ក្រុងឡុងដ៍: លោក Gareth Southgate បានលើកឡើងថា កីឡាករ Harry Kane សមនឹងបានឈរ ក្នុងចំណោមកីឡាករឆ្នើមៗគ្រប់កាលរបស់ក្រុមជម្រើសជាតិអង់គ្លេស បន្ទាប់ពីខ្សែប្រយុទ្ធរូបនេះ ទៅកាន់តែកៀកនឹងការក្លាយជាអ្នកស៊ុតបញ្ចូលទីច្រើនជាងគេបំផុតជាកំណត់ត្រារបស់ក្រុមតោកំណាច ជាមួយនឹងការទាត់បាល់ប៉េណាល់ទី សម្រេច ១ គ្រាប់ ក្នុងជ័យជម្នះ ២-១ លើក្រុមស្វ៊ីស ក្នុងជំនួបមិត្តភាព កាលពីថ្ងៃសៅរ៍។
កីឡាករ Kane បានទម្លុះសំណាញ់ទី ដោយការទាត់បាល់ពិន័យ ១១ ម៉ែត្រ នៅចុងម៉ោង នៃវគ្គទី២ ក្នុងការប្រកួតនៅឯពហុកីឡដ្ឋាន Wembley ដែលធ្វើឱ្យចំនួនគ្រាប់បាល់សរុបក្នុងក្រុមអង់គ្លេសរបស់គេឡើងដល់ ៤៩ គ្រាប់ ដោយចំនួននេះ នាំឱ្យរូបគេឡើងទៅនៅពីលើលោក Gary Lineker និងឡើងទៅឈរក្នុងចំណាត់ថ្នាក់លេខ ២ ស្មើជាមួយលោក Bobby Charlton។
មានតែអតីតកីឡាករ គឺលោក Wayne Rooney ដែលរកគ្រាប់បាល់បាន ៥៣ គ្រាប់ប៉ុណ្ណោះ ទម្លុះសំណាញ់ទីបានច្រើនដងជាងគេបំផុត សម្រាប់ក្រុមអង់គ្លេស ហើយវានឹងនាំឱ្យមានការភ្ញាក់ផ្អើលតិចតួច ប្រសិនបើកីឡាករ Kane អាចបំបែកកំណត់ត្រានៅចុងឆ្នាំនេះ។
កីឡាករប្រធានក្រុមអង់គ្លេស Kane ដែលបានបង្ហាញខ្លួនលក្ខណៈអន្តរជាតិលើកដំបូង កាលពី ៧ ឆ្នាំមុន ក្នុងខែនេះ ធ្វើបានចំនួន ៤៩ គ្រាប់នេះ ជាមួយនឹងការចូលលេងតែ ៦៨ លើកប៉ុណ្ណោះ ខណៈដែលអតីតវីរបុរសរបស់ក្រុមបិសាចក្រហម Manchester United លោក Charlton បានចូលលេង ១០១ ដង ដើម្បីធ្វើបានក្នុងចំនួននោះ។
ឈ្មោះទាំងអស់ដែលគាត់ស្ថិតក្នុងចំណោមនោះដែរ គឺជារឿងពិសេសអស្ចារ្យណាស់។ គេនឹងពេញចិត្តចំពោះប្រវត្តិសាស្ត្រនោះ ហើយវានឹងមានអត្ថន័យខ្លាំងណាស់ចំពោះរូបគេ។ អ្នកត្រូវតែនិយាយថា គេនឹងមានសិទ្ធិខ្ពស់ ក្នុងការធ្វើរឿងនោះ។ ខ្ញុំមិនចង់ដាក់បណ្ដាសា ដោយការនិយាយអ្វីបន្ថែមទៀតទេ»។ នេះជាការលើកឡើងរបស់គ្រូបង្វឹកអង់គ្លេស លោក Southgate។
