ក្រុងឡុងដ៍: អ្នកគាំទ្រក្រុម Chelsea នឹងអាចចូលរួមមើលការប្រកួត នៅក្របខ័ណ្ឌ Champions League និងកម្មវិធី FA Cup សម្រាប់រដូវកាលនៅសល់ ក្រោមលក្ខខណ្ឌ នៃអាជ្ញាប័ណ្ណថ្មី ដែលត្រូវបានផ្តល់ដល់ក្លិប ដោយរដ្ឋាភិបាលចក្រភពអង់គ្លេស។
ក្លិបជើងឯកអឺរ៉ុប បានទទួលរងនូវការរឹតបន្តឹងជាបន្តបន្ទាប់ តាំងពីម្ចាស់ក្លិបលោក Roman Abramovich ត្រូវបានរដ្ឋាភិបាលអង់គ្លេសដាក់ទណ្ឌកម្ម ដោយចោទថា គាត់មានទំនាក់ទំនងជាមួយប្រធានាធិបតីរុស្ស៊ីលោក Vladimir Putin។ ក្នុងចំណោមការរឹតបន្តឹងនោះ គឺការហាមឃាត់លើការលក់សំបុត្រ ដែលមិនត្រូវបានទិញ នៅមុនមានការដាក់ទណ្ឌកម្ម នាថ្ងៃទី ១០ ខែមីនា។
Chelsea ត្រូវធ្វើជាម្ចាស់ផ្ទះទទួលក្រុម Real Madrid សម្រាប់ជំនួបជើងទី១ នៃការប្រកួតនៅ Champions League វគ្គ ៨ ក្រុមចុងក្រោយ នៅថ្ងៃទី ៦ ខែមេសា និងប៉ះក្រុម Crystal Palace ក្នុង ៤ ក្រុមចុងក្រោយ នៅ FA Cup នាថ្ងៃទី ១៧ ខែមេសា ក្នុងពហុកីឡដ្ឋាន Wembley។
អាជ្ញាប័ណ្ណថ្មីនេះ អនុញ្ញាតឱ្យមានការលក់សំបុត្រ សម្រាប់ការប្រកួតទាំងនោះ និងហ្គេមនានាបន្ថែមទៀត ទាំងនៅ Champions League, FA Cup ឬក៏ Women''s Super League (ការប្រកួតរបស់នារី) ដោយប្រាក់បានពីការប្រកួតនោះ នឹងត្រូវផ្ដល់ឱ្យអ្នករៀបចំការប្រកួតដែលពាក់ព័ន្ធ។
ជាមួយគ្នានេះ អ្នកហែហមរបស់ក្រុមតោខៀវ នឹងអាចទិញផងដែរចំពោះសំបុត្រ សម្រាប់ហ្គេម នៅក្រៅផ្ទះ ក្នុងក្របខ័ណ្ឌ Premier League និងលក់សំបុត្រឱ្យអ្នកគាំទ្ររបស់ក្រុមភ្ញៀវ សម្រាប់ហ្គេមលីគ ក្នុងផ្ទះរបស់ខ្លួន តែក្លិបនៅមិនត្រូវបានអនុញ្ញាតឱ្យលក់សំបុត្រថ្មីដល់អ្នកគាំទ្រក្នុងទឹកដីសម្រាប់ការប្រកួតក្នុងលីគឡើយ។
«ថ្ងៃនេះ រដ្ឋាភិបាលបានផ្លាស់ប្តូរអាជ្ញាប័ណ្ណ សម្រាប់ក្លិបបាល់ទាត់ Chelsea ដើម្បីអាចអនុញ្ញាតឱ្យអ្នកគាំទ្រ ទិញសំបុត្រចូលមើលការប្រកួត នៅក្រៅទឹកដី ដូចជាហ្គេមនៅខាប់ និងការប្រកួតផ្នែកនារី»។ នេះជាការឱ្យដឹងពីសំណាក់រដ្ឋមន្ត្រីកីឡារបស់ចក្រភពអង់គ្លេសលោក Nigel Huddleston។
លោករដ្ឋមន្ត្រីរូបនោះ បានបន្ថែមថា៖ «ចាប់តាំងពីលោក Abramovich ត្រូវដាក់បញ្ចូលទៅក្នុងបញ្ជីទណ្ឌកម្មរបស់ចក្រភពអង់គ្លេស ដោយសារទំនាក់ទំនងរបស់គាត់ជាមួយលោក Putin យើងបានប្រឹងប្រែងយ៉ាងខ្លាំងក្លា ដើម្បីធានាបានថា ក្លិបអាចបន្តការប្រកួតបាល់ទាត់របស់ខ្លួនបាន»។
ក្រុមហ៊ុនមេ Fordstam Limited របស់ Chelsea ក៏ត្រូវបានអនុញ្ញាតដែរឱ្យបញ្ចេញទឹកប្រាក់ដល់ទៅ ៣០ លានផោន ($៣៩ លាន) ទៅក្លិប ដើម្បីបំពេញតម្រូវការហិរញ្ញវត្ថុ រហូតដល់បញ្ចប់រដូវកាលនេះ។
កាលពីរដូវកាលមុន ក្រុម Chelsea មានវិក្កយបត្រប្រាក់ឈ្នួលចំនួន ២៨ លានផោន (ជិត $៣៧ លាន) ក្នុង ១ ខែ ហើយទីប្រឹក្សាផ្នែកបច្ចេកទេស បានព្រមានថា ក្លិបប្រហែលជាមិនអាចទប់ដល់ចប់រដូវកាលបានឡើយ៕ AFP/VN