.jpg)
ការបង្ហាញពីគម្រោងសាងសង់ភូមិកីឡា នៅក្នុងកិច្ចប្រជុំរបស់ CAMSOC កាលពីថ្ងៃអង្គារ។ រូបថត សហការី
ភ្នំពេញៈ មន្ត្រីជំនាញបច្ចេកទេសរបស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ ២០២៣ (CAMSOC) លោក វ៉ាត់ ចំរើន បានអះអាងថា ការសាងសង់ភូមិកីឡាជាចំណុចក្តៅ និងជាយុទ្ធសាស្ត្ររបស់កម្ពុជា ក្នុងការឈានទៅធ្វើម្ចាស់ផ្ទះជាប្រវត្តិសាស្ត្រលើកនេះ។
«ការងារទី១ នៅកិច្ចប្រជុំថ្ងៃនេះ យើងមានការបទបង្ហាញពីក្រុមហ៊ុនសាងសង់ភូមិកីឡា ព្រោះនេះជាចំណុចក្តៅ និងជាយុទ្ធសាស្ត្ររបស់កម្ពុជា ក្នុងការធ្វើជាម្ចាស់ផ្ទះ ព្រោះបើយើងមានកន្លែងភូមិកីឡានេះ គឺយើងនឹងកាត់បន្ថយការចំណាយបានច្រើន ហើយត្រូវនឹងស្តង់ដាចលនាអូឡាំពិក របស់ការប្រកួតកីឡាអូឡាំពិកធំៗ»។ នេះជាការបញ្ជាក់របស់លោក វ៉ាត់ ចំរើន បន្ទាប់ពីកិច្ចប្រជុំប្រចាំសប្តាហ៍ របស់ CAMSOC បានបញ្ចប់នៅម៉ោង ១១:៥០ នាទីកាលពីថ្ងៃអង្គារ។
យ៉ាងណាក៏ដោយ នៅក្នុងកិច្ចប្រជុំ ដែលដឹកនាំដោយលោកបណ្ឌិត ថោង ខុន ជាអនុប្រធានអចិន្ត្រយ៍ រួមទាំងក្រុមគណៈកម្មការជំនាញរបស់ CAMSOC ព្រមទាំងអ្នកពាក់ព័ន្ធមួយចំនួនទៀតនោះ គឺតំណាងរបស់ក្រុមហ៊ុនសាងភូមិកីឡា បានអះអាង នៅក្នុងអង្គប្រជុំថា ភូមិកីឡា នឹងសាងសង់រួចរាល់ទាន់ពេលវេលា បើទោះបីជាមានការពន្យារពេល ក្នុងការប្រគល់មកឱ្យ CAMSOC ជាអ្នកគ្រប់គ្រងក៏ដោយ។
លោក វ៉ាត់ ចំរើន បានបន្ថែមថា៖ «យើងទទួលបាននូវបទបង្ហាញពីការសាងសង់ភូមិកីឡានេះ គឺក្រុមហ៊ុនថា មានវឌ្ឍនភាពល្អប្រសើរមានន័យថា មូលដ្ឋានគ្រឹះនៃសំណង់ ដូចជាការបុកគ្រឹះ ការរៀបចំគ្រឹះ និងការដំឡើងពីជាន់ទី១ ដល់ជាន់ទី៣ នោះ ក្រុមហ៊ុនបានធ្វើរួចហើយ ហើយក្រុមហ៊ុនបានអះអាងថា ពីជាន់ទី៤ ឡើង គឺ ១ សប្តាហ៍ (ធ្វើហើយ) ១ ជាន់ៗ។ ១ សប្តាហ៍ ១ ជាន់នេះ គឺធ្វើទាំង ៦ អគារខ្ពស់ៗហ្នឹង មិនមែន ១ សប្តាហ៍ ១ ជាន់ ធ្វើតែ ១ អគារនោះទេ។ ចំណែកផ្ទះវីឡា មួយចំនួនទៀត ដែលត្រូវបម្រើការផ្នែករដ្ឋបាល នឹងត្រូវរួចរាល់នៅមុនអគារនេះទៅទៀត»។
«យើងសង្ឃឹមថា ផែនការរបស់គាត់បានគ្រប់គ្រាន់ ហើយគណៈកម្មាធិការ CAMSOC ក៏បានស្នើសុំនូវប្រតិទិនការងារនៃការសាងសង់របស់គាត់ ដែលគម្រោងពីមុន គាត់ត្រូវប្រគល់ឱ្យយើង នៅដំណាច់ឆ្នាំ ២០២២ តែឥឡូវនេះ អាចពន្យារពេល ទៅដល់ដើមខែកុម្ភៈ ឆ្នាំ ២០២៣។ បើយើងបានទទួលនៅដើមខែ ២ យើងអាចនិយាយបានថា អ្វីៗនឹងរឹងមាំ បរិស្ថានក៏រៀបចំរួចរាល់អស់ ចំណែកពណ៌ថ្នាំ ឬក្លិនថ្នាំ នៅក្នុងអគារក៏រលាយបាត់ដែរ»។
អគ្គលេខាធិការ CAMSOC លោក វ៉ាត់ ចំរើន បានបន្ថែមទៀតថា៖ «យើងធ្លាប់ទៅស៊ីហ្គេមកន្លងមក គឺពេលខ្លះ ពេលយើងទៅដល់ គេទើបតែលាបថ្នាំបានប្រហែល ១ អាទិត្យ ហើយអាហ្នឹងវាអាចជះឥទ្ធិពលមិនល្អដល់ប្រតិភូចូលរួម ប៉ុន្តែសម្រាប់កម្ពុជាយើងបានកំណត់ថា យើងធ្វើម្ចាស់ផ្ទះនេះ ឱ្យមានកិត្តិយសខ្ពង់ខ្ពស់ ហេតុនេះយើងត្រូវតែមានភាពអស្ចារ្យមួយថា យើងរៀបចំបានរួចរាល់ ក្នុងការទទួលគេ អ៊ីចឹងក្រុមហ៊ុនអះអាងថា នឹងសាងសង់ភូមិកីឡានេះ ឱ្យបានទាន់ពេលវេលា តាមកាលកំណត់»។
នៅក្នុងកិច្ចប្រជុំ កាលពីថ្ងៃអង្គារនោះ អង្គប្រជុំក៏បានលើកឡើងពីបញ្ហាទីលាន និងបញ្ហាចំនួនទៀត ដែលអាចជាចំណុចរាំងស្ទះ ដល់ស៊ីហ្គេម ឆ្នាំ ២០២៣ មកពិភាក្សាផងដែរ។ ប៉ុន្តែលោក វ៉ាត់ ចំរើន បញ្ជាក់ថា៖ «នៅក្នុងសន្និបាតរបស់ CAMSOC ខាងមុខនេះ យើងនឹងលើកយកបញ្ហាទាំងអស់ មកដោះស្រាយ គឺអ្វីដែលជារបាំង និងបញ្ហាប្រឈម នៅក្នុងដំណើរការ រហូតដល់ឆ្នាំ ២០២៣ យើងត្រូវដោះឱ្យអស់។ ពេលដោះអស់ហើយ យើងសម្រួលឱ្យគណៈកម្មការយើង ធ្វើការដោយងាយ-ស្រួល មានទំនុកចិត្ត និងមានការប្រទាក់ក្រឡាគ្នាល្អ»៕
