.jpg)
ខ្សែបម្រើកូឡុំប៊ី Nieto របស់ភ្នំពេញក្រោន បានព្យាយាមអូសបាល់រំលងប្រធានក្រុមរបស់គិរីវង់ ក្នុងជំនួបពីថ្ងៃអាទិត្យ។ រូបថត ក្រោន
ភ្នំពេញៈ ថ្នាក់ដឹកនាំក្លិបបាល់ទាត់ភ្នំពេញក្រោនបានបង្ហើបថា ក្លិបកំពុងសម្លឹងមើលខ្សែប្រយុទ្ធមុតស្រួចជាកីឡាករបរទេសចំណូលថ្មីម្នាក់ទៀត ដើម្បីមកជួយពង្រឹងក្រុម ជាមួយកីឡាករបរទេសចាស់ ៤ នាក់ ដែលបានជួយឱ្យក្រុមសិង្ហក្រហម ឱ្យលើកពានលីគកំពូលកម្ពុជា កាលពីឆ្នាំ ២០២១ ហើយភ្នំពេញក្រោន ក៏បានប្រកាសពីការបន្តកុងត្រារយៈពេលវែង ដល់កីឡាករក្នុងស្រុក មានសមត្ថភាពល្អៗជាច្រើនរូបទៀត ដើម្បីបន្តដំណើរឆ្ពោះទៅបង្កើតប្រវត្តិសាស្ត្រ រួមគ្នាបន្ថែមទៀតផងដែរ។
គិតមកដល់ពេលនេះ ក្រុមភ្នំពេញក្រោន បានបន្តកុងត្រាថ្មីរួចហើយ ដល់កីឡាករជប៉ុន Yudai Ogawa និង Ose Takaki រួមទាំងខ្សែបម្រើប្រយុទ្ធជនជាតិកូឡុំប៊ី Andre Nieto និងខ្សែប្រយុទ្ធអ៊ុយក្រែន Valeriy Hryshyn ដែលអ្នកទាំង ៤ នេះ រួមទាំងខ្សែប្រយុទ្ធប្រេស៊ីល ទើបចែកផ្លូវគ្នា Matheuse បានក្លាយជាកម្លាំងយ៉ាងសំខាន់ ក្នុងការជួយឱ្យភ្នំពេញក្រោន ឈ្នះពានលីគកំពូលកម្ពុជា កាលពីឆ្នាំ ២០២១ និងជាពានលើកទី៧ របស់ពួកគេផងដែរ។
ជាមួយគ្នានេះ លោក កែវ សុខង៉ន អ្នកចាត់ការទូទៅក្រុមភ្នំពេញក្រោន នៅតែផ្តល់ទំនុកចិត្តដល់កីឡាករបរទេសទាំង ៤ នាក់នេះ ថានឹងបន្តជួយក្រុម បានកាន់តែច្រើន។ សុខង៉ន បាននិយាយថា៖ «សម្រាប់កីឡាករបរទេស ៤ នាក់ ដែលយើងបានបន្តកុងត្រានេះ គឺពួកគាត់ សុទ្ធតែមានបទពិសោធ នៅក្នុងការប្រកួតលីគកំពូល ហើយគុណភាពនៃការលេងរបស់ពួកគាត់ យើងគិតថា នឹងនៅតែសហការគ្នាក្នុងការជួយជ្រោមជ្រែងក្រុមបានច្រើន»។
យ៉ាងណាក៏ដោយ ភ្នំពេញក្រោន គ្រោងនឹងនាំយកខ្សែប្រយុទ្ធបរទេសម្នាក់ទៀត ដែលមានសមត្ថភាព កាន់តែខ្ពស់ ក្នុងការបញ្ចប់ទី ឬរកគ្រាប់បាល់ជូនក្រុម។ លោក កែវ សុខង៉ន បានបញ្ជាក់ថា៖ «សម្រាប់កីឡាករបរទេសមួយទៀត យើងកំពុងតែសម្លឹងទៅរកខ្សែប្រយុទ្ធមួយ ដែលមុតស្រួច ដើម្បីជួយក្រុម គឺធ្វើយ៉ាងណាឱ្យការបញ្ចប់ទីរបស់យើងកាន់តែបានល្អសម្រាប់ការប្រកួតរដូវកាលថ្មីនេះ»។
