.jpg)
ប្រធានាធិបតីរុស្ស៊ី លោក Vladimir Putin ត្រូវបានដកហូតខ្សែក្រវាត់ខ្មៅកិត្តិយស ដោយស្ថាប័នគ្រប់គ្រងកីឡាតេក្វាន់ដូអន្តរជាតិ។ រូបថត AFP
ក្រុងហុងកុង: ប្រធានាធិបតីរុស្ស៊ី លោក Vladimir Putin ត្រូវបានដកហូតខ្សែក្រវាត់ខ្មៅកិត្តិយស ដោយស្ថាប័នគ្រប់គ្រងកីឡាតេក្វាន់ដូអន្តរជាតិ កាលពីថ្ងៃអង្គារ ពាក់ព័ន្ធនឹងការឈ្លានពានលើប្រទេសអ៊ុយក្រែន។
ខណៈពេលដែលកងទ័ពរុស្ស៊ី ប្រមូលផ្តុំនៅខាងក្រៅក្រុងកៀវ ហើយជនភៀសខ្លួនអ៊ុយក្រែនរាប់សែននាក់ បានគេចខ្លួនទៅប្រទេសជិតខាងនោះ មេដឹកនាំពិភពលោក បានចាត់វិធានការដោយដាក់ទណ្ឌកម្មសេដ្ឋកិច្ចលើលោក Putin និងសម្ព័ន្ធមិត្តជិតស្និទ្ធបំផុតរបស់គាត់ ក៏ដូចជាអ្នករកស៊ី ដែលមានពាក់ព័ន្ធជាមួយរុស្ស៊ីផងដែរ។
ពិភពកីឡាក៏មានប្រតិកម្មស្រដៀងគ្នាដែរ ដោយក្រុមរុស្ស៊ី ត្រូវដកពីព្រឹត្តិការណ៍ World Cup ឆ្នាំនេះ ហើយគណៈកម្មាធិការអូឡាំពិកអន្តរជាតិ (IOC) ជំរុញឱ្យសហព័ន្ធដកអត្តពលិកមកពីរុស្ស៊ី ក៏ដូចជាពីសម្ព័ន្ធមិត្តរបស់ប្រទេសនេះ គឺបេឡារុស។
សហព័ន្ធតេក្វាន់ដូពិភពលោក ដែលគ្រប់គ្រងកីឡានេះ ជាសហព័ន្ធថ្មីចុងក្រោយបង្អស់ ដែលថ្កោលទោសលោក Putin ដោយបានឱ្យដឹង កាលពីថ្ងៃអង្គារថា ទង្វើរបស់ក្រុងមូ៉ស្គូ បានធ្វើផ្ទុយនឹងចក្ខុវិស័យរបស់កីឡា ព្រោះថា សន្តិភាពមានតម្លៃជាងជ័យជម្នះ។
«ក្នុងន័យនេះ កីឡាតេក្វាន់ដូពិភពលោក បានសម្រេចដកខ្សែក្រវាត់ខ្មៅកិត្តិយស ៩ ជាន់ ដែលបានប្រគល់ជូនលោក Vladimir Putin កាលពីខែវិច្ឆិកា ឆ្នាំ ២០១៣»។ នេះជាការឱ្យដឹងក្នុងសេចក្ដីប្រកាសពីស្ថាប័ន ដែលមានមូលដ្ឋាននៅក្រុងសេអ៊ូល។
ស្ថាប័នបានបន្ថែមទៀតថា ព្រឹត្តិការណ៍តេក្វាន់ដូផ្លូវការ នឹងមិនត្រូវបានរៀបចំ នៅរុស្ស៊ី ឬបេឡារុសឡើយ ហើយដើម្បីជាការស្របតាមការស្នើរបស់ IOC ទង់ជាតិ និងភ្លេងជាតិនៃប្រទេសទាំង ២ នឹងមិនត្រូវបានបង្ហូត និងចាក់ក្នុងព្រឹត្តិការណ៍តេក្វាន់ដូ ជុំវិញពិភពលោកទេ។
«ទស្សនៈរបស់សហព័ន្ធកីឡាតេក្វាន់ដូពិភពលោក គឺការគាំទ្រប្រជាជនអ៊ុយក្រែន ហើយយើងសង្ឃឹមពីការមានសន្តិភាព និងការបញ្ចប់ភ្លាមៗចំពោះសង្គ្រាមនេះ»។ សេចក្ដីប្រកាសរបស់ស្ថាប័នបានបន្ថែម។
តាមពិតលោក Putin មិនហាត់តេក្វាន់ដូនោះទេ តែផ្ទុយទៅវិញ ទទួលបានជោគជ័យ ក្នុងកីឡាយូដូ ហើយបានធ្វើតួនាទីជាប្រធានកិត្តិយសរបស់សហព័ន្ធយូដូអន្តរជាតិ (IJF) ជាយូរមកហើយ។
កាលពីថ្ងៃអាទិត្យ IJF បានព្យួរឋានៈរបស់គាត់ ក្នុងនាមជាប្រធានកិត្តិយស និងទូតសុច្ឆន្ទៈចំពោះកីឡានេះ៕ AFP/VN
