ក្រុងឡុងដ៍: លោក Jurgen Klopp បានធ្វើការព្រមានចំពោះកីឡាកររបស់ក្រុមហង្សក្រហម Liverpool របស់គាត់ថា សម្ទុះ ឬថាមពលរបស់ពួកគេ ក្នុងការតាមប្រជែងពានរង្វាន់នៃក្របខ័ណ្ឌ Premier League គឺប្រៀបដូចជាផ្កាដ៏ងាយនឹងរុះរោយអ៊ីចឹង បន្ទាប់ពីដណ្ដើមបាននូវជ័យជម្នះដ៏សំខាន់ កាលពីថ្ងៃពុធ ក្នុងលទ្ធផល ២-០ នៅឯទឹកដីរបស់ក្រុម Arsenal។
ក្រុមរបស់លោក Klopp បានរំកិលទៅកៀកនឹងក្រុម នៅទីកំពូលតារាង Manchester City ជាមួយនឹងគម្លាតត្រឹមតែ ១ ពិន្ទុប៉ុណ្ណោះ ដោយសារគ្រាប់បាល់ ដែលស៊ុតបញ្ចូលទីដោយខ្សែប្រយុទ្ធទាំង ២ រូប Diogo Jota និង Roberto Firmino សម្រាប់ការប្រកួត នៅកីឡដ្ឋាន Emirates នេះ។
ការមានជ័យជម្នះ ក្នុងលីគ ៩ លើកជាប់ៗគ្នារបស់ក្រុម Liverpool ធ្វើឱ្យការកំណត់ជោគវាសនានៃការគ្រងជើងឯក ត្រូវធ្លាក់ក្នុងដៃរបស់ពួកគេ ខណៈដែលពួកគេ នឹងក្លាយជាម្ចាស់ពានរង្វាន់លីគកំពូល នារដូវកាលនេះ ប្រសិនបើឈ្នះការប្រកួតដែលនៅសល់ទាំង ៩ លើកក្នុងនោះរួមទាំងហ្គេមដ៏សំខាន់ ពេលត្រូវធ្វើដំណើរទៅកាន់ទីក្រុងមេនឆេស្ទ័រ នៅថ្ងៃទី ១០ ខែមេសាផងដែរ។
ខណៈពេលដែលក្រុម Man City បានភ្លាត់ស្នៀតលេងស្មើដោយគ្មានគ្រាប់បាល់នៅឯផ្ទះរបស់ក្រុម Crystal Palace កាលពីថ្ងៃចន្ទ ក្រុម Liverpool ឯណេះ មិនបានបន្ធូរបន្ថយនៃល្បឿនដ៏ល្អបំផុតរបស់ពួកគេនោះឡើយ ខណៈដែលពួកគេនៅទីបំផុត បានគេចផុតពីឧបសគ្គដ៏ធំ ដែលបង្កឡើងដោយក្រុម Arsenal នៅវគ្គទី១ ជាមួយនឹងការដណ្តើមបាន ៣ ពិន្ទុពេញ នៅវគ្គទី២។
តែទោះបីជាក្រុម Liverpool កំពុងស្ថិតក្នុងទម្រង់លេងយ៉ាងល្អឥតខ្ចោះ សម្រាប់ការប្រកួត ក្នុងលីគក៏ដោយ ក៏គ្រូបង្វឹករបស់ក្រុមហង្សក្រហមលោក Klopp មានការប្រុងប្រយ័ត្នចំពោះការមានការជឿជាក់ជ្រុលពេកលើសម្ទុះ ឬថាមពលរបស់ពួកគេនេះ។
«សម្ទុះ ឬថាមពល គឺប្រៀបដូចជាផ្កាដ៏ងាយនឹងរុះរោយបំផុតនៅលើផែនពសុធា (ផែនដី) នេះ។ ប្រសិនបើនរណាម្នាក់ដើរលើវា បន្ទាប់មកអ្នកត្រូវតែប្រឹងប្រែងទាញថាមពលមកវិញ ហើយឆ្លងកាត់វាឱ្យបាន»។ នេះជាការលើកឡើងពីអ្នកចាត់ការសញ្ជាតិអាល្លឺម៉ង់ លោក Klopp។
