ក្រុងបាសេឡូណា: អ្នកទស្សនាដែលជាកំណត់ត្រាពិភពលោក សម្រាប់ការប្រកួតបាល់ទាត់ផ្នែកនារី ដោយមានចំនួន ៩១ ៥៥៣ នាក់ បានមើលឃើញពីការធ្វើដំណើររបស់ក្រុមអ្នកមានបុណ្យ Barcelona ទៅកាន់វគ្គពាក់កណ្តាលផ្តាច់ព្រ័ត្រ នៃក្របខ័ណ្ឌ Champions League ជាមួយនឹងជ័យជម្នះលើក្រុមអធិរាជស Real Madrid ៥-២ ក្នុងការប្រកួតជើងទី២ នៅកីឡដ្ឋាន Camp Nou កាលពីថ្ងៃពុធ ដោយសរុបទាំង ២ ជើង ក្រុមម្ចាស់ផ្ទះមានគ្រាប់បាល់ច្រើនជាង ៨-៣។
តួលេខនៃចំនួននេះ បានវ៉ាដាច់កំណត់ត្រាមុន សម្រាប់ការប្រកួតផ្នែកនារី នៅពេលដែលមនុស្សចំនួន ៩១ ១៨៥ នាក់ បានមកមើលការប្រកួតវគ្គផ្តាច់ព្រ័ត្រ ក្នុងព្រឹត្តិការណ៍ World Cup ឆ្នាំ ១៩៩៩ រវាងក្រុមនារីសហរដ្ឋអាមេរិក និងក្រុមនារីចិន នៅឯកីឡដ្ឋាន Rose Bowl ក្នុងក្រុងប៉ាសាឌីណា (Pasadena)។
ចំនួននេះក៏បានបំបែកកំណត់ត្រា ចំពោះការចូលទស្សនាពីមុន សម្រាប់ការប្រកួតរបស់ក្លិបអាជីពផ្នែកនារី ដែលត្រូវបានបង្កើតឡើង កាលពីខែមីនា ឆ្នាំ ២០១៩ ខណៈដែលអ្នកចូលមកលើកទឹកចិត្តចំនួន ៦០ ៧៣៩ នាក់ បានបាញ់ក្រសែភ្នែកមើលក្រុមនារី Barca ផ្តួលក្រុមនារី Atletico Madrid ក្នុងកីឡដ្ឋាន Wanda Metropolitano។
ជាមួយគ្នានេះដែរ ក្រុមនារី Paris Saint-Germain ត្រូវការគ្រាប់បាល់ នៅក្នុងម៉ោងបន្ថែមពិសេស ដើម្បីអាចតាមស្មើជាមួយក្រុម Bayern Munich ២-២ នៅផ្ទះខ្លួនឯង ដែលជាលទ្ធផលជួយឱ្យពួកគេធ្វើដំណើរទៅវគ្គ ៤ ក្រុមចុងក្រោយ ក្រោយសរុបទាំង ២ ជើង ឈ្នះ ៤-៣។
សម្រាប់ការប្រកួតនេះ កីឡាការរិនី Alexia Putellas ដែលជាម្ចាស់ជយលាភីពាន Ballon d''Or កាលពីខែវិច្ឆិកា គឺជាអ្នកស៊ុតគ្រាប់ទី ៤ ឱ្យក្រុមម្ចាស់ជើងឯកចាស់ Barca បន្ទាប់ពីធ្វើបានសម្រេចម្នាក់ឯង ២ គ្រាប់ ក្នុងជ័យជម្នះ ៣-១ កាលពីហ្គេមជើងទី១។
«វាពិតជាពិសេសណាស់ ហ្គេមបានបញ្ចប់ ហើយគ្មាននរណម្នាក់ ចង់ទៅផ្ទះវិញឡើយ។ យើងកំពុងធ្វើការអបអរជាមួយអ្នកគាំទ្រ។ ពិតជាពិសេសអស្ចារ្យណាស់។ មានមនុស្សច្រើនណាស់។ អ្វី ដែលបានកើតឡើង នៅថ្ងៃនេះ គឺជាប្រវត្តិសាស្ត្រ»។ នេះជាសម្ដីរបស់កីឡាការិនី Putellas។
សម្រាប់ការប្រកួតដ៏ស្វិតស្វាញរវាងក្រុមគូប្រជែងដ៏ធំប្រចាំអេស្ប៉ាញនេះ ក្រុមម្ចាស់ផ្ទះ បានចាប់ផ្ដើមយ៉ាងល្អ ដោយក្នុងរយៈពេលប្រមាណជា ៨ នាទី កីឡាការិនី Mapi Leon បានផ្ដល់នូវគ្រាប់បាល់នាំមុខ តែក្រុមភ្ញៀវ Real មិនត្រឹមតែតាមស្មើប៉ុណ្ណោះទេ ថែមទាំងអាចនាំមុខវិញទៀតផង ដែលបំប៉ោងសំណាញ់ទីដោយកីឡាការិនី Olga (ប៉េណាល់ទី) និងកីឡាការិនី Claudia Zornoza។
ការនាំមុខនោះ ជាក្ដីសង្ឃឹមដ៏ធំដល់ក្រុមនារី Real ដែលប្រឹងប្រែង ដើម្បីកែប្រែលទ្ធផលជើងទី១ តែក្រុមនារី Barca មិនឱ្យរឿងនោះកើតឡើងឡើយ ដោយការទម្លុះសំណាញ់ទី ៤ គ្រាប់ផ្ទួន ដោយកីឡការិនី Aitana Bonmati, Claudia Pina, Putellas និង Caroline Hansen៕ AFP/VN