ក្រុងវែរសៃយ៍: ប្រភពមួយពីតុលាការបានឱ្យដឹងកាលពីថ្ងៃអង្គារថា ការប្តឹងឧទ្ធរណ៍ពីខ្សែប្រយុទ្ធ Karim Benzema របស់ក្លិប Real Madrid ប្រឆាំងនឹងការកាត់ទោសឱ្យជាប់ពន្ធនាគាររយៈពេល ១ ឆ្នាំ ពីបទជាប់ពាក់ព័ន្ធនឹងរឿងក្ដីគំរាមទារប្រាក់ចំពោះអតីតមិត្តរួមក្រុមជម្រើសជាតិបារាំង Mathieu Valbuena ដោយប្រើវិដេអូសិចនោះ នឹងត្រូវបើកសវនាការនៅថ្ងៃទី ៣០ ខែមិថុនា ដល់ថ្ងៃទី ១ ខែកក្កដា។
Benzema ក៏ត្រូវពិន័យជាប្រាក់ ៧៥ ០០០ អឺរ៉ូ ($៨២ ០០០) ហើយការកាត់ទោស ពីបទប៉ុនប៉ងជំរិតទារប្រាក់ក្នុងឆ្នាំ ២០១៥ ដែលនាំឱ្យរូបគេ ត្រូវដកឈ្មោះចេញពីក្រុមបារាំងអស់រយៈពេល ៥ ឆ្នាំកន្លះនោះ គឺមានភាពតឹងរ៉ឹងជាងរដ្ឋអាជ្ញាបានស្នើឡើងទៅទៀត។
កីឡាករវ័យ ៣៤ ឆ្នាំ មិនត្រូវបានចោទពីការនៅក្រោយនៃការប៉ុនប៉ងជំរិតទារប្រាក់នោះទេ តែមានការឃុបឃិតជាមួយជនសង្ស័យ ដោយការដាក់សម្ពាធលើកីឡាករ Valbuena ដែលឱ្យព្រមបង់ប្រាក់ដល់ពួកគេ។
តុលាការនៅទីក្រុងវែរសៃយ៍នៅក្រៅក្រុងប៉ារីសបានសម្រេចថា ខ្សែប្រយុទ្ធរូបនេះ បានជាប់ពាក់ព័ន្ធដោយផ្ទាល់ តាមរយៈការប្រើវិធី និងពាក្យកុហក ដើម្បីបញ្ចុះបញ្ចូលមិត្តរួមក្រុមរបស់គេ នាពេលនោះ ឱ្យព្រមតាមការជំរិតទារប្រាក់នោះ។
Benzema ស៊ុត ២ គ្រាប់ ក្នុងជ័យជម្នះ ៣-០ ទល់នឹង Real Mallorca នៅក្របខ័ណ្ឌ La Liga កាលពីថ្ងៃចន្ទ ដែលធ្វើឱ្យគ្រាប់បាល់សរុប ក្នុងអាជីពរបស់គេមានចំនួន ៤១២ គ្រាប់ ដែលនាំឱ្យគេក្លាយជាកីឡាករបារាំង ដែលស៊ុតបញ្ចូលទីបានច្រើនជាងគេ ក្នុងប្រវត្តិសាស្ត្រ ពោលគឺច្រើនជាងអតីតកីឡាករ Thierry Henry ២ គ្រាប់។
កាលពីសប្ដាហ៍មុន គេធ្វើបានហ៊ែតទ្រិក (ស៊ុត ៣ គ្រាប់) ដើម្បីជួយឱ្យក្រុមយក្សអេស្ប៉ាញ Real ទម្លាក់ក្រុមអ្នកមានរបស់បារាំង Paris Saint-Germain ពីក្របខ័ណ្ឌ Champions League ក្នុងវគ្គ ១៦ ក្រុមចុងក្រោយ ជាមួយលទ្ធផលទាំង ២ ជើង ៣-២៕ AFP/VN