លោក Klopp បានបន្តថា៖ «ចង្វាក់ការលេង គឺល្អ តែចង្វាក់នេះ កំពុងលេងរៀងរាល់ ៤ ថ្ងៃ ៣ ថ្ងៃ វាជាចង្វាក់នៃការលេង តែវាជាចង្វាក់នៃការលេងដ៏តានតឹងមួយ។ យើងមិនបានត្អូញត្អែរទេ។ យើងចង់ចូលរួមនូវរាល់ការប្រកួត នៃគ្រប់កម្មវិធីទាំងអស់។ វាជារឿងប្រសើរ តែគូប្រជែង សុទ្ធតែមានគុណភាពទាំងអស់ ហើយពួកគេពិតជាមានភាពខុសប្លែកគ្នាទាំងអស់»។
ការប្រកួតប្រជែងដ៏កក្រើកជាមួយក្រុម Man City អាចធ្វើការកំណត់បានយ៉ាងច្បាស់លាស់ថា តើ Liverpool អាចលើកពានលីគកំពូលអង់គ្លេសជាលើកទី២ ក្នុងរយៈពេល ៣ រដូវកាល បានសម្រេច ឬយ៉ាងណា។ តែក្រុមយក្សនៅក្រុងលីវើភូល ដែលកំពុងប្រឹងឱ្យបានឈ្នះពាន ៤ មិនធ្លាប់មានពីមុន ត្រូវប្រឈមជាមួយក្រុម Nottingham Forest ក្នុងកម្មវិធី FA Cup វគ្គ ៨ ក្រុមចុងក្រោយ ក្នុងសប្ដាហ៍នេះ រួចបន្ទាប់មក ត្រូវបើកទ្វារផ្ទះស្វាគមន៍ Watford ភ្លាមៗ បន្ទាប់ពីសម្រាក សម្រាប់ការប្រកួតអន្តរជាតិ (ការប្រកួតរបស់ក្រុមជម្រើសជាតិ)។
ជាមួយគ្នានេះ លោក Klopp ក៏ឱ្យដឹងដែរថា លោកមិនបានសម្លឹងដល់ជំនួបជាមួយក្រុម Man City នៅឡើយនោះទេ ដោយលោកបានប្រាប់បន្ថែមថា៖ «ខ្ញុំពិតជាមិនបានគិតអ្វីច្រើនពីក្រុម Man City ទេ នោះគឺជាការពិត។ ខ្ញុំដឹងថា ឱកាសតែ ១ គត់ ដែលយើងមាន គឺឈ្នះនូវចំនួនហ្គេមបាល់ទាត់ដ៏មិនគួរឱ្យជឿនេះ ពីព្រោះគូប្រជែងរបស់យើង ឈ្នះការប្រកួតបាល់ទាត់ក្នុងចំនួនដ៏ច្រើនមិនគួរឱ្យជឿ»។
«ប៉ុន្មានឆ្នាំចុងក្រោយនេះ ពួកយើងបានក្លាយជាកម្លាំងជួយជំរុញគ្នាទៅវិញទៅមកដល់កម្រិតមិនគួរឱ្យជឿ។ យើងប្រកួតជាមួយក្រុម Man City ក្នុងរយៈពេល ៣ ឬ ៤ សប្តាហ៍ ហើយយើងនឹងផ្តល់ឱ្យពួកគេនូវការប្រកួតប្រជែងដ៏ត្រឹមត្រូវសមរម្យ។ យើងកំពុងស្ថិតក្នុងចង្វាក់ពេលវេលាល្អ អារម្មណ៍ល្អ តែយើងដឹងច្បាស់ថា វិធីតែ ១ គត់ ដែលយើងអាចធ្វើវាបាន គឺការប្រឹងឱ្យដល់ទីបំផុត»។ លោក Klopp បញ្ជាក់បន្ថែមចុងក្រោយ៕ AFP/VN