ក្រុងដូហា: ក្រុមឥន្ទ្រីដែកអាល្លឺម៉ង់ និងគោជល់អេស្ប៉ាញ នឹងត្រូវជួបគ្នានៅឯព្រឹត្តិការណ៍ World Cup ឆ្នាំនេះ បន្ទាប់ពីកម្មវិធីចាប់ឆ្នោតដ៏អធិកអធម កាលពីថ្ងៃសុក្រ ក្នុងទីក្រុងដូហា បានដាក់អតីតក្រុមជើងឯកទាំង ២ ឱ្យនៅក្នុងពូលតែ ១ ខណៈគូសត្រូវខាងនយោបាយដ៏ស្រួចស្រាល់ គឺក្រុមជម្រើសជាតិរបស់សហរដ្ឋអាមេរិក និងអ៊ីរ៉ង់ ក៏ចាប់ឆ្នោតប៉ះពូលជាមួយគ្នាដែរ។
ក្រុមម្ចាស់ជើងឯក ៤ សម័យកាល អាល្លឺម៉ង់ ស្ថិតក្នុងគ្រុប ២ (Pot 2) ដែលធ្វើឱ្យពួកគេក្លាយជាក្រុមច្បាស់ណាស់ ដែលត្រូវចៀសឱ្យផុតពីក្រុមចំណាត់ថ្នាក់ខ្ពស់ សម្រាប់ការប្រកួតប្រជែង នៅក្នុងរដ្ឋធានី នៃប្រទេសកាតានេះ។ ពួកគេបានធ្លាក់ចេញត្រឹមវគ្គសន្សំពិន្ទុតាមពូល កាលពីព្រឹត្តិការណ៍នេះ នៅប្រទេសរុស្ស៊ី ក្នុងឆ្នាំ ២០១៨។
អាល្លឺម៉ង់ និងជើងឯក World Cup 2010 អេស្ប៉ាញ ត្រូវចូលរួមដោយក្រុមសាមូរ៉ៃជប៉ុន ក្នុងពូល E ដែលនឹងត្រូវមកបំពេញបង្គ្រប់ចុងក្រោយ ដោយក្រុម ដែលឈ្នះការប្រកួតជម្រុះអន្តរទ្វីប នៅខែមិថុនា រវាងក្រុមកូស្តារីកា និងនូវែលសេឡង់។
ក្រុមគោជល់ បានយកឈ្នះក្នុងលទ្ធផលច្រើនសន្ធឹក ៦-០ ពេលក្រុមទាំង ២ ជួបគ្នាចុងក្រោយ ក្នុងខែវិច្ឆិកា ឆ្នាំ ២០២០ តែក្រុមឥន្ទ្រីដែក បានអភិវឌ្ឍល្អប្រសើរជាងមុនឆ្ងាយ ចាប់តាំងពីលោក Hansi Flick មកជំនួសតំណែងគ្រូបង្វឹករបស់លោក Joachim Loew។
«ជាក់ស្ដែង វាគឺជាការជួបនូវការចាប់ឆ្នោតដ៏ពិបាកបំផុត ពីគ្រុបទី២ នេះ ជាពិសេស ពេលនេះពួកគេបានធ្វើការផ្លាស់ប្ដូរគ្រូបង្វឹក។ សុំត្រឹមតែទទួលយកវា សម្រាប់ពេលនេះ ហើយប្រឹងប្រែងព្យាយាមឱ្យមាននូវសុទិដ្ឋិនិយមប៉ុណ្ណោះ»។ នេះជាការលើកឡើងរបស់គ្រូបង្វឹកក្រុមអេស្ប៉ាញ លោក Luis Enrique ពាក់ព័ន្ធនឹងការប្រឈមជាមួយអាល្លឺម៉ង់។
ក្រុមអ៊ីរ៉ង់ និងអាមេរិក ដែលអត់មានទំនាក់ទំនងការទូតផ្លូវការជាមួយគ្នាឡើយ តាំងតែពីឆ្នាំ ១៩៨០ មកនោះ បានប្រកួតតទល់គ្នា ជាលើកចុងក្រោយ សម្រាប់វគ្គ Group Stage នេះ នៅឯ World Cup 1998 ក្នុងប្រទេសបារាំង ដែលពេលនោះ អ៊ីរ៉ង់ឈ្នះហ្គេម ដែលគ្របដណ្ដប់ដោយនយោបាយនេះ ក្នុងលទ្ធផល ២-១។
«បាល់ទាត់មានអ្វីលើសពីរឿងនយោបាយច្រើនណាស់ ហើយពួកយើងអាចនៅតែជាមិត្តនៅលើទីលាន»។ គ្រូបង្វឹកក្រុមអាមរិក លោក Gregg Berhalter បានលើកឡើង។
