ក្រុងព័រតូ: ជ័យជម្នះដ៏គួរឱ្យភ្ញាក់ផ្អើលរបស់ក្រុមជម្រើសជាតិម៉ាសេដ្វានខាងជើង (ម៉ាសេដ្វាន) លើក្រុមអ៊ីតាលី ក្នុងការប្រកួតចាញ់ធ្លាក់ (Play-off) វគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ World Cup កាលពីសប្តាហ៍មុន បានបង្កើតនូវការជួបគ្នាដ៏មិននឹកស្មានដល់ជាមួយក្រុមព័រទុយហ្គាល់ ដោយនាយករដ្ឋមន្រ្តីរបស់ប្រទេស នឹងផ្តល់ប្រាក់ចំនួន ៥០០ ០០០អឺរ៉ូ ($៥៤៩,៣០០) ប្រសិនបើពួកគេអាចឡើងដល់ជុំចុងក្រោយ នៃការប្រកួតប្រជែងដ៏ធំ ក្នុងឆ្នាំ ២០២២ នេះ។
លទ្ធផលនេះ បានធ្វើឱ្យពិភពបាល់ទាត់ស្រឡាំងកាំង និងបានរារាំងជំនួប ដែលអាចកើតមានឡើង រវាងម្ចាស់ជើងឯកអឺរ៉ុប ២ ចុងក្រោយបង្អស់ គឺអ៊ីតាលី និងព័រទុយហ្គាល់ ដែលក្រុមទាំង ២ បាត់បង់ការបានសិទ្ធិដោយស្វ័យប្រវត្តិយ៉ាងគួរឱ្យភ្ញាក់ផ្អើល ក្នុងវគ្គចែកពូល សម្រាប់ការប្រកួតប្រជែងបាល់ទាត់របស់ពិភពលោកនៅប្រទេសកាតា។
បន្ទាប់ពីការចាប់ឆ្នោតវគ្គ Play-off ចំណងជើងធំៗទាំងអស់ នៅលើទំព័របណ្ដាញសារព័ត៌មាន គឺសំដៅទៅដល់រឿងសោកសៅ ដែលត្រូវបានរំពឹងទុកថា ១ ក្នុងចំណោមក្រុមមហាអំណាចបាល់ទាត់ទាំង ២ នឹងបាត់មុខពីជុំចុងក្រោយនៃព្រឹត្តិការណ៍ ដែលកើតឡើង ៤ ឆ្នាំម្ដងនេះ ជាមួយនឹងឈ្មោះកីឡាករកម្រិតកំពូលៗជាច្រើន នៅក្នុងក្រុមរបស់ពួកគេ និងថា តើការប្រកួតវគ្គ Play-off ដែលអាចនឹងមាន រវាងពួកគេ នឹងពេញទៅរឿងរ៉ាវសោកសៅយ៉ាងដូចម្ដេចទៅ។
តែក្រុមម៉ាសេដ្វាន មិនអនុញ្ញាតឱ្យអត្ថបទនៃរឿងនោះ ត្រូវបានសរសេរឡើងនោះឡើយ ដោយការទម្លាក់ក្រុមជើងឯក World Cup ៤ សម័យកាល អ៊ីតាលីចេញពីការប្រកួតប្រជែងនេះ ជាមួយនឹងជ័យជម្នះ ១-០ ដែលគ្រាប់បាល់ដ៏មានតម្លៃមហាសាលនោះ បានមកដោយសារការស៊ុតពីក្រៅតំបន់គ្រោះថ្នាក់របស់ខ្សែប្រយុទ្ធ Aleksandar Trajkovski នៅនាទីទី៩០+២។
ស្របពេលជាមួយគ្នានេះ ក្រុមព័រទុយហ្គាល់ បានរួចផុតពីភាពសោកសៅ ក្នុងវគ្គពាក់កណ្តាលផ្តាច់ព្រ័ត្រ សម្រាប់វគ្គ Play-off របស់ពួកគេ ខណៈដែលពួកគេ បានផ្តួលតួកគី ក្នុងលទ្ធផល ៣-១ បន្ទាប់ពីខ្សែប្រយុទ្ធ Burak Yilmaz ស៊ុតបាល់ប៉េណាល់ទីអត់ចូល នៅប្រមាណជា ៥ នាទីចុងក្រោយនៃការប្រកួត ដែលប្រសិនបើធ្វើសម្រេចនោះ អាចនាំឱ្យមានម៉ោងបន្ថែមពិសេស សម្រាប់ហ្គេម នៅកីឡដ្ឋាន Dragao របស់ក្រុម Porto ដែលលក់សំបុត្រអស់គ្មានសល់នេះ។
សំបុត្រចំនួន ៥ ម៉ឺនសន្លឹក សម្រាប់ការប្រកួតនាថ្ងៃអង្គារ នៅកីឡដ្ឋាន Dragao ត្រូវបានលក់អស់រលីង ក្នុងរយៈពេលប្រមាណជា ២-៣ ម៉ោង ចំពេលមានការរំពឹងទុកយ៉ាងខ្ពស់ពីអ្នកគាំទ្រក្នុងស្រុក (ក្រុមម្ចាស់ផ្ទះ) ខណៈដែលក្រុមព័រទុយហ្គាល់ប្រឹងប្រែង ដើម្បីបានកៅអីនៅឯព្រឹត្តិការណ៍ដ៏ធំរបស់ពិភពលោកនេះ។
នាយករដ្ឋមន្ត្រី លោក Dimitar Kovacevski ដែលកាលពីឆ្នាំមុន បានធ្វើដំណើរទៅកាន់បុរីវ៉ាទីកង់ (Vatican) ដើម្បីសុំសម្ដេច Pope Francis ផ្ដល់ពរជ័យដល់ក្រុមជម្រើសជាតិរបស់លោក បានឡើងលើយន្តហោះ កាលពីថ្ងៃអាទិត្យ ដើម្បីជូនពរក្រុម មុនពេលពួកគេចាកចេញទៅក្រុងព័រតូ ហើយសន្យាថា នឹងផ្តល់រង្វាន់ដល់ក្រុមកីឡាករ ប្រសិនបើពួកគេឈានដល់ជុំចុងក្រោយ៕ AFP/VN