.jpg)
អ្នកគាំទ្ររបស់ Chelsea កំពុងមើលការប្រកួតទល់នឹង Newcastle។ AFP
ក្រុងឡុងដ៍: គ្រួសារត្រកូល Ricketts ដែលជាម្ចាស់ក្លិបបេសបល Chicago Cubs បានបញ្ជាក់ថា ពួកគេកំពុងដឹកនាំវិនិយោគិន ១ ក្រុម ដែលនឹងដេញថ្លៃទិញក្លិប Chelsea នៅក្របខ័ណ្ឌ Premier League របស់អង់គ្លេស ខណៈដែលអតីតអត្តពលិកដ៏ឆ្នើមរបស់ចក្រភពអង់គ្លេស Sebastian Coe បានប្រកាសពីការពាក់ព័ន្ធរបស់ខ្លួន ក្នុងកិច្ចប្រឹងប្រែងធ្វើជាគូប្រជែង ដើម្បីបានក្លាយជាម្ចាស់ក្រុមតោខៀវ។
ធនាគារពាណិជ្ជ Raine Group នៅក្រុងញូវយ៉ក បានកំណត់ថ្ងៃផុតកំណត់ នាថ្ងៃសុក្រនេះ សម្រាប់ការដេញថ្លៃ ដោយការគ្រប់គ្រងរយៈពេល ១៩ ឆ្នាំ អមដោយការឈ្នះពានជាច្រើនរបស់លោក Roman Abramovich ក្នុងនាមជាម្ចាស់ក្លិប នៅកីឡដ្ឋាន Stamford Bridge នឹងឈានដល់ទីបញ្ចប់ហើយ។
«គ្រួសារត្រកូល Ricketts ដែលជាម្ចាស់នៃក្រុម Chicago Cubs នៅក្របខ័ណ្ឌ Major League Baseball អាចបញ្ជាក់ថា ពួកគេនឹងដឹកនាំក្រុមវិនិយោគទុន ដែលនឹងធ្វើការដេញថ្លៃជាផ្លូវការក្នុងការទិញយកក្លិបបាល់ទាត់ Chelsea នាថ្ងៃសុក្រនេះ»។ នេះជាការឱ្យដឹងក្នុងសេចក្ដីប្រកាសដែលត្រូវបានរាយការណ៍យ៉ាងទូលំទូលាយ។
សេចក្ដីប្រកាសឱ្យដឹងទៀតថា៖ «ក្នុងនាមជាប្រតិបត្តិករក្នុងរយៈពេលយ៉ាងយូរនៃក្រុមកីឡាអាជីពដ៏ល្បីល្បាញ ១ គ្រួសារត្រកូល Ricketts និងដៃគូរបស់ពួកគេ យល់ច្បាស់ពីសារៈសំខាន់ នៃការវិនិយោគ ដើម្បីទទួលបានភាពជោគជ័យ នៅលើទីលាន ខណៈពេលដែលមានការគោរពចំពោះប្រពៃណីទំនៀមទម្លាប់របស់ក្លិប អ្នកគាំទ្រ និងសហគមន៍»។
គ្រួសារត្រកូល Ricketts បានទិញយកក្លិបបេសបល Chicago Cubs ក្នុងឆ្នាំ ២០០៩ និងបានធ្វើពិធីឆ្លងអបអរនឹងជ័យជម្នះពានរង្វាន់ World Series ក្នុងឆ្នាំ ២០១៦ ដោយបានបញ្ចប់នូវការរង់ចាំរយៈពេល ១០៨ ឆ្នាំ ក្នុងការបានឈ្នះពានរង្វាន់ដ៏សំខាន់មួយ។
លោក Coe ដែលឥឡូវនេះ ជាប្រធានស្ថាប័នគ្រប់គ្រងកីឡាអត្តពលកម្មពិភពលោកបាននិយាយកាលពីថ្ងៃពុធថា គាត់បានចូលរួមជាមួយអ្នកជំនួញជនជាតិអង់គ្លេស Martin Broughton ដើម្បីដេញថ្លៃទិញយកក្លិប Chelsea នេះដែរ។
លោក Coe ដែលជាកម្លាំងជំរុញនៅពីក្រោយការដេញថ្លៃជោគជ័យរបស់ទីក្រុងឡុងដ៍ ដើម្បីបានសិទ្ធិរៀបចំកីឡាអូឡាំពិក ឆ្នាំ ២០១២ បាននិយាយថា អតីតនាយកក្លិប Liverpool លោក Broughton គឺជាបុគ្គលដ៏ស័ក្ដិសមក្នុងការមកដឹកនាំ Chelsea ទៅកាន់ដំណាក់កាលបន្ទាប់ ដោយយោងទៅដល់កំណត់ត្រាអាជីវកម្ម និងបទពិសោធពិសេសរបស់គាត់នៅទឹកដី Anfield៕ AFP/VN
