ក្រុងមីដលប្រូស៍: លោក Thomas Tuchel បានធ្វើការកោតសរសើរចំពោះការផ្តោតអារម្មណ៍របស់ក្រុម Chelsea ខណៈដែលពួកគេបានឈានដល់វគ្គពាក់កណ្តាលផ្តាច់ព្រ័ត្រ នៃកម្មវិធីអេហ្វអេខាប់ (FA Cup) ជាលើកទី៣ រដូវកាលបន្តបន្ទាប់គ្នា បន្ទាប់ពី ១ គ្រាប់របស់កីឡាករ Romelu Lukaku បានរួមចំណែកយ៉ាងសំខាន់ ក្នុងការជួយជំរុញឱ្យក្រុមតោខៀវ មានជ័យជម្នះ ២-០ លើក្រុម Middlesbrough (Boro) នៅក្របខ័ណ្ឌ Championship កាលពីថ្ងៃសៅរ៍។
នៅក្នុងអ្វី ដែលអាចជាការខកចិត្ត នាពេលខាងមុខនោះ ក្រុមរបស់លោក Tuchel ហាក់មិនបានបង្ហាញឱ្យឃើញនូវការមានបញ្ហាឡើយ ខណៈដែលពួកគេបានប្រកួតឈ្នះជាបន្តបន្ទាប់រហូតដល់ ៦ លើក ចាប់តាំងពីលោក Roman Abramovich ដាក់លក់ក្លិបជើងឯករបស់អឺរ៉ុបមួយនេះ។
ខ្សែប្រយុទ្ធសញ្ជាតិបែលហ្ស៊ិក Lukaku ដែលកំពុងជួបបញ្ហា បានស៊ុតបញ្ចូលទីគ្រាប់បើកឆាក ដែលនេះទើបតែជារកបានគ្រាប់បាល់ទី២ របស់គេក្នុងចំណោម ៧ ហ្គេម ខណៈដែលខ្សែបម្រើ Hakim Ziyech បានបន្ថែមការមានប្រៀបសម្រាប់ក្រុម Chelsea មុនចប់វគ្គទី១ នៃការប្រកួតនៅកីឡដ្ឋាន Riverside នេះ។
ក្រុមតោខៀវបានសម្លាប់ (បញ្ចប់) ហ្គេម នៅវគ្គ ១/៤ ផ្តាច់ព្រ័ត្រនេះ ជាមួយនឹងការមានបញ្ហាអប្បបរមា (តិចតួចបំផុត) ដោយការធានានូវសិទ្ធិ ក្នុងការទៅបង្ហាញខ្លួន នៅវគ្គ ៤ ក្រុមចុងក្រោយ ក្នុងពហុកីឡដ្ឋាន Wembley នាខែមេសា ខណៈពួកគេឡើងដល់វគ្គផ្តាច់ព្រ័ត្រចំនួន ៣ ឆ្នាំ ជាប់ៗគ្នា។
Chelsea កំពុងដំណើរការក្រោមអាជ្ញាប័ណ្ណពិសេស ដែលអនុញ្ញាតឱ្យពួកគេអាចបញ្ចប់សព្វគ្រប់នូវកាលវិភាគប្រកួត បន្ទាប់ពីមានការដាក់ទណ្ឌកម្មរបស់រដ្ឋាភិបាលចក្រភពអង់គ្លេសចំពោះលោក Abramovich ដើម្បីឆ្លើយតបការឈ្លានពានរបស់រុស្ស៊ីលើប្រទេសអ៊ុយក្រែន។
ក្រុមអ្នកដេញថ្លៃជាច្រើន បានដាក់នូវសំណើរបស់ពួកគេ ក្នុងការទិញយកក្លិប Chelsea ពីលោក Abramovich មុនថ្ងៃកំណត់ កាលពីថ្ងៃសុក្រ ដែលជាការផ្ដល់នូវក្ដីសង្ឃឹមថា ស្ថានការណ៍លំបាកលំបិនរបស់ពួកគេ នាពេលបច្ចុប្បន្ននេះ នឹងរលាយបាត់ឆាប់ៗ។ លោក Tuchel សារភាពថា គាត់ស្ថិតនៅក្រៅរង្វង់ នៃការលក់ដូរនោះ តែអ្នកចាត់ការសញ្ជាតិអាល្លឺម៉ង់ បានធ្វើឱ្យកីឡាកររបស់ក្រុម Chelsea មានការយក-ចិត្តទុកដាក់ចំពោះភាពច្របូកច្របល់ នៅក្រៅទីលានយ៉ាងគួរឱ្យស្ងើច។
Chelsea ដែលឈរនៅលេខ៣ ក្នុងក្របខ័ណ្ឌ Premier League និងបានឆ្លងទៅវគ្គ ៨ ក្រុម នៅក្របខ័ណ្ឌ Champions League នោះ បានឈ្នះដល់ទៅ ១២ លើក ក្នុងចំណោមការប្រកួត ១៣លើកកន្លងមករបស់ពួកគេ ដោយលើកលែងតែការចាញ់ម្ដងគត់ ក្នុងវគ្គទាត់បាល់ប៉េណាល់ទីកាត់ក្ដី ក្នុងកម្មវិធី League Cup ពេលតទល់នឹងក្រុមហង្សក្រហម Liverpool។
«យើងបានផ្តោតអារម្មណ៍ខ្លាំងណាស់ និងប្រាកដប្រជាយ៉ាងខ្លាំង តាំងពីដើមដំបូង។ យើងបានបង្ហាញឱ្យឃើញនូវ គុណភាព ក្នុងពេលវេលាកំណត់ និងស៊ុតបញ្ចូលទី ២ គ្រាប់យ៉ាងលឿន ដែលផ្ដល់ឱ្យពួកយើងនូវការនាំមុខយ៉ាងស្រួលៗ តែការខិតខំនេះ គឺធំធេងណាស់ ដែលមិនបណ្ដោយឱ្យមានឱកាសធំ សម្រាប់ក្រុមគេ»។ លោក Tuchel បានលើកឡើង។
លោក Tuchel បន្ថែមថា៖ «ខ្ញុំពេញចិត្តចំពោះការផ្ចង់ស្មារតីរបស់កីឡាករ។ យើងទទួលយកស្ថានភាពរបស់អ្នកគ្រប់គ្រង ព្រោះយើងមិនបានបង្កឱ្យមានហេតុការណ៍នោះទេ។ វាមិនស្ថិតនៅក្នុងដៃ (តួនាទី) របស់យើង តែវាសំខាន់ណាស់ ដែលយើងបង្ហាញពីស្មារតីដ៏ត្រឹមត្រូវសមរម្យ និងការទទួលខុសត្រូវ»៕ AFP/VN