.jpg)
ក្រុងដូហា: ប្រធានក្លិបបាល់ទាត់កម្រិតកំពូលមួយរបស់ប្រទេសអ៊ុយក្រែន បានអំពាវនាវឱ្យមានការដកសមាជិកភាពរបស់សហព័ន្ធបាល់ទាត់រុស្ស៊ីពីសហព័ន្ធបាល់ទាត់ពិភពលោក (FIFA) និងសហព័ន្ធបាល់ទាត់របស់ទ្វីបអឺរ៉ុប (UEFA)។
លោក Serhiy Palkin នាយកក្លិបបាល់ទាត់ Shakhtar Donetsk ដែលឈ្នះជើងឯកដល់ទៅ ៤ ដង ក្នុងចំណោម ៥ រដូវកាលចុងក្រោយរបស់លីគកំពូលអ៊ុយក្រែន បានប្រាប់ទៅបណ្ដាញសារព័ត៌មានថា រុស្ស៊ីគួរតែត្រូវបានដកចេញពីស្ថាប័នរបស់កីឡានេះ ក្នុងរបៀបដូចគ្នានឹងសម័យកាល ដែលមានការបែងចែកពណ៌សម្បុរ (រើសអើងពណ៌សម្បុរ) នៅអាហ្វ្រិកខាងត្បូង។
ក្លិបអាជីព និងក្រុមជម្រើសជាតិរបស់រុស្ស៊ី បច្ចុប្បន្នត្រូវបានដកហាមឃាត់មិនឱ្យចូលរួម ក្នុងការប្រកួតអន្តរជាតិនានា តែសហព័ន្ធបាល់ទាត់រុស្ស៊ី (RFS) នៅជាសមាជិកពេញសិទ្ធិរបស់ FIFA និង UEFA។
FIFA ត្រូវប្រារព្ធកម្មវិធីសមាជប្រចាំឆ្នាំរបស់ខ្លួននៅទីក្រុងដូហា ប្រទេសកាតា នៅថ្ងៃព្រហស្បតិ៍នេះ។ សហព័ន្ធរបស់ប្រទេសអ៊ុយក្រែន មិនត្រូវបានរំពឹងថា នឹងអាចចូលរួមក្នុងកិច្ចប្រជុំដ៏ធំនេះនោះទេ តែ RFS ទំនងជាអាចនឹងមានវត្តមាន។
«ខ្ញុំចង់ជំរុញឱ្យ FIFA និង UEFA ចាត់វិធានការបន្ថែមទៀត ដោយការលុប ឬក៏ព្យួរនូវសមាជិកភាពរបស់រុស្ស៊ី។ ក្នុងទសវត្សរ៍ឆ្នាំ ១៩៧០ អាហ្វ្រិកខាងត្បូងត្រូវបានដកចេញពី FIFA ដោយសារនយោបាយ នៃការបែងចែកពណ៌សម្បុរ ហើយរុស្ស៊ី គួរតែត្រូវបានដកចេញដូចគ្នា ពីបទនយោបាយប្រល័យពួជសាសន៍លើប្រជាជនអ៊ុយក្រែន និងសង្គ្រាមបង្ហូរឈាម ដែលពួកគេបានធ្វើឡើងដោយសេរី នៅលើទឹកដីរបស់យើង»។ នេះជាការរៀបរាប់របស់លោក Palkin ក្នុងសារដែលផ្ញើទៅកាន់បណ្ដាញសារព័ត៌មាន។
គិតតាំងពីការផ្ទុះជម្លោះ នៅតំបន់ដុនបាស (Donbas) ក្នុងឆ្នាំ ២០១៤ ក្រុម Donetsk ត្រូវបង្ខំលេងការប្រកួតក្នុងទឹកដីនៅក្រុង Lviv, Kharkiv និង Kyiv ហើយពេលនេះ ការប្រកួតបាល់ទាត់លីគអាជីពនៅអ៊ុយក្រែន ត្រូវបានផ្អាកដោយសារសង្គ្រាម។
តែយ៉ាងណាក្ដី ពាក់ព័ន្ធនឹងការអំពាវនាវនេះ ខាង FIFA និង UEFA មិនទាន់មានការបកស្រាយអ្វីភ្លាមៗនៅឡើយទេ៕ AFP/VN
