ក្រុងប្រ៊ីសប៊េន: នាង Ashleigh Barty បាននិយាយ កាលពីថ្ងៃព្រហស្បតិ៍ថា នាងនឹងដកខ្លួនពីតារាងចំណាត់ថ្នាក់ WTA (សហព័ន្ធកីឡាវាយកូនបាល់ផ្នែកនារី) បន្ទាប់ពីប្រកាសការចូលនិវត្តន៍របស់នាង ដោយនេះ នឹងបើកផ្លូវឱ្យកីឡាការិនីសញ្ជាតិប៉ូឡូញ Iga Swiatek ក្លាយជាកីឡាការិនីលេខ ១ ពិភពលោក។
កីឡាការិនីសញ្ជាតិអូស្ត្រាលី Barty ដែលបានឈ្នះពានលំដាប់ Grand Slam ៣ សម័យកាល បានកាន់កាប់តំណែងលេខ ១ អស់រយៈពេលជាង ២ ឆ្នាំ តែបានធ្វើឱ្យពិភពកីឡាវាយកូនបាល់ (តិន្នីស) មានការភ្ញាក់ផ្អើលយ៉ាងខ្លាំង កាលពីថ្ងៃពុធ ដោយការទម្លាក់ដងរ៉ាកែតចុះ (ឈប់លេង) ក្នុងវ័យត្រឹមតែ ២៥ ឆ្នាំប៉ុណ្ណោះ។
កីឡាការិនី Swiatek វ័យ ២០ ឆ្នាំ មានគម្លាតយ៉ាងធំដល់ទៅ ២ ២០៤ ពិន្ទុ តាមពីក្រោយកីឡាករ Barty តែនឹងមានកីឡាការិនីលេខ ១ ថ្មីរបស់ពិភពលោក នៅថ្ងៃចន្ទនេះ នៅពេលដែលបញ្ជីចំណាត់ថ្នាក់ថ្មី ត្រូវចេញ ហើយអ្នកឈរនៅលេខ ២ ស្ថិតក្នុងទីតាំង ដែលមានអាទិភាពចម្បង។
កីឡាការិនី Swiatek ដែលទទួលបានភាពល្បីល្បាញ ដោយការឈ្នះពានរង្វាន់ក្នុងកម្មវិធី French Open 2020 និងដែលបានបង្ហាញនូវទម្រង់លេងយ៉ាងនឹងនរគួរឱ្យកត់សម្គាល់នោះ បានប្រាប់អ្នកសារព័ត៌មាន នៅឯកម្មវិធី Miami Open ថា នាងកំពុងព្យាយាមមិនគិតពីវា (រឿងចំណាត់ថ្នាក់) ច្រើនពេកទេ។
«ពួកគេបាននិយាយថា ខ្ញុំប្រហែលជាអាចនឹងក្លាយជាអ្នកលេខ ១ ពិភពលោក។ និយាយតាមត្រង់ នៅពេលដែលយើងពិតជា គិតពីស្ថានភាព និងនៅពេលដែលយើងអានគ្រប់ព័ត៌មានទាំងអស់ ច្បាប់គ្រប់យ៉ាងទាំងអស់ ដែលអាចនឹងមានការពាក់ព័ន្ធនោះ យើងបានដឹងថា ដោយជាក់ស្ដែង វាមិនមានន័យអ្វី ក្នុងការគិតអំពីវា នាពេលនេះទេ ព្រោះយើងមានពេលខ្លីណាស់ ដើម្បីត្រៀមខ្លួន សម្រាប់ការប្រកួតផ្សេងទៀត»។ នេះជាសម្ដីរបស់កីឡាការិនី Swiatek។
បច្ចុប្បន្ន កីឡាការិនី Swiatek កំពុងនាំមុខដាច់ ៦៩១ ពិន្ទុ លើកីឡាការិនីលំដាប់ទី៣ Maria Sakkari របស់ប្រទេសក្រិក ក្រោយពីបានលើកពាន ក្នុងកម្មវិធី Indian Wells កាលពីសប្តាហ៍មុន ដែលជាពានទី២ របស់នាង ក្នុងការប្រកួតប្រជែងជាច្រើន បន្ទាប់ពីជោគជ័យរបស់នាងនៅទីក្រុងដូហា កាលពីខែកុម្ភៈ៕ AFP/VN