ជាមួយគ្នានេះ ក្រុមភ្នំពេញក្រោន បានសម្រេចបន្តកុងត្រារយៈពេលវែង ដល់កីឡាករក្នុងស្រុក ដែលមានសមត្ថភាពជាច្រើនរូប សម្រាប់បន្តជួយក្រុមទៀត។ ក្រុមសិង្ហក្រហម បានបន្តកុងត្រាដល់អ្នកចាំទី ជាម្ចាស់ស្រោមដៃមាសឆ្នាំ ២០២១ សាវែង សំណាង ខ្សែបម្រើ យ៉ើ ម៉ូស្លីម ខ្សែការពារ យ៉ើ សាហ្វី ខ្សែបម្រើ ប្រាក់ ធីវ៉ា និងខ្សែប្រយុទ្ធ ពៅ ប៉ុនវុទ្ធី រហូតដល់ឆ្នាំ ២០២៥ ដូចគ្នា ព្រមទាំងបន្តកុងត្រាដល់ខ្សែបម្រើកណ្តាលជាប្រធានក្រុម អ៊ន ចាន់ប៉ូលីន ដល់ឆ្នាំ ២០២៤ ហើយ ក្លិបនេះ ក៏ទើបបានចុះកិច្ចសន្យានាំយកខ្សែបម្រើវ័យក្មេង កើត ពេជ្រ ពីសាលាបាល់ទាត់ជាតិបាទី មកចូលរួមផងដែរ។
បន្ថែមលើនេះ កីឡាករ សឿត បារាំង ដែលបានទៅលេងឱ្យក្លិបអង្គរថាយហ្គឺរ ក្នុងលក្ខខណ្ឌខ្ចីជើង កាលពីឆ្នាំ ២០២១ និងអ្នកចាំទី គង់ ចាន់វុទ្ធី ដែលបានទៅលេងឱ្យក្លិបគិរីវង់សុខសែនជ័យ ក្នុងលក្ខខណ្ឌខ្ចីជើង កាលពីឆ្នាំមុនដែរនោះ ក៏បានវិលត្រឡប់មកលេងឱ្យភ្នំពេញក្រោន នៅរដូវកាលនេះផងដែរ ប៉ុន្តែភ្នំពេញក្រោន បានផ្ទេរខ្សែប្រយុទ្ធ ម៉ៅ ពិសិដ្ឋ ឱ្យទៅលេងនៅក្រុមអង្គរថាយហ្គឺរ ក្នុងលក្ខខណ្ឌខ្ចីជើង និងបានចែកផ្លូវជាមួយកីឡាករកូនខ្មែរ-បារាំង ប៉ាក់ កែវម៉ូនី ដែលពេលនេះ បានទៅលេងឱ្យក្រុម ISI ដង្កោសែនជ័យ នៅក្នុងលីគ២។
ចំពោះការបន្តកុងត្រារយៈពេលវែងនេះ លោក កែវ សុខង៉ន បាននិយាយថា៖ «ការបន្តកុងត្រារយៈពេលវែង ដល់កីឡាករវ័យក្មេងរបស់យើងទាំងនេះ ក៏ព្រោះតែយើងគិតថា ពួកគាត់ជាគ្រួសាររបស់យើង។ ភ្នំពេញក្រោន បានបើកឱ្យមានក្រុមយុវជនតាំងពីឆ្នាំ ២០១២ ឆ្នាំ ២០១៣ ហេតុនេះពួកគាត់បាននៅជាមួយយើងចូល ១០ ឆ្នាំមកហើយ អ៊ីចឹងការបន្តកុងត្រាឱ្យពួកគាត់ នាពេលនេះ ជាការគោរព និងជាការស្រឡាញ់ ព្រមទាំងផ្តល់ភាពកក់ក្តៅឱ្យពួកគាត់បន្ថែមទៀត ដើម្បីបន្តជួយជ្រោមជ្រែងដល់ក្លិប ក្នុងការសាងប្រវត្តិសាស្ត្រជាមួយគ្នាបន្ថែមទៀត»។
ដោយឡែក សម្រាប់ការចូលរួមប្រកួតបាល់ទាត់ពានរង្វាន់បើករដូវកាល Prince Beer Pre-Season Cup 2022 ដែលកំពុងដំណើរការ នៅកីឡដ្ឋានព្រីនស៍ និងកីឡដ្ឋានស្តាតចាស់ ដើម្បីត្រៀមខ្លួនប្រកួតរដូវកាលថ្មីនេះ ភ្នំពេញក្រោនបានយកឈ្នះក្រុមឈរនៅពូល A ជាមួយគ្នា កងយោធពលខេមរភូមិន្ទ ១-០ និងបានបន្តយកឈ្នះក្រុមគិរីវង់សុខសែនជ័យ ៣-០ ដើម្បីឡើងទៅអង្គុយចាំ នៅវគ្គពាក់កណ្តាលផ្តាច់ព្រ័ត្រ មុនគេ ក្នុងនាមជាក្រុមលេខ ១ ប្រចាំពូល A នេះ៕
