.jpg)
កីឡាករវាយកូនបាល់ (តិន្នីស) អាជីព Rafael Nadal។ រូបថត AFP
អិនឌៀនវេលស៍: កីឡាករវាយកូនបាល់ (តិន្នីស) អាជីព Rafael Nadal កាលពីថ្ងៃចន្ទ បានសម្តែងការអាណិតអាសូរចំពោះកីឡាការិនី Naomi Osaka បន្ទាប់ពីការធ្លាក់ដោយទឹកភ្នែក ពីកម្មវិធី Indian Wells តែមានជឿថា អត្តពលិកទាំងអស់គួរតែរៀនដោះស្រាយនឹងការចំអកពីអ្នកគាំទ្រ។
ម្ចាស់ជើងឯកពានលំដាប់ Grand Slam ៤ សម័យកាល កីឡាការិនី Osaka ត្រូវបានធ្វើឱ្យស្រក់ទឹកភ្នែក ដោយសារពាក្យប្រមាថពីអ្នកមកទស្សនាម្នាក់ កាលពីថ្ងៃសៅរ៍ ខណៈនាងបានធ្លាក់ចេញពីការប្រកួតនៅសហរដ្ឋអាមេរិកនេះ ដោយបរាជ័យ ២ សិតទល់នឹង ០ ក្រោមថ្វីដៃរបស់កីឡាការិនី Veronika Kudermetova។
កីឡាការិនីសញ្ជាតិជប៉ុន Osaka ធ្វើឱ្យសុខភាពផ្លូវចិត្តទទួលបានការចាប់អារម្មណ៍នៅឆ្នាំមុន បន្ទាប់ពីបានបង្ហាញថា នាងមានជំងឺធ្លាក់ទឹកចិត្ត។
ដោយនិយាយបន្ទាប់ពីជ័យជម្នះនៅជុំទី៣ ក្នុងលទ្ធផល ៧-៥ និង ៦-៣ លើកីឡាករ Dan Evans របស់អង់គ្លេស Nadal និយាយថា រូបគេមានអារម្មណ៍សោកស្តាយជាមួយកីឡាការិនី Osaka ដែលត្រូវបានទទួលរងនូវការជេរប្រមាថពីអ្នកមកមើលការប្រកួត កាលពីថ្ងៃសៅរ៍នោះ។
តែកំពូលកីឡាករ ដែលគ្រងពានលំដាប់ Grand Slam ចំនួន ២១ សម័យកាលនិយាយថា រូបគេជឿថា គ្រប់កីឡាករ-កីឡាការិនី គួរតែរៀនត្រៀមខ្លួន សម្រាប់បរិយាកាសមិនជាទីគាប់ចិត្ត។ ពេលត្រូវបានសួរនូវការយល់ឃើញរបស់គេពីអត្តពលិក ដែលទទួលរងនូវខមមិនអវិជ្ជមានពីក្នុងរង្វង់អ្នកគាំទ្រ Nadal ឆ្លើយថា សំណួរប្រភេទនេះ គឺពិបាកឆ្លើយណាស់។
«ចម្លើយដ៏ងាយសម្រាប់ខ្ញុំ គឺខ្ញុំសោកស្ដាយចំពោះអ្វី ដែលបានកើតឡើង ដោយនោះ មិនគួរកើតមានឡើយ។ តែទោះបីជាពាក្យមិនល្អ ដែលយើងមិនចង់ឮក៏ដោយ ក៏យើងត្រូវត្រៀមខ្លួនជាស្រេចសម្រាប់ពាក្យបែបនោះ មែនទេ?។ យើងត្រូវតែទ្រាំឱ្យបានជាមួយនឹងបញ្ហាបែបនេះ ដែលអាចកើតឡើង នៅពេលអ្នកធ្វើផ្ទុយពីមនុស្សទូទៅ»។ កីឡាករ Nadal បានប្រាប់ឱ្យដឹងបែបនេះ។
កីឡាករសញ្ជាតិអេស្ប៉ាញបន្ថែមថា៖ «ខ្ញុំយល់ថា ប្រហែលជា Naomi បានរងទុក្ខជាច្រើនជាមួយនឹងបញ្ហានោះ។ រឿងតែម្យ៉ាង គឺខ្ញុំសុំជូនពរឱ្យនាងបានជាសះស្បើយពីជំងឺនោះ ហើយក៏ជូនពរឱ្យនាងជួបនូវជោគជ័យផងដែរ។ តែជីវិតនេះ គ្មានអ្វីល្អឥតខ្ចោះនោះទេ ដូច្នេះយើងត្រូវត្រៀមខ្លួនសម្រាប់ការជួបនូវទុក្ខលំបាក»៕ AFP/VN