លោក Southgate បន្ថែមថា៖ «ខ្ញុំចង់ឱ្យរូបគេបំបែកកំណត់ត្រានៅជុំចុងក្រោយ ក្នុងព្រឹត្តិការណ៍ World Cup។ បើគេសម្រេចវាមិនបានមុនទេ នោះមនុស្សជាច្រើន នឹងនិយាយថា គេមិនគួរមានវត្តមាន ក្នុងក្រុមនោះឡើយ។ គេមានភាពស្ងប់ស្ងាត់ណាស់ពីរឿងនេះ។ គេមានទំនុកចិត្តថា គេអាចសម្រេចបាន ព្រោះគ្រាប់បាល់របស់គេជាកំណត់ត្រាក្នុង ១ ហ្គេម គឺល្អមិនធម្មតាឡើយ»។
ទោះបីជា Kane សារភាពថា រូបគេចង់បំបែកកំណត់ត្រារបស់លោក Rooney ក៏ដោយ ក៏វាគឺមេដាយជយលាភី World Cup ដែលរកបានដោយលោក Charlton ក្នុងឆ្នាំ ១៩៩៦ ឯណោះទេ ដែលមានន័យបំផុតសម្រាប់ស៊ុបភើស្តាររបស់ក្រុម Tottenham Hotspur រូបនេះ។
«ខ្ញុំតែងតែនិយាយថា វាជារឿងដ៏អស្ចារ្យ ក្នុងការបានរួមក្រុមជាមួយអ្នកទាំងនោះ។ ខ្ញុំមានមោទនភាព ក្នុងការបានធ្វើបែបនោះ (សម្រេចកំណត់ត្រា) និងបានក្លាយជាមា្នក់ ក្នុងចំណោមឈ្មោះនៃអ្នកទាំងនោះ។ វាជាឆ្នាំដ៏មានអត្ថន័យមួយ នាខាងមុខនេះ និងជាឱកាស ក្នុងការបានរកគ្រាប់បាល់បន្ថែម។ យើងរង់ចាំមើលថា នឹងមានអ្វីកើតឡើង»។ កីឡាករ Kane បានលើកឡើង។
កីឡាករ Kane នឹងមានឱកាសដើម្បីបានជួយបញ្ចប់ការទន្ទឹងរង់ចាំដ៏យូររបស់ក្រុមអង់គ្លេស ក្នុងការបានយកដៃទៅកាន់ពានរង្វាន់ដ៏ធំ នៅប្រទេសកាតា នាចុងឆ្នាំនេះ តែក្រុមរបស់លោក Southgate នៅតែបន្តមានការងារជាច្រើនទៀត បន្ទាប់ពីមាននូវទម្រង់លេងមិនជាគួរឱ្យទុកចិត្តបាន។
ជាមួយរយៈពេលត្រឹមតែ ៨ ខែ រហូតដល់ព្រឹត្តិការណ៍ World Cup ដំណើរការ លោក Southgate បានប្រើប្រាស់ហ្គេមដំបូងរបស់អង់គ្លេស ក្នុងឆ្នាំ ២០២២ ដើម្បីធ្វើការដកបទពិសោធ ហើយលទ្ធផល គឺមានចំណុចខ្វះខាត ក្នុងរយៈពេលយ៉ាងយូរនៃការប្រកួតនេះ។
ខ្សែប្រយុទ្ធ Breel Embolo ជាអ្នកជួយឱ្យក្រុមស្វីសនាំមុខមុននៅវគ្គទី១ ដែលក្រុមភ្ញៀវមានប្រៀបជាខ្លាំង មុនពេលខ្សែការពារ Luke Shaw ស៊ុតឱ្យមានគ្រាប់បាល់តាមស្មើវិញ ហើយកីឡាករ Kane បានជួយស្រោចស្រង់មុខមាត់របស់ក្រុមម្ចាស់ផ្ទះ ខណៈដែលលោក Southgate នឹងសង្ឃឹមថា នេះគ្រាន់តែការធ្លាក់ចុះដ៏កម្ររបស់ក្រុមជើងឯករង Euro 2020 ដែលត្រូវទទួលក្រុមកូតឌីវ័រ ក្នុងជំនួបមិត្តមួយទៀត នៅថ្ងៃអង្គារសប្ដាហ៍នេះ៕ AFP/VN