.jpg)
កីឡាករ Max Verstappen ម្ចាស់ជើងឯកពិភពប្រណាំងរថយន្ត Formula 1។ រូបថត AFP
ក្រុងជេដដាហ៍: ម្ចាស់ជើងឯកពិភពលោក Max Verstappen បានសារភាពថា រូបគេមានអារម្មណ៍ធូរទ្រូងបន្តិច ដែលទទួលបានជ័យជម្នះជាលើកទី១ ក្នុងរដូវកាលនេះ បន្ទាប់ពីវ៉ាឈ្នះគូប្រជែងចាស់ Charles Leclerc ក្នុងកម្មវិធី Saudi Arabian Grnad Prix នៅអារ៉ាប៊ី សាអ៊ូឌីត នាថ្ងៃអាទិត្យ។
«វាជាការលំបាកមួយ តែជាការប្រណាំងដ៏ល្អ ហើយវាបានបង្ហាញថា ការប្រជែងដណ្តើមជើងឯក ក្នុងរដូវកាលនេះ នឹងមានការប្រដេញគ្នាយ៉ាងកៀកកិតបំផុតរវាងយើងទាំង ២ នាក់។ វាជាការប្រណាំងដ៏លំបាកមួយ»។ នេះជាសម្ដីរបស់កីឡាករសញ្ជាតិហូឡង់ Verstappen វ័យ ២៤ ឆ្នាំរបស់ក្រុម Red Bull បន្ទាប់ពីបើកឈ្នះត្រឹមតែកន្លះវិនាទី លើអ្នកប្រណាំងរបស់ក្រុម Ferrari។
កីឡាករ Verstappen បន្តថា៖ «យើងបានប្រកួតប្រជែងយ៉ាងខ្លាំងក្លា នៅជួរមុខ ហើយយើងគ្រាន់តែប្រជែងគ្នាយ៉ាងយូរ។ ពួកគេពិតជាលឿន នៅផ្លូវបត់ តែយើងលឿន នៅលើផ្លូវត្រង់។ សម្បកកង់បានសឹកលឿនបន្តិច ដូច្នេះអ្នកអាចឃើញហើយ នៅចុងបញ្ចប់ ខ្ញុំគិតថា យើងត្រឹមតែមានគម្លាតនាំមុខបន្ថែម ហើយគ្រាន់តែព្យាយាមគ្រប់គ្រងស្ថានភាព»។
Verstappen បន្ថែមថា រូបគេត្រូវតែរៀនអត់ធ្មត់ ដើម្បីទទួលបានប្រសិទ្ធភាពបំផុតនៃប្រត្តិបត្តិការយុគសម័យថ្មីរបស់រថយន្ដគេ។
សម្រាប់កម្មវិធី Saudi Arabian Grand Prix ដែលមានទាំងអស់ ៥០ ជុំនេះ ឃើញថា Verstappen ទៅដល់ទីព្រ័ត្រក្នុងថិរវេលា ១:២៤:១៩,២៩៣ ម៉ោង ដោយនាំមុខអ្នកទី២ Leclerc ចំនួន ០,៥៤៩ វិនាទី និងអ្នកមកដល់ទី៣ Carlos Sainz ដែលជាអ្នកបើកបររបស់ក្រុម Ferrari ម្នាក់ផ្សេងទៀត ចំនួន ៨,០៩៧ វិនាទី។
ចំណែកឯម្ចាស់ជើងឯក ៧ សម័យកាល Lewis Hamilton បញ្ចប់នៅលេខ ១០ ដោយតាមពីក្រោយ ១:១៣,៩៤៨ នាទី តែស្ដារមោទនភាពវិញបានខ្លះ បន្ទាប់ពីមានការចាប់ផ្តើមចេញដំណើរ នៅលេខរៀងទី១៥ នាចុងសប្តាហ៍ដ៏លំបាក ជាមួយនឹងក្រុម Mercedes។
ក្រោយបញ្ចប់បាន ២ ដំណាក់កាល នៃការប្រណាំងរថយន្ត Formula 1 ឆ្នាំ ២០២២ អ្នកបើកបរឈរទី១ និងទី២ ក្នុងតារាងពិន្ទុសរុប គឺកីឡាកររបស់ក្រុម Ferrari ដោយកីឡាករ Leclerc ដែលនៅលើគេមាន ៤៥ ពិន្ទុ ហើយកីឡាករលេខ ២ Sainz មាន ៣៣ ពិន្ទុ ខណៈកីឡាករ Verstappen ដែលមាន ២៥ ពិន្ទុ ស្ថិតនៅចំណាត់ថ្នាក់លេខ ៣៕ AFP/VN
