.jpg)
លោក Ranieri របស់ Watford ថ្លែងទៅកាន់អ្នកសារព័ត៌មាន ក្រោយការប្រកួតទល់នឹង Norwich។ AFP
ក្រុងឡុងដ៍: អ្នកចាត់ការក្រុម Watford លោក Claudio Ranieri ត្រូវបានបញ្ចប់តួនាទីជាផ្លូវការហើយ កាលពីថ្ងៃចន្ទ បន្ទាប់ពីធ្វើតួនាទីបានត្រឹមតែ ១៤ ហ្គេមប៉ុណ្ណោះ ក្នុងការទទួលបន្ទុកដឹកនាំក្រុមកំពុងយ៉ាប់យ៉ឺន នៅក្របខ័ណ្ឌ Premier League មួយនេះ។
លោក Ranieri ត្រូវបានតែងតាំង ក្នុងខែតុលា ដើម្បីជំនួសតំណែងរបស់លោក Xisco Munoz បន្ទាប់ពីអ្នកចាត់ការសញ្ជាតិអេស្ប៉ាញរូបនោះ ត្រូវបានដកតួនាទី។ តែបុរសសញ្ជាតិអ៊ីតាលីវ័យ ៧០ ឆ្នាំរូបនេះ មិនអាចជួយកែប្រែជោគវាសនារបស់ក្រុម Watford បានឡើយ ដោយដឹកនាំឱ្យក្រុមឪម៉ាល់ ដណ្ដើមបានតែ ៧ ពិន្ទុប៉ុណ្ណោះ អំឡុងការគ្រងតំណែងរយៈពេលខ្លីរបស់គាត់នេះ។
រយៈពេលត្រឹមតែ ១១២ ថ្ងៃប៉ុណ្ណោះ បន្ទាប់ពីការតែងតាំងផ្លូវការរបស់គាត់ លោក Ranieri បានទទួលផលតបស្នងហើយ សម្រាប់ការធ្លាក់ចុះរបស់ក្រុម Watford រហូតទៅឈរក្នុងតំបន់ត្រូវកាត់ចោល ក្រោយរងបរាជ័យ ៣-០ កាលពីសប្តាហ៍មុន ក្រោមថ្វីជើងរបស់ក្រុមគូប្រជែង Norwich ដែលស៊ូដើម្បីរស់នៅលីគកំពូលដូចគ្នាដែរ។
ពាក់ព័ន្ធនឹងការបញ្ចប់តំណែងនេះ ក្លិប Watford បានឱ្យដឹងក្នុងសេចក្ដីប្រកាសថា៖ «ក្លិបបាល់ទាត់ Watford សូមបញ្ជាក់អះអាងពីការចាកចេញរបស់គ្រូបង្វឹក លោក Claudio Ranieri»។
ក្រុម Watford កំពុងឈរនៅចំណាត់ថ្នាក់បាតតារាងទី២ ដោយមានគម្លាត ២ ពិន្ទុ ពីក្រុមនៅតំបន់សុវត្ថិភាព បន្ទាប់ពីចាញ់ ៧ លើក ក្នុងចំណោម ៨ ហ្គេមចុងក្រោយនៅលីគ។ ពួកគេមិនឈ្នះសូម្បី ១ ប្រកួតឡើយ នៅគ្រប់កម្មវិធីទាំងអស់ ដែលជាដំណើរផ្លូវមិនទទួលបានជ័យជម្នះដ៏យូរបំផុតរបស់ពួកគេ គិតចាប់តាំងពីឆ្នាំ ២០១៣ មក។
ម្ចាស់ក្លិប Watford គ្រួសារត្រកូល «Pozzo» ទទួលអារម្មណ៍ថា ពួកគេត្រូវតែធ្វើសកម្មភាពនាពេលនេះ ដើម្បីឱ្យក្រុមមានឱកាស ក្នុងការតស៊ូប្រជែង ដើម្បីគេចឱ្យផុតពីការធ្លាក់ពីលីគកំពូល ដោយសារទើបបានឡើងពីលីគលំដាប់ទី២ Championship រដូវកាលមុននេះឯង។
«ក្រុមប្រឹក្សាភិបាលរបស់ក្លិប Watford ទទួលស្គាល់ថា លោក Claudio (Ranieri)ជាបុគ្គលដ៏ស្មោះត្រង់ និងមានកិត្តិយសម្នាក់ ដែលតែងតែត្រូវបានគោរពនៅទីនេះ ក្នុងទឹកដី Vicarage Road សម្រាប់កិច្ចខិតខំប្រឹងប្រែងរបស់គាត់ក្នុងការដឹកនាំក្រុមប្រកបដោយសេចក្តីថ្លៃថ្នូរ»។ សេចក្ដីប្រកាសរបស់ក្លិបបានឱ្យដឹងបន្តដូច្នេះ។
«តែទោះជាយ៉ាងណាក៏ដោយក្រុមប្រឹក្សាភិបាលមានអារម្មណ៍ថា ជាមួយនឹងការនៅសល់ស្ទើរតែពាក់កណ្តាលទៀត នៃរដូវកាលរបស់ Premier League នោះ ការផ្លាស់ប្តូរតំណែងគ្រូបង្វឹកឥឡូវនេះ នឹងបើកផ្លូវឱ្យអ្នកត្រូវបានតែងតាំងថ្មី មានពេលវេលាគ្រប់គ្រាន់ ដើម្បីធ្វើការជាមួយក្រុមកីឡាករដ៏មានទេពកោសល្យ ដើម្បីសម្រេចបាននូវគោលដៅភ្លាមៗ ក្នុងការរក្សាស្ថានភាពរបស់ក្លិបនៅ Premier League»។
លោក Ranieri ធ្លាប់បានឈ្នះពាន Premier League យ៉ាងល្បីល្បាញជាមួយក្រុម Leicester City ក្នុងឆ្នាំ ២០១៦ ប៉ុន្តែពេលវេលារបស់គាត់ នៅក្របខ័ណ្ឌកំពូលរបស់អង់គ្លេស គឺមិនសូវទទួលបានជោគជ័យនោះឡើយ ចាប់តាំងពីពេលនោះមក៕ AFP/VN
