ក្រុងដូហា: ការរាប់ថយក្រោយឆ្ពោះទៅរកព្រឹត្តិការណ៍ World Cup ដ៏ចម្រូងចម្រាសបំផុតក្នុងប្រវត្តិសាស្ត្រ ពិតជាបានចាប់ផ្តើមមែន នៅថ្ងៃសុក្រនេះ ខណៈដែលការចាប់ឆ្នោតសម្រាប់ការប្រកួតប្រជែងក្នុងប្រទេសកាតា ឆ្នាំ ២០២២ ត្រូវធ្វើឡើងនៅទីក្រុងដូហា ដោយមានរយៈពេលមិនដល់ ៨ ខែ មុនពេលការប្រកួតបាល់ទាត់ដ៏ធំរបស់ពិភពលោកនេះ លេចរូបរាងជាផ្លូវការ។
ខណៈដែលការរឹតបន្តឹងទប់ស្កាត់ជំងឺរាតត្បាតកាន់តែមានភាពធូរស្រាលជាងមុន ឈ្មោះអ្នកល្បីៗរបស់វិស័យកីឡាបាល់ទាត់មួយចំនួន នឹងមានវត្តមាននៅទីនោះ សម្រាប់ការចាប់ឆ្នោត នៅឯមជ្ឈមណ្ឌលសន្និបាតរបស់ក្រុងដូហា ខណៈដែលក្រុមជើងឯកចាស់បារាំង និងគូប្រជែងរបស់ខ្លួន នឹងត្រូវដឹងថា តើពួកគេនឹងជួបក្រុមគូបដិបក្ខណាខ្លះ នៅក្នុងវគ្គចែកពូល (Group Stage) នៃព្រឹត្តិការណ៍ World Cup ទី១ ដែលត្រូវរៀបចំឡើងក្នុងខែវិច្ឆិកា និងធ្នូនេះ។
កិច្ចការនៅតែមិនទាន់ចប់សព្វគ្រប់នៅឡើយទេ សម្រាប់ការប្រកួត នៅវគ្គជម្រុះ ដោយការប្រកួតចុងក្រោយនៅតំបន់ CONCACAF (អាមេរិកខាងជើង និងកណ្តាល ព្រមទាំងតំបន់ការ៉ាប៊ីន) ទើបតែបញ្ចប់ កាលពីល្ងាចថ្ងៃពុធ ហើយការប្រកួត ដើម្បីដណ្ដើមសិទ្ធិ ៣ កៅអីចុងក្រោយ នឹងត្រូវសម្រេច ក្នុងវគ្គចាញ់ធ្លាក់ (Play-off) នៅខែមិថុនាខាងមុខនេះ។
ចំណាត់ថ្នាក់ សម្រាប់ការចាប់ឆ្នោតនេះ គឺផ្អែកលើចំណាត់ថ្នាក់ពិភពលោកចុងក្រោយបង្អស់របស់សហព័ន្ធបាល់ទាត់អន្តរជាតិ (FIFA) ដែលត្រូវបានចេញផ្សាយ កាលពីថ្ងៃព្រហស្បតិ៍ ហើយការប្រកួតជម្រុះ ដែលមានចំណាត់ថ្នាក់ខ្ពស់ជាងគេទាំង ៧ រួមទាំងប្រទេសបារាំង ស្ថិតនៅក្នុងគ្រុបទី១ (Pot 1) រួមជាមួយក្រុមប្រទេសម្ចាស់ផ្ទះ បើទោះបីជាកាតា គឺក្រុម ១ ក្នុងចំណោមក្រុមចូលរួម ដែលមានចំណាត់ថ្នាក់ទាបបំផុតក៏ដោយ។
រដ្ឋឈូងសមុទ្រដ៏តូច ដែលមានប្រជាជនតិចជាង ៣ លាននាក់ បានធ្វើឱ្យពិភពលោកស្រឡាំងកាំង នៅពេលដែលខ្លួនបានឈ្នះសិទ្ធិធ្វើជាម្ចាស់ផ្ទះ ដើម្បីរៀបចំ World Cup នៅឯការបោះឆ្នោតក្នុងឆ្នាំ ២០១០ ដោយនាំឱ្យមានការចោទប្រកាន់ថា មានការទិញសំឡេងឆ្នោត ដែលត្រូវបានបដិសេធយ៉ាងដាច់អហង្ការ និងនាំឱ្យកើតមានសំណួរនានាអំពីភាពស័ក្ដិសមរបស់ប្រទេស សម្រាប់ព្រឹត្តិការណ៍ដ៏ធំនេះ។
បញ្ហាដោយជាក់ស្ដែង គឺការឡើងកម្ដៅខ្លាំង ក្នុងខែមិថុនា និងកក្កដា ជាពេលវេលា ដែល World Cup ត្រូវបានរៀបចំតាមទម្លាប់ ដូច្នេះហើយ ទើបមានការសម្រេចលើកយកទៅរៀបចំនៅរដូវរងាវិញ ហើយជាមួយគ្នានេះ ក៏មានការចោទប្រកាន់ចំពោះលក្ខខណ្ឌការងាររបស់ពលករចំណាកស្រុករាប់សែននាក់ ក្នុងនោះរួមទាំងពលករ ដែលធ្វើការសាងសង់កីឡដ្ឋានផងដែរ។
