.jpg)
ក្រុងឡុងដ៍: លោក Thomas Tuchel បានលើកឡើងថា គាត់ចង់ឱ្យ Chelsea ក្លាយជាក្រុមមួយដែលគ្រប់គ្នា មានបំណងចៀសឱ្យផុតនៅក្របខ័ណ្ឌ Champions League បន្ទាប់ពីក្រុមតោខៀវរបស់លោកបន្តរក្សាផ្លូវនៃការការពារជើងឯករបស់ខ្លួនមិនឱ្យបាត់បង់ កាលពីថ្ងៃពុធ ដោយការបានឆ្លងទៅវគ្គ ៨ ក្រុមចុងក្រោយ ជាមួយជយជម្នះទាំង ២ ជើង ៤-១ លើក្រុម Lille។
ដោយនាំមុខ ២-០ ពីការប្រកួត ក្នុងជើងទី១ នៅឯកីឡដ្ឋាន Stamford Bridge កាលពី ៣ សប្ដាហ៍កន្លងទៅ ក្រុមរបស់លោក Tuchel ភ្លាត់តាមពីក្រោយ សម្រាប់ហ្គេមជើងទី២ នៅកីឡដ្ឋាន Pierre-Mauroy នេះ ដោយសារគ្រាប់បាល់របស់កីឡាករ Burak Yilmaz ដែលទាត់ប៉េណាល់ទីបានសម្រេច។
តែខ្សែប្រយុទ្ធ Christian Pulisic បានជួយឱ្យតាមស្មើវិញ ក្នុងម៉ោងបន្ថែមមានរបួស នៃវគ្គទី១ មុនពេលខ្សែការពារ Cesar Azpilicueta បានជួយបំពេញសព្វគ្រប់នូវការវាយបកនេះ ជាមួយនឹងការនៅសល់ ១៩ នាទីចុងក្រោយ ហើយគ្រូបង្វឹកបានធ្វើការសរសើរផងដែរ ចំពោះកីឡាករប្រធានក្រុមរូបនេះ ដែលគ្រាប់បាល់ នៅ Champions League លើកចុងក្រោយ ក៏កើតមានដោយការស៊ុតបញ្ចូលទីក្រុម Lille នេះដែរ កាលពីខែធ្នូ ឆ្នាំ ២០១៩។
គ្រូបង្វឹកសញ្ជាតិអាល្លឺម៉ង់ លោក Tuchel ប្រាប់ថា៖ «ខ្ញុំចង់ឱ្យយើងក្លាយជាក្រុម ដែលគ្មានអ្នកណាចង់លេងតទល់ជាមួយ។ នោះហើយជាកិច្ចការ ដែលយើងចង់ឃើញខ្លួនយើង ក្នុងវគ្គ ៨ ក្រុមចុងក្រោយនេះ។ Azpilicueta ប្រហែលជាគំរូដ៏ល្អឥតខ្ចោះ ដើម្បីយកមកពណ៌នាអំពីបុគ្គលម្នាក់ជាអ្នកដឹកនាំ។ រូបគេកំពុងធ្វើវា ទាំងក្នុងស្ថានភាពល្អ និងអាក្រក់ ទោះបីជាគេបានចូលលេងជម្រើសដំបូងយ៉ាងទៀងទាត់ ឬអត់ក៏ដោយ»។
«បើទោះបីជារូបគេកំពុងលេង នៅតំបន់ការពារស្លាប ដែលប្រហែលជា មិនមែនទីតាំងល្អបំផុតរបស់គេក៏ដោយ ក៏គេនៅតែឈរទីតាំងនោះ។ យើងមិនត្រូវការអ្វីបន្ថែមទៀតទេ ពោលគឺក្នុងកាលៈទេសៈនេះតែម្ដង ដោយយើងគ្រាន់តែត្រូវការក្រុមមួយដែលអាចទុកចិត្តបាន និងស្មារតី ដែលអាចទុកចិត្តបាន។ ខ្ញុំមិនដឹងថា តើគេកំពុងនិយាយអ្វីជាមួយកីឡាករ ឬអត់នោះទេ ខ្ញុំគ្រាន់តែដឹងថា គេកំពុងធ្វើអ្វីដែលគេតែងធ្វើជាប្រក្រតីធម្មតា»។ នេះជាការបន្ថែមរបស់លោក Tuchel៕ AFP/VN
