុសនោះឡើយ ដោយសារបានឃើញហេតុការណ៍នោះច្បាស់ណាស់។ តែគួរឱ្យស្ដាយ លោក Friend មិនជឿជាក់លើការសម្រេចដំបូងរបស់គាត់ ដែលជាការត្រឹមត្រូវសោះ បន្ទាប់ពីគាត់ពិនិត្យមើលចង្វាក់នៃការលេងពីអេក្រង់នៅខាងក្រៅទីលាន»៕ VN