ក្រុងតូរុ៉នតូ: ក្រុមជម្រើសជាតិកាណាដា ទើបតែដណ្ដើមបានសិទ្ធិឡើងទៅជុំចុងក្រោយ ក្នុងព្រឹត្តិការណ៍ World Cup ជាលើកទី២ កាលពីថ្ងៃអាទិត្យ ក្រោយយកឈ្នះក្រុមហ្សាម៉ាអ៊ីក (Jamaica) ក្នុងលទ្ធផល ៤-០ ហើយការកក់សំបុត្ររបស់ពួកគេទៅប្រទេសកាតានេះ គឺជាបញ្ចប់នូវការខកខាន និងការឈឺចាប់អស់រយៈពេល ៣៦ ឆ្នាំ។
ខណៈពេលដែលក្រុមកាណាដា ធ្វើពិធីអបអរនឹងការបានសិទ្ធិនេះ ក្រុមម៉ិកស៊ិក និងសហរដ្ឋអាមេរិកឯណោះ នឹងត្រូវរង់ចាំនៅប្រកួតចុងក្រោយ ដើម្បីបានដឹងពីជោគវាសនារបស់ពួកគេ បើទោះបីជាមានជ័យជម្នះរួមជាមួយនឹងក្រុមកូស្តារីកា ដែលបានបន្តរក្សាក្តីសង្ឃឹមទៅកាតារបស់ពួកគេឱ្យនៅរស់រានផងដែរក៏ដោយ។
ក្រុមសហរដ្ឋអាមេរិក មាននូវការរួមចំណែកយ៉ាងធំធេង ដោយការធ្វើបានហ៊ែតទ្រិក (ស៊ុត ៣ គ្រាប់) ពីខ្សែបម្រើ Christian Pulisic របស់ក្រុមតោខៀវ Chelsea ក្នុងជ័យជម្នះដ៏សន្ធឹកសន្ធាប់៥-១ លើក្រុមភ្ញៀវប៉ាណាម៉ា ខណៈដែលក្រុមម៉ិកស៊ិក ត្រូវការគ្រាប់បាល់ នៅនាទីទី៧០ របស់ខ្សែបម្រើ Edson Alvarez ដើម្បីអាចឈ្នះ ១-០ និងគេចផុតពីការលេងស្មើដ៏គួរឱ្យអាម៉ាស់ជាមួយនឹងក្រុមហុងឌូរ៉ាស ដែលមិនធ្លាប់ដណ្ដើមបាន ៣ ពិន្ទុពីការប្រកួតជម្រុះនេះឡើយ។
ជ័យជម្នះសម្រាប់កាណាដា នាំឱ្យពួកគេជាក្រុមលេខ ១ ក្នុងតារាងពិន្ទុ សម្រាប់ការប្រកួតជម្រុះប្រចាំតំបន់ CONCACAF ដោយមាន ២៨ ពិន្ទុ ពោលគឺនាំមុខដាច់ ៣ ពិន្ទុ លើក្រុមលេខ ២ សហរដ្ឋអាមេរិក និងក្រុមលេខ ៣ ម៉ិកស៊ិក ហើយមានគម្លាត ៣ ពិន្ទុបន្ថែមទៀតពីលើក្រុមលេខ ៤ កូស្តារីកា ដែលឈ្នះក្រុមអែលសាល់វ៉ាឌ័រ ២-១។
ក្រុមនៅទីកំពូលទាំង ៣ ទទួលបានសិទ្ធិស្វ័យប្រវត្តិ សម្រាប់ព្រឹត្តិការណ៍ World Cup នៅខែវិច្ឆិកា ដោយក្រុមបញ្ចប់ទីនៅចំណាត់ថ្នាក់លេខ ៤ ត្រូវប្រឈមមុខជាមួយនឹងក្រុមនៅតំបន់អូសេអានី ដើម្បីប្រកួតវគ្គចាញ់ធ្លាក់ (Play-off) អន្តរទ្វីប សម្រាប់ការដណ្ដើមកៅអី ១ ទៀត។
ក្រុមម៉ិកស៊ិក នឹងធ្វើជាម្ចាស់ផ្ទះទទួលអែលសាល់វ៉ាឌ័រ នៅថ្ងៃពុធ ខណៈដែលសហរដ្ឋអាមេរិក ត្រូវធ្វើដំណើរទៅទីក្រុងសាន់ហ្សូសេ ដើម្បីជួបក្រុមម្ចាស់ផ្ទះកូស្តារីកា ហើយក្រុមកាណាដា ត្រូវបញ្ចប់យុទ្ធនាការរបស់ពួកគេ ជាមួយក្រុមប៉ាណាម៉ា។ យ៉ាងណា ទាំងម៉ិកស៊ិក និងសហរដ្ឋអាមេរិក ត្រូវការតែលទ្ធផលស្មើប៉ុណ្ណោះ ដើម្បីឆក់បានសិទ្ធិស្វ័យប្រវត្តិ។
បន្ទាប់ពីបរាជ័យ ក្នុងការយកឱ្យបាននូវសិទ្ធិទៅជុំចុងក្រោយ ដោយការប្រកួតចាញ់ ១-០ ក្រៅផ្ទះ ក្រោមថ្វីជើងក្រុមកូស្តារីកា កាលពីថ្ងៃព្រហស្បតិ៍ ក្រុមកាណាដាបានត្រឡប់មកផ្ទះវិញ ជាមួយនឹងគោលបំណងថ្មី និងឱកាសបញ្ចប់កិច្ចការរបស់ខ្លួន នៅចំពោះមុខអ្នកគាំទ្រដែលកំពុងពេញទៅដោយភាពរស់រវើក សម្លៀកបំពាក់អាវក្រហម និងគ្រវីទង់ជាតិ ប្រមាណជិតចំនួន ៣០ ០០០ នាក់ នៅឯកីឡដ្ឋាន BMO Field។
«ខ្ញុំមានភាពរីករាយណាស់ ដែលយើងមិនឈ្នះ នៅឯផ្ទះរបស់ក្រុមកូស្តារីកា។ នេះជាអ្វី ដែលវាត្រូវតែជាបែបហ្នឹង ខ្ញុំដឹងហើយថា ហេតុអ្វីបានជាអាទិទេពបាល់ទាត់ មិនឱ្យពួកយើងស៊ុតបញ្ចូលទីថ្ងៃនោះ ព្រោះគ្រប់យ៉ាង គឺសម្រាប់រាត្រីនេះ។ យើងទើបបានសិទ្ធិទៅ World Cup។ នេះគឺជាប្រទេស ដែលមានភាពស្មោះត្រង់នឹងបាល់ទាត់»។ នេះជាប្រសាសន៍របស់គ្រូបង្វឹកក្រុមកាណាដា លោក John Herdman៕ AFP/VN