ក្រុងប៉ារីស: ក្រុមជម្រើសជាតិព័រទុយហ្គាល់ បានយកឈ្នះម៉ាសេដ្វានខាងជើង (ម៉ាសេដ្វាន) ២-០ ហើយក្រុមប៉ូឡូញ ក៏បានជូនដំណើរក្រុមស៊ុយអែត ដោយឈ្នះក្នុងលទ្ធផលដូចគ្នាដែរ សម្រាប់ការប្រកួតក្នុងវគ្គជម្រុះចាញ់ធ្លាក់ (Play-off) ផ្តាច់ព្រ័ត្រ កាលពីថ្ងៃអង្គារ ដែលជ័យជម្នះនេះ នាំឱ្យក្រុមទាំង ២ កក់សំបុត្រយន្តហោះទៅលេងជុំចុងក្រោយ ក្នុងព្រឹត្តិការណ៍ World Cup 2022 នៅកាតា។
ខ្សែបម្រើ Bruno Fernandes បានស៊ុតបញ្ចូលទីទាំង ២ គ្រាប់ ដើម្បីឱ្យក្រុមព័រទុយហ្គាល់ដណ្ដើមបានជ័យជម្នះលើក្រុមប្រជាជាតិបាល់កង់ ដែលឡើងមកវគ្គផ្ដាច់ព្រ័ត្រនេះ ដោយសារទម្លាក់ក្រុមម្ចាស់ជើងឯកអឺរ៉ុបអ៊ីតាលីដ៏គួរឱ្យភ្ញាក់ផ្អើល កាលពីសប្តាហ៍មុន ដោយឈ្នះ ១-០។
ការដែលអាចរុញក្រុមអ៊ីតាលីឱ្យខ្ទាតចេញពីការប្រកួតប្រជែងនេះ ដោយនឹកស្មានមិនដល់នោះ ធ្វើឱ្យក្រុមម៉ាសេដ្វាន សុបិនពីការបានទៅបង្ហាញខ្លួនជាលើកដំបូង ដែលមិនធ្លាប់មាននៅជុំចុងក្រោយរបស់ World Cup តែក្រុមព័រទុយហ្គាល់បានបង្ហាញឱ្យឃើញនូវការឈានជំហានបានវែងធំជាង ក្នុងហ្គេមនៅទីក្រុងព័រតូនេះ។
កីឡាករ Fernandes បានជួយឱ្យក្រុមព័រទុយហ្គាល់ធ្វើដំណើរនៅផ្លូវរបស់ខ្លួន នៅឯកីឡដ្ឋាន Estadio do Dragao ដោយការបញ្ចប់ទីយ៉ាងល្អពីការបញ្ជូនបាល់របស់ខ្សែប្រយុទ្ធ Cristiano Ronaldo នៅវគ្គទី១ ហើយបន្ទាប់មកបានធានានូវជ័យជម្នះសម្រាប់ក្រុមដោយមិនមានអ្វីគួរឱ្យសង្ស័យនៅវគ្គទី២ ក្រោយរត់ទាត់បាល់ទៅទម្លុះសំណាញ់ទីយ៉ាងល្អ ពេលខ្សែប្រយុទ្ធ Diogo Jota ឆ្កឹះបំផ្លោងចូលមកតំបន់គ្រោះថ្នាក់។
ជ័យជម្នះនេះ មានន័យថា ក្រុមព័រទុយហ្គាល់បន្លាយដំណើរផ្លូវនៃការបានសិទ្ធិទៅ World Cup ៦ លើក ចាប់តាំងដើមសតវត្សរ៍នេះ ខណៈដែលខ្សែប្រយុទ្ធរបស់ក្រុមបិសាចក្រហម Manchester United កីឡាករ Ronaldo ស្ថិតនៅលើផ្លូវក្នុងការទៅបង្ហាញខ្លួនក្នុងព្រឹត្តិការណ៍ដ៏ធំរបស់ពិភពលោកនេះជាលើកទី៥ ក្នុងវ័យ ៣៧ ឆ្នាំ។
លទ្ធផលដ៏ល្អបំផុតរបស់ស៊ុបភើស្តារ Ronaldo គឺការបានឡើងដល់វគ្គពាក់កណ្ដាលផ្ដាច់ព្រ័ត្រ ក្នុងឆ្នាំ ២០០៦ ដែលពេលនោះក្រុមព័រទុយហ្គាល់ ធ្លាក់ដោយសារក្រុមអាល្លឺម៉ង់។
គ្រូបង្វឹកលោក Fernando Santos បានពោលថា៖ «ខ្ញុំសូមអបអរសាទរដល់កីឡាករទាំងអស់ សម្រាប់អាកប្បកិរិយា និងគុណភាពរបស់ពួកគេ។ យើងបានគ្រប់គ្រងហ្គេម ជាមួយនឹងវិធីសាស្ត្រច្បាស់លាស់ពិតប្រាកដ។ ឥឡូវនេះ ដោយបានឈ្នះរួចហើយពាន Euro និង Nations League យើងមានក្ដីស្រមៃក្នុងការនាំភាពរីករាយយ៉ាងធំសម្បើមមកកាន់ប្រជាជាតិព័រទុយហ្គាល់ ដោយការឈ្នះជើងឯក World Cup»។
ចំណែកការប្រកួត ១ គូទៀត ក្នុងវគ្គ Play-off ផ្ដាច់ព្រ័ត្រនេះដែរ ខ្សែប្រយុទ្ធ Robert Lewandowski ស៊ុតបាល់ពិន័យ ១១ ម៉ែត្រ បានសម្រេចនៅដើមវគ្គទី២ ដើម្បីឱ្យក្រុមប៉ូឡូញបើកការនាំមុខលើក្រុមភ្ញៀវស៊ុយអែត មុនពេលបន្ទាប់មកខ្សែបម្រើ Piotr Zielinski បន្ថែមការនាំមុខ ដែល ២ គ្រាប់នេះ បានជួយបញ្ជូនក្រុមម្ចាស់ផ្ទះឱ្យទៅមានមុខក្នុងព្រឹត្តិការណ៍ នាចុងឆ្នាំនេះ រួមជាមួយនឹង ៣១ ក្រុមផ្សេងទៀត ដែលនឹងចាប់ឆ្នោត សម្រាប់វគ្គចែកពូល នៅថ្ងៃសុក្រនេះ៕ AFP/VN