ក្រុងបាងកក: ក្រុមហង្សក្រហម Liverpool និងក្រុមបិសាចក្រហម Manchester United នឹងជួបគ្នាក្នុងការប្រកួតមិត្តភាពកម្រិតខ្ពស់ នៅទីក្រុងបាងកក ក្នុងខែកក្កដា ខណៈដែលក្រុមទៅពីក្របខ័ណ្ឌ Premier League ចាប់ផ្ដើមដំណើរទេសចរណ៍ នៅមុនរដូវកាល ដែលអាចរកប្រាក់ចំណូលបានច្រើនគួរសម និងដែលបានផ្អាក ដោយសារការរាតត្បាតពីជំងឺកូវីដ ១៩។
បន្ទាប់ពីការប៉ះគ្នា នៅថ្ងៃទី ១២ ខែកក្កដា នៅក្នុងរាជធានីប្រទេសថៃ កីឡាករ Cristiano Ronaldo និងក្រុម Man United របស់គេ នឹងហោះហើរទៅកាន់ប្រទេសអូស្ត្រាលី សម្រាប់ការប្រកួតមិត្តភាព ២ បន្ថែមទៀត ក្នុងនោះរួមទាំងការជួបជាមួយក្រុមរួមលីគ Crystal Palace ក្នុងកីឡដ្ឋាន Melbourne Cricket Ground ដែលអាចផ្ទុកអ្នកទស្សនាចំនួន ១០ ម៉ឺន។
មុនពេលជំងឺរាតត្បាតនេះ បានបិទដំណើរទេសចរណ៍ក្រៅប្រទេស ជាធម្មតាទៅកាន់ទ្វីបអាស៊ី និងសហរដ្ឋអាមេរិក ដំណើរកម្សាន្តនេះ គឺផ្នែករកលុយជាប្រក្រតី សម្រាប់ក្លិប នៅ Premier League ទោះបីអ្នកចាត់ការក្រុម មិនចូលចិត្តនឹងដំណើរទេសចរណ៍ ដូចជាអាកាសធាតុក្តៅ និងពេលខ្លះ បញ្ហាទីលានក៏ដោយ។
ការតទល់គ្នារវាងក្រុម Man United និងក្រុម Liverpool របស់លោក Jurgen Klopp ដែលបច្ចុប្បន្ន ស្ទើរតែតាមទាន់ក្រុមមេឃខៀវ Manchester City នៅទីកំពូលតារាង Premier League នៅឯពហុកីឡដ្ឋានជាតិ Rajamangala ត្រូវបានប្រព័ន្ធផ្សព្វផ្សាយ និងអ្នកគាំទ្ររបស់ថៃដាក់ឈ្មោះថា «Red War» (សង្រ្គាមពណ៌ក្រហម)។
ក្លិបទាំង ២ មានអ្នកតាមគាំទ្រច្រើនដូចគ្នា ក្នុងប្រទេសថៃ ដោយអាវ និងឡូហ្គោរបស់ក្រុមហង្សក្រហម Liverpool ត្រូវបានរំលេចឡើងជាពិសេស ខណៈដែលទំព័រហ្វេសប៊ុកភាសាថៃផ្លូវការរបស់
ក្លិបនៅទឹកដី Anfield នេះ មានអ្នកតាមគាំទ្រដល់ទៅជាង ៣៨ លាននាក់។
អតីតខ្សែការពារ Phil Babb របស់ក្រុម Liverpool បានប្រាប់ថា លោករំពឹងថា លោក Klopp នឹងនាំយកកីឡាករពេញកម្លាំងគ្រប់តែម្ដង ក្នុងជំនួបនេះ។
តែដោយតម្លៃសំបុត្រចាប់ពី ៥ ០០០ ទៅ ២៥ ០០០ បាត ($ ១៥០ ទៅ $ ៧៥០) នោះបានធ្វើឱ្យ អ្នកគាំទ្រជនជាតិថៃជាច្រើន ត្អូញត្អែរពីតម្លៃ ដែលនាំឱ្យពួកគេអាចគ្មានលទ្ធភាពទិញមើលការប្រកួតដ៏ស្វិតស្វាញរវាងកីឡាករសំណព្វចិត្តរបស់ពួកគេ៕ AFP/VN