ក្រុងឡុងដ៍: ការប្រកួតឡើងជាថ្មីម្ដងទៀតរបស់ម្ចាស់ខ្សែក្រវាត់ទម្ងន់ធ្ងន់ពិភពលោក Oleksandr Usyk ជាមួយអ្នកប្រដាល់សញ្ជាតិអង់គ្លេស Anthony Joshua ទំនងជានឹងធ្វើឡើងនៅចុងខែមិថុនា ដោយប្រទេសអារ៉ាប៊ី សាអ៊ូឌីត ស្ថិតក្នុងចំណោមទីកន្លែង ដែលត្រូវបានយកមកពិចារណា។ នេះបើតាមអ្នកផ្គូផ្គងរបស់កីឡាករសញ្ជាតិអ៊ុយក្រែន ដែលនិយាយប្រាប់ប្រព័ន្ធផ្សព្វផ្សាយ Sky Sports។
អ្នកប្រដាល់ Usyk បានផ្តួល Joshua នៅចំពោះមុខអ្នកទស្សនាយ៉ាងច្រើនកុះករ នៅឯកីឡដ្ឋាន Tottenham Hotspur ដែលលក់សំបុត្រអស់គ្មានសល់ កាលពីខែកញ្ញា ដើម្បីកា្លយជាម្ចាស់ខ្សែក្រវាត់របស់ស្ថាប័ន WBA, WBO, IBF និង IBO។
បន្ទាប់ពីការលុកលុយរបស់រុស្ស៊ីលើអ៊ុយក្រែន កីឡាករ Usyk បានត្រឡប់ទៅប្រទេសកំណើតរបស់ខ្លួនវិញ នៅអ៊ុយក្រែន ដើម្បីចូលរួមជួយជាមួយអ្នកផ្សេងទៀតការពារទឹកដី ដោយបង្កើតនូវការសង្ស័យ ដល់ការប្រកួតឡើងវិញម្ដងទៀតជាមួយកីឡាករ Joshua។
តែទូរទស្សន៍ ESPN រាយការណ៍នៅសប្តាហ៍មុនថា ការប្រកួតរវាងអ្នកប្រដាល់ទាំង ២ នឹងធ្វើឡើង នៅរដូវក្តៅនេះ បន្ទាប់ពីរដ្ឋមន្ត្រីកីឡាអ៊ុយក្រែនបានអនុញ្ញាតឱ្យកីឡាករ Usyk ចាកចេញពីប្រទេស។
«អារ៉ាប៊ី សាអូ៊ឌីត កំពុងស្ថិតក្រោមការពិភាក្សា។ ចុងខែមិថុនា ក៏ជាពេលវេលា ដែលកំពុងធ្វើការពិចារណាផងដែរ ឥឡូវនេះ។ រឿងរ៉ាវជាច្រើន នឹងត្រូវអាស្រ័យលើថា តើល្បឿន ដែលយើងរៀបចំដោះស្រាយឱ្យមានការចុះហត្ថលេខាលើក្រដាសនោះលឿនកម្រិតណា?»។ នេះជាសម្ដីពីអ្នកផ្គូផ្គូង លោក Alexander Krassyuk។
អ្នកឈ្នះ អាចត្រូវយកទៅត្រៀមសម្រាប់ការប្រកួត ដើម្បីគ្រងខ្សែក្រវាត់រួមទល់នឹង Tyson Fury របស់អង់គ្លេស ដែលជាម្ចាស់ខ្សែក្រវាត់របស់ស្ថាប័ន WBC៕ AFP/VN