ក្រុងឡុងដ៍: ក្រុមមេឃខៀវ Manchester City បានបន្តគ្រប់គ្រងភាពនឹងនរ ដែលកំពុងស្ថិតក្រោមសម្ពាធរបស់ពួកគេកាលពីថ្ងៃសៅរ៍ ដោយបានយកឈ្នះក្រុម Burnley ក្នុងលទ្ធផល ២-០ ហើយដណ្ដើមយកតំណែងលេខ ១ មកវិញ បន្ទាប់ពីត្រូវក្រុមហង្សក្រហម Liverpool ឡើងទៅឈរជំនួស ក្នុងតារាងចំណាត់ថ្នាក់នៃក្របខ័ណ្ឌ Premier League មួយភ្លែត។
សម្រាប់ការប្រកួត នៅឯកន្លែងផ្សេងទៀត កីឡាករ Christian Eriksen បានស៊ុតបញ្ចូលទី ខណៈក្រុម Brentford វាយបកយកឈ្នះក្រុមតោខៀវ Chelsea ៤-១ ដែលនេះ ជាជ័យជម្នះដំបូងរបស់ក្រុមរហស្សនាមសត្វឃ្មុំ លើក្រុមគូប្រជែងរួមក្រុងឡុងដ៍របស់ខ្លួនចាប់តាំងពីឆ្នាំ ១៩៣៩។
ក្រុមលេខ៣ Chelsea នៅតែស្ថិតលើផ្លូវ ក្នុងការបានសិទ្ធិទៅលេង នៅក្របខ័ណ្ឌ Champions League រដូវកាលក្រោយ តែក្ដីសង្ឃឹមរបស់ក្រុមបិសាចក្រហម Manchester United ដែលចង់បញ្ចប់ ក្នុងចំណោមក្រុមនៅទីកំពូលទាំង ៤ (Top4) កំពុងបាត់បង់យ៉ាងឆាប់រហ័ស ក្រោយស្មើជាមួយក្រុមកញ្ជ្រោងខៀវ Leicester ១-១ នៅផ្ទះខ្លួនឯង។
ក្រុម Liverpool ដែលតាមពីក្រោយក្រុម Man City ដល់ទៅ ១៤ ពិន្ទុ ក្នុងខែមករា បានឡើងទៅកាន់កាប់ចំណាត់ថ្នាក់នេះ ដោយសារគ្រាប់បាល់ ដែលកើតឡើងពីការតែតបញ្ចូលទីរបស់ខ្សែប្រយុទ្ធ Diogo Jota នៅពាក់កណ្ដាលវគ្គទី១ និងការស៊ុតបាល់ពិន័យ ១១ ម៉ែត្ររបស់ខ្សែបម្រើ Fabinho នៅចុងម៉ោង នៃវគ្គទី២ បានជួយឱ្យមានជ័យជម្នះលើក្រុមកំពុងយ៉ាប់ Watford ២-០ ពីការប្រកួត ដែលធ្វើឡើងមុនគូផ្សេងៗ។
តែខ្សែបម្រើ Kevin De Bruyne បានជួយសម្រួលភាពច្រាស់ច្រាល់ក្នុងចិត្តរបស់ក្រុម Man City ដោយការស៊ុតឱ្យមានគ្រាប់បាល់នាំមុខ ក្នុងរយៈពេលប្រមាណជា ៥ នាទី ហើយបន្ទាប់មក ខ្សែបម្រើ ១ រូបទៀត គឺ Ilkay Gundogan ធ្វើឱ្យក្រុមភ្ញៀវមានប្រៀបទាំងស្រុងនៅ ២០ នាទីបន្ទាប់ ដោយការបន្ថែមការនាំមុខ ២-០ ដែលលទ្ធផលនេះ នាំឱ្យក្រុមម្ចាស់ផ្ទះ Burnley ត្រូវប្រឈមនឹងការធ្លាក់ចេញពីលីគកំពូលកាន់តែខ្លាំងឡើងៗ។
ក្រុមមេឃខៀវ និងហង្សក្រហម កំពុងជាប់គាំង ក្នុងការប្រកួតប្រជែងដ៏រំជើបរំជួល ដើម្បីដណ្ដើមតំណែងទីកំពូលតារាងរបស់ Premier League ជាមួយនឹងការប្រកួតនៅសល់ ៨ លើកទៀតប៉ុណ្ណោះ ហើយអ្វីដែលសំខាន់នោះ នៅសប្ដាហ៍ក្រោយ ក្រុមគីឡូធ្ងន់ទាំង ២ នេះ ត្រូវប្រឈមគ្នា ក្នុងកីឡដ្ឋាន Etihad ដែលនេះអាចជាហ្គេមកាត់ក្ដី ដើម្បីដឹងថា ក្រុមណានឹងបានគ្រងជើងឯករដូវកាលនេះ។
លើសពីនេះទៀតនោះ ក្រុមទាំង ២ ក៏ត្រូវជួបគ្នា ក្នុងកម្មវិធីអេហ្វអេ (FA Cup) វគ្គ ៤ ក្រុមចុងក្រោយផងដែរ នៅចុងខែនេះ និងព្រមទាំងកំពុងតែស្ថិតក្នុងការប្រកួតប្រជែងដូចគ្នាដែរ នៅ Champions League ក្នុងវគ្គ ៨ ក្រុមចុងក្រោយនៅសប្ដាហ៍បន្ទាប់។
សម្រាប់ក្រុម Liverpool របស់លោក Jurgen Klopp កំពុងប្រឹងប្រែងយ៉ាងខ្លាំង ដើម្បីបានក្លាយជាក្រុមដំបូងគេរបស់អង់គ្លេស ដែលអាចឈ្នះពាន-រង្វាន់សំខាន់ៗដល់ទៅ ៤ ក្នុង ១ រដូវកាល៕ AFP/VN