.jpg)
Pauline Peyraud-Magnin (ឆ្វេង) របស់ Juve លោតដោលបាល់ ក្នុងហ្គេម ទល់នឹង Lyon។ AFP
ក្រុងប៉ារីស: កីឡាការិនីបម្រុង Agnese Bonfantini ជួយជំរុញឱ្យក្រុមនារី Juventus មានជ័យជម្នះ ២-១ លើក្រុមនារី Lyon សម្រាប់ការប្រកួតជើងទី១ នៃក្របខ័ណ្ឌ Champions League វគ្គ ៨ ក្រុមចុងក្រោយ កាលពីថ្ងៃពុធ ខណៈដែលក្រុមនារីកាំភ្លើងធំ Arsenal ត្រូវការគ្រាប់បាល់ នៅដង្ហើមចុងក្រោយ ដើម្បីបានស្មើ ១-១ ក្នុងផ្ទះឯង ជាមួយនឹងក្រុមនារី Wolfsburg។
ក្រុមម្ចាស់ជើងឯកនៅអឺរ៉ុប ៧ សម័យកាល Lyon គឺជាអ្នកមានគ្រាប់បាល់នាំមុខមុន សម្រាប់ការប្រកួត ក្នុងទីក្រុងទូរីន (Turin) តាមរយៈគ្រាប់បាល់ ដែលធ្វើបានសម្រេចដោយការតែតរបស់ខ្សែប្រយុទ្ធសញ្ជាតិប្រេស៊ីល Catarina Macario ហើយជាក្រុម ដែលត្រូវបានចាត់ទុកថា មានសិទ្ធិខ្ពស់ជាងគេ ក្នុងការលើកពាននេះ ខណៈដែលពួកគេបានគ្រប់គ្រងស្ទើរទាំងស្រុង នៅដើមដំបូងនៃការប្រកួត។
តែក្រុមដ៏មានឥទ្ធិពលទៅពីបារាំងមួយនេះ ត្រូវលេងត្រឹមតែគ្នា ១០ នាក់ ក្រោយការប្រកួតដំណើរការទៅបាន ១ ម៉ោង និង ២ នាទី ពេលកីឡាការិនី Ellie Carpenter ត្រូវបានពិន័យកាតក្រហម។
ដោយទើបតែបានកកើត កាលពី ៥ ឆ្នាំមុន ក្រុមនារីរបស់អ៊ីតាលីនេះ មិនធ្លាប់មានមុខក្នុងដំណាក់កាលនៃក្របខ័ណ្ឌ Champions League នោះឡើយ តែក្រុមអ្នកគាំទ្រដ៏រស់រវើក ដែលមានវត្តមាននៅក្នុងកីឡដ្ឋាន Juventus ជួយជំរុញឱ្យពួកគេបន្តដំណើរទៅមុខ។
ការបញ្ចប់ទីយ៉ាងពេញកម្លាំង បានធានាឱ្យមានគ្រាប់បាល់ស្មើគ្នា ពេលខ្សែប្រយុទ្ធ Cristiana Girelli មានឱកាសទម្លុះសំណាញ់ទី ដោយការទាត់បាល់ ដែលរបូតពីអ្នកចាំទី Sarah Bouhaddi នៅនាទីទី៧១ មុនការស៊ុតដ៏ស្អាតពីកីឡាការរិនី Bonfantini នៅនាទីទី៨១ បានជួយផ្ដល់ឱ្យក្រុម Juve នូវជោគជ័យនាយប់នោះ។
«Lyon គឺជាក្រុមល្អបំផុតក្នុងលោក ទាំងផ្នែកបច្ចេកទេសផ្ទាល់ខ្លួនរបស់អ្នកលេង និងទាំងផ្នែកការលេងជាក្រុម។ ការពិន័យកាតក្រហមនោះ នាំឱ្យពួកយើងមានប្រៀប តែខ្ញុំឃើញសញ្ញានោះរួចហើយ ដោយយើងចាប់ផ្ដើមទាញយកប្រយោជន៍ នៃការប្រើចន្លោះទំនេរបានល្អ»។ នេះជាការលើកឡើងរបស់គ្រូបង្វឹកក្រុមនារី Juve លោក Joe Montemurro។
នៅឯកីឡដ្ឋាន Emirates ក្នុងក្រុងឡុងដ៍ កីឡាការិនី Tabea Wassmuth បានជួយឱ្យក្រុម Wolfsburg នាំមុខក្រុម Arsenal នៅនាទីទី១៩ ដោយការតែតនូវគ្រាប់បាល់ ដែលលើកចូលតំបន់គ្រោះថ្នាក់ពីខ្សែការពារ Maria-Joelle Wedemeyer។ នោះជាគ្រាប់បាល់ទី៩ របស់នាង ហើយក៏ជាគ្រាប់បាល់ នាំឱ្យកីឡាការិនីសញ្ជាតិអាល្លឺម៉ង់ បន្តឈរលើគេក្នុងតារាងអ្នករកគ្រាប់បាល់បានច្រើនជាងគេបំផុត នៃកម្មវិធីនេះ។
ក្រុមម្ចាស់ផ្ទះ Arsenal ដែលព្យាយាមសម្រុកម្ដងហើយម្ដងទៀត ដើម្បីបានគ្រាប់បាល់ស្មើវិញនោះ ចុងក្រោយក៏ទទួលបានផល ពេលដែលខ្សែការពារ Lotte Wubben-Moy បំប៉ោងសំណាញ់ទីបានសម្រេច នៅនាទីទី៨៩ ដោយការរត់ទៅទាក់បាល់ ពីការទាត់ហ្វ្រ៊ីឃិករបស់កីឡាការិនីសញ្ជាតិអាមេរិក Tobin Heath។
«វាជាការបញ្ចប់ទីល្អណាស់ ពោលគឺជាពេលវេលាពិសេសណាស់ សម្រាប់រូបនាង ដែលមកកីឡដ្ឋាននេះ ហើយស៊ុតបញ្ចូលទីនូវគ្រាប់បាល់សំខាន់ដូចនេះ»។ នេះជាការលើកឡើងពីអ្នកចាត់ការក្រុម Arsenal លោក Jonas Eidevall ដែលសរសើរកីឡាការិនី Wubben-Moy ដែលជាសមិទ្ធផលយកចេញពីក្រុមយុវជន៕ AFP/VN
