.jpg)
ទិដ្ឋភាពថតពីចំហៀងនៃពហុកីឡដ្ឋានជាតិមរតកតេជោរបស់កម្ពុជា ដែលទើបបានជាប់ចំណាត់ថ្នាក់លេខ ៦ ពិភពលោក។ ហុង មិនា
ភ្នំពេញៈ ពហុកីឡដ្ឋានជាតិមរតកតេជោរបស់កម្ពុជា ដែលត្រូវបានសាងសង់យ៉ាងទំនើបជាមួយបច្ចេកវិទ្យាចុងក្រោយរបស់ចិននោះ បានជាប់ចំណាត់ថ្នាក់លេខ ៦ នៅក្នុងចំណោមពហុកីឡដ្ឋានល្អផ្តាច់គេ ប្រចាំឆ្នាំ ២០២១ នៅលើពិភពលោក។
តាមរយៈការបោះឆ្នោត «ពហុកីឡដ្ឋានប្រចាំឆ្នាំ ២០២១ ឬ Stadium of The Year 2021» ដែលរៀបចំដោយគេហទំព័រ ដ៏ធំមួយលើពិភពលោកឈ្មោះថា Stadium DB នេះ បានបង្ហាញថា ពហុកីឡដ្ឋានជាតិមរតកតេជោរបស់កម្ពុជា ដែលបានចំណាយការសាងសង់អស់ប្រមាណ ១៥០ លានដុល្លារអាមេរិកនោះ បានជាប់ចំណាត់ថ្នាក់លេខ ៦ នៅក្នុងចំណោមពហុកីឡដ្ឋាន ទាំង ២៣ នៅលើពិភពលោក ដែលបានសម្រិតសម្រាំងយកមកធ្វើការបោះឆ្នោតនេះ។
ចំណែកពហុកីឡដ្ឋាន Estadio El Sadar របស់អេស្ប៉ាញបានជាប់ចំណាត់ថ្នាក់លេខ ១ រីឯលេខ ២ បានទៅពហុកីឡដ្ឋាន Unico Madre de Ciudades របស់ប្រទេសអាហ្សង់ទីន លេខ ៣ ពហុកីឡដ្ឋាន Banco Guayaquil របស់ប្រទេសអេក្វាទ័រ លេខ ៤ ជាពហុកីឡដ្ឋាន Stadionul Steaua របស់ប្រទេសរូម៉ានី រីឯលេខ ៥ គឺពហុកីឡដ្ឋាន Europa-Park Stadion របស់អាល្លឺម៉ង់ ចំណែកពហុកីឡដ្ឋាន Q2 Stadium របស់អាមេរិកបានជាប់លេខ ២៣ ក្រោយគេ។
យ៉ាងណាក៏ដោយ សម្រាប់ការពហុកីឡដ្ឋាន ដែលត្រូវបានជ្រើសរើសមកធ្វើការបោះឆ្នោតនេះ គឺសំដៅទៅលើតែពហុកីឡដ្ឋាន ដែលត្រូវបានសម្ពោធដាក់ឱ្យប្រើប្រាស់ជាផ្លូវការ នៅក្នុងឆ្នាំ ២០២១ ខណៈការបោះឆ្នោតរបស់គេហទំព័រ Stadium DB នេះ ទើបបានបញ្ចប់កាលពីថ្ងៃទី ១៤ ខែមីនា ឆ្នាំ ២០២២ នេះ។
គួរបញ្ជាក់ថា វិមានកីឡពហុកីឡដ្ឋានជាតិមរតកតេជោ បានសាងសង់លើទំហំផ្ទៃដីប្រមាណ ១៦,២២ ហិកតា ដោយមានទំហំសំណង់ប្រហែល ៨,២៤ ម៉ឺនម៉ែត្រការ៉េ គឺជាកីឡដ្ឋានខ្នាតធំ ដែលអាចផ្ទុកអ្នកទស្សនាបានរហូតដល់ ៦ ម៉ឺននាក់ ហើយពហុកីឡដ្ឋាននេះ ត្រូវបានសាងសង់ឡើង ដោយផ្តោតសំខាន់ទៅលើការរៀបចំការប្រកួតស៊ីហ្គេម ឆ្នាំ ២០២៣ គឺនៅពេលកម្ពុជា ត្រូវធ្វើម្ចាស់ផ្ទះជាលើកដំបូង៕
