.jpg)
មនុស្ស ៨ នាក់បានស្លាប់ ក្នុងហេតុការណ៍ជាន់គ្នានៅកីឡដ្ឋាន Olembe ក្នុងជំនួបរវាងក្រុមក្រុមជម្រើសជាតិកាមេរូន និងក្រុមកូម័រ។ រូបថត AFP
ក្រុងយុនដេ: មនុស្ស ៨ នាក់បានស្លាប់ និងប្រហែលជា ៥០ នាក់ បានរងរបួស ក្នុងហេតុការណ៍ច្របូកច្របល់មួយ នៅខាងក្រៅកីឡដ្ឋានបាល់ទាត់របស់ប្រទេសកាមេរូន ដែលកើតឡើង នៅមុនការប្រកួតនៃកម្មវិធី Africa Cup of Nations (AFCON) កាលពីថ្ងៃចន្ទ។
ក្រុមមនុស្សបានព្យាយាមសម្រុកចូលទៅក្នុងកីឡដ្ឋាន Olembe ក្នុងរដ្ឋធានីយុនដេ ដើម្បីចូលទៅមើលការប្រកួត ក្នុងវគ្គ ១៦ ក្រុមចុងក្រោយ ដែលបញ្ចប់ទៅដោយក្រុមជម្រើសជាតិកាមេរូន យកឈ្នះក្រុមកូម័រ ក្នុងលទ្ធផល ២-១។
បើទោះបីជាចំនួនផ្ទុករបស់កីឡដ្ឋាន ដែលមាន ៦០ ០០០ កៅអី ត្រូវបានកម្រិតដោយសារការបារម្ភពីការឆ្លងនូវវីរុសកូរ៉ូណាក្ដី ក៏ការកំណត់ត្រឹម ៦០ ភាគរយ ត្រូវបានដំឡើងដល់ ៨០ ភាគរយ នៅពេលដែលក្រុមម្ចាស់ផ្ទះកាមេរូន ធ្វើការប្រកួត។
«មានអ្នកបាត់បង់ជីវិត ៨ នាក់ ក្នុងនោះស្ត្រី ២ នាក់ វ័យ ៣០ ឆ្នាំ និងបុរស ៤ នាក់ វ័យ ៣០ ឆ្នាំ ព្រមទាំងទារកម្នាក់ ហើយសពម្នាក់ទៀត ត្រូវបានក្រុមគ្រួសារ យកទៅបាត់ហើយ»។ នេះបើយោងតាមរបាយការណ៍បឋមរបស់មន្ត្រីសុខាភិបាល ដែល AFP ទទួលបាន។
មន្ត្រីសុខាភិបាលបានឱ្យដឹងទៀតថា អ្នករងគ្រោះ ត្រូវបានដឹកភ្លាមៗតាមរថយន្តសង្គ្រោះបន្ទាន់ តែការស្ទះចរាចរណ៍ បានធ្វើឱ្យដំណើរការដឹកជនរងគ្រោះមានការយឺតយ៉ាវ ហើយបើតាមមន្ត្រីដដែលនោះ មានមនុស្សប្រមាណជា ៥០ នាក់រងរបួស ក្នុងនោះមាន ២ នាក់ របួសស្ទើរពេញរាងកាយ ខណៈ ២ នាក់ផ្សេងទៀត របួសធ្ងន់ធ្ងរផ្នែកក្បាល។
គណៈកម្មការគ្រប់គ្រងការប្រកួតនេះ បានអះអាងប្រាប់ AFP នៅមុននេះថា ចំនួនអ្នកស្លាប់ និងរបួស ត្រូវបានកត់ត្រាទុក ដោយមិនមានផ្ដល់ព័ត៌មានលម្អិតបន្ថែមទៀតឡើយ។
អ្នកនាំពាក្យរបស់គណៈកម្មការរៀបចំការប្រកួតប្រជែង AFCON លោក Abel Mbengue បានប្រាប់មក AFP ថា៖«មានការជាន់គ្នា ដែលអាចនឹងកើតឡើង នៅពេលមានការសម្រុកចូល។ យើងកំពុងរង់ចាំព័ត៌មានដែលអាចជឿទុកចិត្តបាន អំពីចំនួនអ្នកស្លាប់ និងរបួស ក្នុងហេតុការណ៍សោកនាដកម្មនេះ»។
សហព័ន្ធបាល់ទាត់អាហ្វ្រិក (CAF) ដែលគ្រប់គ្រងដំណើរការនៃការប្រកួតប្រជែងដណ្ដើមពានរង្វាន់ដ៏ធំប្រចាំទ្វីបនេះ បានឱ្យដឹងថា សហព័ន្ធកំពុងធ្វើការស៊ើបអង្កេតចំពោះស្ថានការណ៍នេះ និងកំពុងព្យាយាមរកឱ្យបាននូវព័ត៌មានលម្អិតពីអ្វី ដែលបាននាំឱ្យមានបញ្ហាដ៏គួរឱ្យស្លុតចិត្តនេះកើតឡើង៕ AFP/VN