ក្រុមតោកំណាចអង់គ្លេស ក៏ស្ថិតនៅក្នុងពូល B នេះដែរ ហើយនឹងត្រូវប្រឈមជាអ៊ីរ៉ង់សម្រាប់ហ្គេមបើកឆាក។ ក្រុមរបស់លោក Gareth Southgate អាចនឹងប៉ះផងដែរជាមួយក្រុមជិតខាងវេលស៍ ឬស្កុតឡេន បើទោះបីជាក្រុមអ៊ុយក្រែន ក៏អាចមានសិទ្ធិដណ្ដើមកៅអី ១ ចុងក្រោយ សម្រាប់វគ្គជម្រុះចាញ់ធ្លាក់ប្រចាំទ្វីបអឺរ៉ុប ដែលត្រូវសម្រេចនៅខែមិថុនានេះ។
ដោយផ្ទុយពីទម្លាប់ដើម ក្រុមម្ចាស់ផ្ទះកាតា នឹងមិនបានលេង ហ្គេមបើកឆាករបស់ព្រឹត្តិការណ៍នេះ នៅថ្ងៃទី ២១ ខែវិច្ឆិកានោះទេ ដោយកិត្តិយសនោះ នឹងត្រូវធ្លាក់ទៅក្នុងការប្រកួត នៅពូល A រវាងសេណេហ្គាល់ និងហូឡង់ ហើយក្រុមកាតា ដែលទើបបង្ហាញមុខ នៅជុំចុងក្រោយ នៅ World Cup នេះ ត្រូវជួបអេក្វាទ័រ សម្រាប់គូទី២ នៃល្ងាចថ្ងៃនោះ។
ក្រុមកំពុងគ្រងជើងឯកបារាំង នឹងជួបជាមួយក្រុមគូបដិបក្ខជួបគ្នាញឹកញាប់ដាណឺម៉ាក និងទុយនីស៊ី ក្នុងពូល D ដែលនឹងត្រូវមកបង្គ្រប់ដោយក្រុម ដែលឈ្នះការប្រកួតជម្រុះអន្តរទ្វីប ដោយអាចជាក្រុមអូស្ត្រាលី ប៉េរូ ឬក៏អេមីរ៉ាតអារ៉ាប់រួម។
ក្រុមឈ្នះជើងឯកជាកំណត់ត្រា ៥ សម័យកាល ប្រេស៊ីល នឹងត្រូវលេងតទល់ជាមួយក្រុមស៊ែប៊ី និងស្វ៊ីស ដែលទាំង ២ ក្រុម ធ្លាប់បានជួបគ្នារួចហើយ ក្នុងវគ្គ Group Stage នេះ កាលពី ៤ ឆ្នាំមុន ព្រមទាំងក្រុមកាមេរូន នៅក្នុងពូល G ដែលមើលទៅទំនងជាតានតឹងគួរសមដែរ។ ក្រុមជើងឯក ២ សម័យកាល អាហ្សង់ទីនរបស់ស៊ុបភើរស្តារ Lionel Messi ចាប់ឆ្នោតជួបអារ៉ាប៊ី សាអ៊ូឌីត ម៉ិកស៊ិក និងប៉ូឡូញរបស់ខ្សែប្រយុទ្ធ Robert Lewandowski ក្នុងពូល C។
នេះជាឱកាសចុងក្រោយសម្រាប់កីឡាករ Cristiano Ronaldo នៅ World Cup ដោយសាររូបគេនឹងមានអាយុជិត ៣៨ ឆ្នាំ ពេលក្រុមព័រទុយហ្គាល់ ចេញមកតតាំងជាមួយក្រុមហ្គាណា អ៊ុយរូហ្គាយ និងកូរ៉េខាងត្បូង ក្នុងពូល H។
ក្រុមក្រូអាស៊ី ដែលជាជើងឯករង ក្នុងឆ្នាំ ២០១៨ ត្រូវចាប់ឆ្នោតប៉ះក្រុមបែលហ្ស៊ិក និងម៉ារ៉ុក ក្នុងពូល F ដែលត្រូវបានបំពេញឱ្យគ្រប់ ៤ ក្រុម ដោយក្រុមជម្រើសជាតិកាណាដា បន្ទាប់ពីបាត់មុខ ៣៦ ឆ្នាំ។
នេះគឺជា World Cup ដំបូង ដែលត្រូវលើកពីការធ្វើតាមទម្លាប់ ក្នុងខែមិថុនា និងកក្កដា ទៅខែវិច្ឆិកា និងធ្នូ ដោយសារពេលនោះកម្ដៅឡើងខ្លាំងពេក នៅកាតា៕ AFP/VN