ក្រុងម៉ៃអាមី: កីឡាការិនីវាយកូនបាល់ (តិន្នីស) អាជីព Naomi Osaka នឹងត្រូវឡើងទៅប៉ះកីឡាការិនីអាមេរិក Danielle Collins ដើម្បីដណ្ដើមកៅអី ១ ក្នុងវគ្គពាក់កណ្តាលផ្តាច់ព្រ័ត្រ នៃកម្មវិធី Miami Open ក្រោយតារាឆ្នើមសញ្ជាតិជប៉ុនរូបនេះ បានយកឈ្នះកីឡាការិនី Alison Riske ក្នុងលទ្ធផល ៦-៣ និង ៦-៤ កាលពីថ្ងៃចន្ទ។
កីឡាការិនី Osaka បានឆ្លើយតបដោយភាពរឹងមាំខ្លាំងក្លានៅរដ្ឋហ្វ្លរីដានេះ ដោយការបានឡើងទៅវគ្គ ១/៤ ផ្តាច់ព្រ័ត្រ បន្ទាប់ពីចាកចេញពីកម្មវិធី Indian Wells ដោយទឹកភ្នែកនៅដើមខែនេះ ដោយសារត្រូវអ្នកគាំទ្រប្រើពាក្យប្រមាថ។
ម្ចាស់ជើងឯកពានលំដាប់ Grand Slam ៤ សម័យកាល Osaka ដែលបានជ័យជម្នះស្រួលៗ (គូប្រកួតដកខ្លួន) នៅជុំមុន មិនទាន់ភា្លត់ចាញ់សូម្បី ១ សិតនៅឡើយទេ ហើយនៅតែជាម្នាក់ ក្នុងចំណោមអ្នក ដែលមានសិទ្ធិខ្ពស់ ក្នុងការឈ្នះពាននៃកម្មវិធីនេះ។
«ខ្ញុំពិតជារីករាយណាស់។ កាលពីឆ្នាំមុន ខ្ញុំឡើងដល់វគ្គ ៨ នាក់ នៅម៉ៃអាមីនេះ បន្ទាប់ពីឈ្នះនៅអូស្ត្រាលី ហើយខ្ញុំឈ្នះការប្រកួតនៅទីនេះទៀត ឆ្នាំនេះ តែខ្ញុំមានអារម្មណ៍រីករាយកាន់តែខ្លាំងឡើង ដោយសារនេះ គឺជាពេល ១ ក្នុងចំណោមពេលវេលាដ៏រីករាយបំផុតនៃជីវិតរបស់ខ្ញុំ»។ នេះជាសម្ដីរបស់កីឡាការិនី Osaka ក្រោយចប់ការប្រកួត។
«មានរឿងជាច្រើនរត់កាត់គំនិតរបស់ខ្ញុំ កាលពីឆ្នាំមុន។ ប្រហែលវាជារឿងដែលកំពុងប្រឹងប្រែងវិលត្រឡប់ទៅលេខ ១ វិញ ឬរឿងផ្សេងៗទៀត ដែលមិនសំខាន់ តែនៅពេលនោះ វាគឺធ្ងន់ធ្ងរណាស់ក្នុងក្បាលខ្ញុំ។ ខ្ញុំគ្រាន់តែសប្បាយចិត្ត ដែលមានសុខភាពល្អឡើងវិញ»។ នេះជាការបន្ថែមរបស់កីឡាការិនីវ័យ ២៤ ឆ្នាំ ដែលថ្មីៗនេះ បានបង្ហាញថា នាងទទួលបានផលល្អច្រើនពីការព្យាបាលចំពោះបញ្ហាសុខភាពផ្លូវចិត្ត។
កីឡាការិនី Collins ដែលឡើងដល់វគ្គ ៤ នាក់ចុងក្រោយ នៅ Miami Open នេះ ក្នុងឆ្នាំ ២០១៨ បានទម្លាក់កីឡាការិនីទុយនីស៊ី Ons Jabeur ដោយលទ្ធផល ៦-២ និង ៦-៤។
កីឡាការិនី Iga Swiatek ដែលទើបបានចំណាត់ថ្នាក់លេខ ១ ពិភពលោកថ្មីថ្មោង ក៏បានធ្វើដំណើរទៅវគ្គបន្ទាប់យ៉ាងស្រួលៗដែរ កាលពីថ្ងៃចន្ទ ដោយការយកឈ្នះកីឡាការិនី Coco Gauff របស់អាមេរិក ក្នុងលទ្ធផល ២ សិត ០ គឺ ៦-៣ និង ៦-១ ដោយប្រើពេល ១ ម៉ោង និង ១៦ នាទី។
កីឡាការិនីចំណាត់ថ្នាក់លេខ ២ ក្នុងកម្មវិធីនេះ Swiatek ដែលបានកាន់កាប់ចំណាត់ថ្នាក់កំពូលរបស់ពិភពលោក កាលពីថ្ងៃសុក្រ បន្ទាប់ពីមានការចូលនិវត្តន៍ដ៏គួរឱ្យភ្ញាក់ផ្អើលរបស់កីឡាការិនីសញ្ជាតិអូស្ត្រាលី Ashleigh Barty ឥឡូវនេះ កំពុងស្ថិតនៅលើដំណើរផ្លូវមិនស្គាល់ពាក្យចាញ់សោះរហូតដល់ ១៤ ហ្គេម។
កីឡាការិនីសញ្ជាតិប៉ូឡូញវ័យ ២០ ឆ្នាំ បានលើកពាន ក្នុងព្រឹត្តិការណ៍ WTA 1000 នៅក្រុងដូហា ប្រទេសកាតា ហើយបន្ទាប់មកឈ្នះកម្មវិធី Indian Wells នៅសហរដ្ឋអាមេរិកនេះ កាលពីដើមខែ៕ AFP/VN