ក្រុងអាំស្ទែរដាំ: កីឡាករ Christian Eriksen បានស៊ុតបញ្ចូលទី នៅថ្ងៃដែលរូបគេត្រឡប់មកលេងការប្រកួតបាល់ទាត់អន្តរជាតិវិញ បន្ទាប់ពីកើតមានអាការគាំងបេះដូង កាលពីឆ្នាំមុន ក្នុងជំនួបមិត្តភាព ដែលក្រុមជម្រើសជាតិដាណឺម៉ាករបស់គេ បានចាញ់ក្រុមម្ចាស់ផ្ទះហូឡង់ ៤-២ កាលពីថ្ងៃសៅរ៍។
មិនតិចជាង ៩ ខែ ពោលគឺ ២៨៧ ថ្ងៃ បន្ទាប់ពីការដួលសន្លប់នៅឯព្រឹត្តិការណ៍ Euro 2020 កីឡាករ Eriksen បានបង្រួញឱ្យមានការត្រឡប់មកវិញដ៏គួរឱ្យកត់សម្គាល់ នៅឯកីឡដ្ឋាន Johan Cruyff Arena ក្នុងទីក្រុងអាំស្ទែរដាំ។
ដោយមានការទះដៃយ៉ាងខ្លាំងពីសំណាក់អ្នកគាំទ្រ និងអ្នកចាត់ការរបស់ក្រុមហូឡង់ លោក Louis van Gaal នៅពេលរូបគេចុះពីកៅអីកីឡាករបម្រុង កីឡាករ Eriksen បានលើកដៃចង្អុលទៅលើមេឃ ក្នុងន័យធ្វើការអរគុណដល់សំឡេងគាំទ្រ និងការបានវិលមកកាន់ទីលាន ក្នុងឯកសណ្ឋានរបស់ក្រុមជម្រើសជាតិវិញ។
២ នាទី បន្ទាប់ពីត្រូវបានដូរចូលក្នុងតង់ទី២ ខ្សែបម្រើរបស់ក្រុម Brentford ក្រោយមក បានស៊ុតបាល់បញ្ចូលទីយ៉ាងអស្ចារ្យជាមួយនឹងការទាត់យ៉ាងពេញកម្លាំង ដែលនោះជាគ្រាប់ទី៣៧ របស់គេជាមួយក្រុមដាណឺម៉ាក ក្នុងការបង្ហាញខ្លួន ១១០ ដង ហើយគ្រាប់បាល់នោះ ធ្វើឱ្យរូបគេសប្បាយចិត្តជាខ្លាំង ដែលអាចជួយបន្ថយការនាំមុខរបស់ក្រុមហូឡង់មក ៣-២។
កីឡាករ Eriksen បានប្រាប់ទូរទស្សន៍នៅហូឡង់ថា៖ «ខ្ញុំរីករាយក្នុងការបង្ហាញថា ខ្ញុំនៅតែអាចលេងបាន។ វាមានអារម្មណ៍ដូចជាខ្ញុំមិនដែលឃ្លាតឆ្ងាយពីក្រុមនោះឡើយ។ វាមានអារម្មណ៍រំជួលចិត្តតិចតួច ក្នុងការបានវិលត្រឡប់មកកាន់ក្រុមជម្រើសជាតិវិញ តែខ្ញុំស្ទើរតែមិនបានខកខាន ក្នុងការប្រកួតណាមួយឡើយ ក្នុងរយៈពេល ១០ ឆ្នាំចុងក្រោយនេះ ដូច្នេះ ខ្ញុំដូចជាផ្នែក១ នៃគ្រួសារនេះ»។
កីឡាករ Eriksen ទទួលបានការអបអរពីសំណាក់មិត្តរួមក្រុម ដែលភាគច្រើនមានវត្តមាន នៅពេលកីឡាករវ័យ ៣០ ឆ្នាំ កើតមានអាការគាំងបេះដូង អំឡុងហ្គេមបើកឆាក នៃព្រឹត្តិការណ៍ដណ្ដើមជើងឯកអឺរ៉ុបរបស់ក្រុមដាណឺម៉ាក ទល់នឹងក្រុមហ្វាំងឡង់ ក្នុងក្រុងកូប៉ិនហាក កាលពីខែមិថុនា។
Eriksen ត្រូវបានសង្គ្រោះនៅលើទីលាន ដោយដេកសន្លប់អស់ជាច្រើននាទី ខណៈអ្នកគាំទ្រក្នុងកីឡដ្ឋានស្រឡាំងកាំង ហើយអ្នកមើលតាមទូរទស្សន៍រាប់លាននាក់ជុំវិញពិភពលោក រន្ធត់នឹងរូបភាពនោះ។
Eriksen បានចំណាយពេលជាច្រើនថ្ងៃ នៅឯមន្ទីរពេទ្យ ហើយបានបំពាក់ឧបករណ៍ដើម្បីគ្រប់គ្រងចង្វាក់បេះដូង ដែលនេះនាំឱ្យមានការផ្ដាច់កិច្ចសន្យាជាមួយក្រុម Inter Milan ដោយមានការព្រមព្រៀងទាំងសងខាងក្នុងខែធ្នូ ដោយសារកីឡាករ ដែលបំពាក់ឧបករណ៍បែបហ្នឹង មិនត្រូវបានអនុញ្ញាតឱ្យប្រកបអាជីពនៅអ៊ីតាលីនោះឡើយ៕ AFP/VN