ក្រុងមីឡាន: លោក Roberto Mancini បានព្រលយពាក្យយ៉ាងច្បាស់ៗ កាលពីថ្ងៃចន្ទថា គាត់នឹងបន្តធ្វើជាគ្រូបង្វឹកក្រុមជម្រើសជាតិអ៊ីតាលី បើទោះបីជាក្រុមរហស្សនាម «Azzurri» (ពណ៌ខៀវ) ខកខានទៅចូលរួម ក្នុងព្រឹត្តិការណ៍ World Cup ២ លើកបន្តបន្ទាប់គ្នាក៏ដោយ។
ក្រុមម្ចាស់ជើងឯកទ្វីបអឺរ៉ុប ត្រូវបានក្រុមម៉ាសេដ្វានខាងជើង (ម៉ាសេដ្វាន) ធ្វើឱ្យស្រឡាំងកាំង ក្នុងការប្រកួតជម្រុះវគ្គពាក់កណ្តាលផ្តាច់ព្រ័ត្រ កាលពីថ្ងៃព្រហស្បតិ៍ សម្រាប់ព្រឹត្តិការណ៍ នៅឆ្នាំនេះ ក្នុងប្រទេសកាតា ដោយបង្កឱ្យមានការលើកឡើងថា គាត់អាចលាលែងពីតំណែង បន្ទាប់ពីមាននូវលទ្ធផល ដែលប្រហែលអាចជាបរាជ័យដ៏អាក្រក់បំផុតរបស់អ៊ីតាលីមិនធ្លាប់មាន។
តែទោះបីជាគាត់ នឹងមិនបានបញ្ជាក់ដោយបើកចំហថា គាត់នឹងបន្តកាន់តំណែងក៏ដោយ ក៏កាលពីថ្ងៃចន្ទ លោក Mancini បាននិយាយពាក់ព័ន្ធនឹងក្រុម និងអនាគត ដោយប្រើពាក្យពហុវចនៈបុរសទី១ «Noi» ឬ «We» (យើង)។
«ខ្ញុំបាននិយាយជាមួយនឹងប្រធាន (សហព័ន្ធកីឡាបាល់ទាត់អ៊ីតាលី) (លោក Gabriele Gravina) នៅប៉ុន្មានថ្ងៃចុងក្រោយនេះ ខ្ញុំគិតថា យើងស្ថិតនៅលើទំព័រដូចគ្នា សឹងតែលើអ្វីៗគ្រប់យ៉ាង»។ នេះជាប្រសាសន៍របស់លោក Mancini ដែលនិយាយទៅកាន់អ្នកសារព័ត៌មាន កាលពីថ្ងៃចន្ទ។
អ្នកចាត់ការរូបនេះ បានបន្ថែមថា៖ «យើងនឹងនិយាយពីបញ្ហានេះម្តងទៀត នៅប៉ុន្មានថ្ងៃខាងមុខ។ យើងនឹងជួបគ្នាម្តងទៀត បន្ទាប់ពីការប្រកួតមិត្តភាព។ បន្ទាប់មក យើងនឹងចំណាយពេលរបស់យើង ដើម្បីនិយាយអំពីអ្វី ដែលអាចកែលម្អឱ្យប្រសើរជាងនេះ សម្រាប់ពេលអនាគត។ នោះហើយជាអ្វី ដែលត្រូវនិយាយ»។
ឈ្មោះជាច្រើន ក្នុងនោះរួមទាំងអតីតប្រធានក្រុម Fabio Cannavaro ដែលឈ្នះជយលាភីពានរង្វាន់ World Cup 2006 និងគ្រូបង្វឹករបស់ក្រុមអធិរាជស Real Madrid លោក Carlo Ancelotti ត្រូវបានគេលើកឡើង បន្ទាប់ពីបរាជ័យ ១-០ របស់ក្រុមអ៊ីតាលី នៅក្រុងប៉ាលើម៉ូ កាលពីសប្តាហ៍មុន។
លោក Mancini ដែលបានចូលមកកាន់តំណែង កាលពីខែឧសភា ឆ្នាំ ២០១៨ ក្រោយពេលដែលក្រុមអ៊ីតាលី មិនអាចឡើងទៅលេងនៅ World Cup នាឆ្នាំនោះ មានកិច្ចសន្យារហូតដល់ព្រឹត្តិការណ៍ ក្នុងឆ្នាំ ២០២៦ ដែលពេលនោះ ត្រូវរៀបចំដោយសហម្ចាស់ផ្ទះ គឺកាណាដា ម៉ិកស៊ិក និងសហរដ្ឋអាមេរិក។
បន្ទាប់ពីបរាជ័យ កាលពីថ្ងៃព្រហស្បតិ៍ កីឡាករប្រធានក្រុម Giorgio Chiellini និងលោក Gravina បាននិយាយដូចគ្នាថា ពួកគេចង់ឱ្យលោក Mancini បន្តតួនាទីរបស់ខ្លួន ហើយបុរសវ័យ ៥៧ ឆ្នាំរូបនេះ ក៏ស្ទើរតែបានប្រកាសជាសាធារណៈទៅហើយ ក្នុងការបន្តតួនាទីជាអ្នកចាត់ការរបស់ក្រុម។
នៅពេលត្រូវបានសួរថា តើអ្វីនឹងជំរុញឱ្យគាត់នៅធ្វើតួនាទីរបស់គាត់ លោក Mancini បានញញឹម និងបានបង្ហាញយ៉ាងច្បាស់លាស់ពីភាពអន្ទះសារបស់គាត់ ក្នុងការដឹកនាំក្រុម ដែលគាត់ជឿជាក់ថា នឹងក្លាយជាគូប្រជែងមួយនៅប្រទេសកាតា ប្រសិនបើពួកគេដណ្ដើមបានសិទ្ធិនោះ។
«ខ្ញុំនៅក្មេងនៅឡើយ គោលបំណងរបស់ខ្ញុំ គឺឈ្នះជើងឯកអឺរ៉ុប និង World Cup ហើយសម្រាប់ពាន World Cup យើងនឹងត្រូវរង់ចាំបន្តិច។ ខ្ញុំពេញចិត្តការងាររបស់ខ្ញុំ ខ្ញុំគិតថា ខ្ញុំនៅអាចមានភាពរីករាយ និងធ្វើអ្វីពិសេសៗជាមួយពួកក្មេងៗ (កីឡាករ)»។ លោក Mancini បានបន្ថែម។
គាត់ត្រូវបានគាំទ្រ ដោយខ្សែការពារ Leonardo Bonucci ដែលអវត្តមាន សម្រាប់ការប្រកួតជាមួយមា៉សេដ្វាន តែបានក្លាយជាកីឡាករស្នូលរបស់ក្រុម ដែលបានឡើងដល់វគ្គផ្តាច់ព្រ័ត្រ នៅព្រឹត្តិការណ៍ Euro 2020 និងបំបែកកំណត់ត្រាឈ្នះជាបន្តបន្ទាប់ និងមិនចាញ់សោះ៕ AFP/VN