«វាជារឿងដ៏គួរអស់សំណើច ដែលយើងទៅលេងនៅប្រទេសមួយ ដែល FIFA យល់យ៉ាងម៉េច? ដើម្បីអភិវឌ្ឍបាល់ទាត់ឬ? វាពាក់ព័ន្ធនឹងប្រាក់ ផលប្រយោជន៍ពាណិជ្ជកម្ម នោះគឺហេតុផលចម្បងរបស់ FIFA»។ នេះជាការលើកឡើងរបស់គ្រូបង្វឹកហូឡង់ លោក Louis van Gaal នាពេលថ្មីៗនេះ។
នាយកប្រតិបត្តិនៃគណៈកម្មការកំពូលទទួលខុសត្រូវរៀបចំ World Cup របស់កាតា លោក Hassan al-Thawadi បានហៅការលើកឡើងរបស់លោក Van Gaal ថា គួរឱ្យអស់សំណើច ហើយប្រធាន FIFA លោក Gianni Infantino កំពុងស្វាគមន៍យ៉ាងពេញទំហឹងចំពោះការរៀបចំព្រឹត្តិការណ៍ដ៏ធំ ដែលកើតឡើងរៀងរាល់ ៤ ឆ្នាំម្ដងនេះ។
លោក Infantino បានអះអាងថា៖ «វានឹងមិនត្រឹមតែជាព្រឹត្តិការណ៍ World Cup ដ៏ល្អបំផុតមិនធ្លាប់មានទេ តែថែមទាំងជាព្រឹត្តិការណ៍ដ៏ពិសេសដោយឡែកទៀតផង។ ខ្ញុំមិនធ្លាប់ឃើញប្រទេស ដែលត្រៀមលក្ខណៈបានល្អណាស់ ដើម្បីធ្វើជាម្ចាស់ផ្ទះរៀបចំ World Cup ដូចកាតានេះឡើយ»។
សូម្បីតែការចាប់ឆ្នោតនេះ ក៏មិនអាចផ្ដាច់ខ្លួនពីបញ្ហាធំជាងបាល់ទាត់នោះឡើយ។ ការលុកលុយរបស់ប្រទេសរុស្ស៊ី លើអ៊ុយក្រែន នាំឱ្យការប្រកួត Play-off ដើម្បីដណ្ដើម ៣ កៅអីចុងក្រោយ ក្នុងចំណោមការបានសិទ្ធិទាំង ១៣ ក្រុមរបស់អឺរ៉ុប (UEFA) មានបញ្ហារញ៉េរញ៉ៃខ្លះៗ។
រុស្ស៊ីត្រូវបានដកចេញពីការប្រកួតប្រជែងអន្តរជាតិទាំងអស់ រហូតដល់មានការជូនដំណឹងបន្ថែម ដោយនេះ បានរារាំងក្រុមជម្រើសជាតិមិនឱ្យបានចូលរួមប្រកួតវគ្គ Play-off ហើយជំនួបក្នុងវគ្គនេះ រវាងក្រុមអ៊ុយក្រែន និងក្រុមស្កុតឡេន ត្រូវពន្យារពេលរហូតដល់ខែមិថុនា ដោយក្រុមដែលឈ្នះហ្គេមនេះ ត្រូវឡើងទៅជួបក្រុមវេលស៍ ដើម្បីកៅអីនៅកាតា។
ចំពោះបញ្ហាទាំងអស់ ក៏មាននូវភាពរំភើបរីករាយ ដោយសារការប្រកួតបាល់ទាត់ពិភពលោក ខិតកាន់តែជិត ហើយ FIFA បានប្រកាសកាលពីថ្ងៃពុធថា សំបុត្រជាង ៨០ ម៉ឺនសន្លឹក ត្រូវបានទិញយក គិតមកទល់ពេលនេះ។ ប្រទេសកាតា នឹងប្រើប្រាស់កីឡដ្ឋានចំនួន ៨ សម្រាប់រៀបចំការប្រកួតប្រជែងនេះ។
តែជាមួយភាពចម្រូងចម្រាសទាំងអស់ជុំវិញការរៀបចំ World Cup របស់ប្រទេសកាតានេះ យ៉ាងហោចណាស់ ពេលនេះមានក្រុមចូលរួមចំនួន ៣២ ក្រុម ដែលត្រូវចាប់ឆ្នោតបែងចែកជា ៨ ពូល ដោយ ១ ពូល មាន ៤ ក្រុម ហើយប្រាកដណាស់ ជាចំនួនក្រុមដ៏ល្អឥតខ្ចោះ សម្រាប់ការប្រកួតបាល់ទាត់ដ៏ធំរបស់ពិភពលោក ដែលគ្រប់គ្នាចង់ឃើញបំផុត៕ AFP/VN