.jpg)
កីឡាកររបស់ Arsenal ធ្វើការអបអរ ក្រោយចប់ការប្រកួត ទល់នឹង Villa ។ AFP
ក្រុងប៊ឺមិងហេម: ក្រុមកាំភ្លើងធំ Arsenal បានបោះជំហានយ៉ាងធំមួយទៀតឆ្ពោះទៅរកការបានបញ្ចប់នូវការនិរទេសខ្លួនរយៈពេល ៥ ឆ្នាំ ពីការប្រកួតប្រជែងនៅក្របខ័ណ្ឌ Champions League ដោយសារគ្រាប់បាល់ត្រឹមតែ ១ គ្រាប់របស់ខ្សែបម្រើប្រយុទ្ធ Bukayo Saka បានជួយឱ្យមានជ័យជម្នះ ១-០ លើក្រុមម្ចាស់ផ្ទះ Aston Villa ដែលជាលទ្ធផល នាំឱ្យមានគម្លាត ៤ ពិន្ទុ ជាមួយនឹងការឈរ នៅចំណាត់ថ្នាក់លេខ ៤ ក្នុងតារាងពិន្ទុនៃក្របខ័ណ្ឌ Premier League។
ក្រុមកាំភ្លើងធំ អាចបង្កើនគម្លាតនោះឱ្យកាន់តែឆ្ងាយបន្ថែមទៀតជាមួយនឹងការប្រកួត នៅសល់ ១ លើកក្នុងដៃ លើក្រុមចំណាត់ថ្នាក់លេខ ៥ Manchester United ហើយស័ក្តិសមជាមួយនឹងការបាន ៣ ពិន្ទុ សម្រាប់ការប្រកួតទល់នឹងក្រុមមិនសូវមុតស្រួច Villa នេះ បើទោះបីជាឈ្នះជាមួយនឹងគ្រាប់បាល់ប្រផុតប្រផើយនេះក្ដី។
លោក Mikel Arteta គ្រូបង្វឹករបស់ក្រុម Arsenal បាននិយាយថា៖ «យើងមានការប្រកួតចំនួន ១០ លើកទៀតដែលនៅសល់។ យើងមានអារម្មណ៍នេះ ដែលយើងពិតជាចង់បានខ្លាំងណាស់ អ្នកអាចយល់បាន ហើយយើងនឹងប្រឹងប្រែងបន្តឱ្យមានវាទៀត»។
ដំណើរនៃជ័យជម្នះចំនួន ១០ លើក ពីការប្រកួតចំនួន ១៣ លើក ចុងក្រោយ នៅលីគរបស់ពួកគេ បានជួយជំរុញឱ្យក្រុមរបស់លោក Arteta ឡើងទៅឈរ នៅជួរមុខក្នុងការប្រកួតប្រជែង ដោយការបានចូលរួមជាមួយក្រុមមេឃខៀវ Manchester City, ក្រុមហង្សក្រហម Liverpool និងក្រុមតោខៀវ Chelsea នៅទីកំពូលទាំង ៤ បន្ទាប់ពីមាននូវការចាប់ផ្តើមដ៏អាក្រក់បំផុត នៃរដូវកាលនេះរបស់ពួកគេ ក្នុងរយៈពេល ៦៧ ឆ្នាំ។
លោក Arteta បានត្អូញត្អែរអំពីការកែប្រែដ៏តឹងចង្អៀត ដែលក្រុមរបស់លោកបានប្រឈម បន្ទាប់ពីរងបរាជ័យ នៅក្នុងផ្ទះខ្លួន ២-០ កាលពីថ្ងៃពុធ ក្រោមថ្វីជើងរបស់ក្រុម Liverpool តែគ្មានសញ្ញាណាមួយ ដែលបង្ហាញនូវការនឿយហត់ពីកូនក្រុមក្មេងៗរបស់លោកឡើយ កាលពីថ្ងៃសៅរ៍ ខណៈដែលពួកគេ អាចទម្លុះសំណាញ់ទីរបស់ក្រុម Villa បាន នៅ ៤៥ នាទីដំបូង។
គ្រូបង្វឹករបស់ក្រុមម្ចាស់ផ្ទះ Villa លោក Steven Gerrard បាននិយាយថា៖ «វាមានភាពតឹងតែងមែនទែន នៅវគ្គទី១ ដោយសារពួកយើងបានបណ្ដោយឱ្យវាមានភាពតានតឹងដោយខ្លួនឯង។ ទម្រង់លេងរបស់យើង ខ្វះនូវភាពជឿជាក់។ វានៅមិនទាន់ដល់ពាក់កណ្តាលម៉ោងទេ យើងបានបង្ហាញថា យើងអាចប្រសើរជាង ក្នុងការប្រកួតនេះ»។
ជាមួយគ្នាដែរនេះ សម្រាប់ក្រុមភ្ញៀវ ខ្សែបម្រើ Emile Smith Rowe បានវិលមកមានឈ្មោះ នៅក្នុងចំណោមកីឡាករជម្រើសដំបូងវិញ ជាម្នាក់ក្នុងចំណោមកីឡាករ ២ រូប ដែលត្រូវបានផ្លាស់ប្ដូរ ខណៈខ្សែប្រយុទ្ធ Gabriel Martinelli និងអ្នកចាំទី Aaron Ramsdale ត្រូវអវត្តមាន ដោយសារមានជំងឺ និងរបួសរៀងៗខ្លួន៕ AFP/VN
