ក្រុងឡុងដ៍: ក្រុម Tottenham Hotspur (Spurs) បានឡើងមកឈរ ក្នុងចំណាត់ថ្នាក់ទី៤ នៃតារាងពិន្ទុរបស់ក្របខ័ណ្ឌ Premier League ជាមួយនឹងជ័យជម្នះ ៥-១ លើក្រុម Newcastle ខណៈដែលការឈ្នះ ក្នុងលទ្ធផល ២-១ របស់ក្រុម West Ham កាលពីថ្ងៃអាទិត្យ រុញឱ្យក្រុម Everton ធ្លាក់កាន់តែជ្រៅទៅក្នុងក្ដីកង្វល់នៃការដែលត្រូវកាត់ឱ្យទៅលេងនៅលីគទី២ រដូវកាលក្រោយ។
ក្រុម Spurs របស់លោក Antonio Conte បានបង្កើតឱ្យមាននូវការងើបរើប្រសើរឡើងវិញយ៉ាងអស្ចារ្យ រហូតអាចឈ្នះ ៥ លើក ក្នុងចំណោមការប្រកួត ៦ លើកចុងក្រោយរបស់ខ្លួន។ យ៉ាងណាក្ដី ក្រុមភ្ញៀវ Newcastle បានធ្វើដំណើរទៅមុខមុនជាមួយនឹងគ្រាប់បាល់របស់ខ្សែការពារ Fabian Schar តែខ្សែការពារ Ben Davies ជាអ្នកជួយឱ្យក្រុមម្ចាស់ផ្ទះតាមស្មើ មុនចប់វគ្គទី១ នៃការប្រកួតនៅភាគខាងជើងក្រុងឡុងដ៍នេះ។
ចូលដល់វគ្គទី២ កីឡាករ Matt Doherty, Son Heung-min, Emerson Royal និង Steven Bergwijn បានបំប៉ោងសំណាញ់ទីបន្តបន្ទាប់គ្នា ដើម្បីដណ្ដើមជ័យជម្នះយ៉ាងងាយៗឱ្យក្រុម Spurs និងដើម្បីរុញឱ្យឡើងទៅនៅពីលើក្រុមគូប្រជែងរួមក្រុង Arsenal ជាមួយនឹងគ្រាប់បាល់ចំណេញច្រើនជាង ខណៈដែលក្រុមកាំភ្លើង អាចដណ្ដើមចំណាត់ថ្នាក់លេខ ៤ មកវិញ ដោយគ្រាន់តែគេចឱ្យផុតពីបរាជ័យ ពេលធ្វើដំណើរទៅទឹកដីរបស់ក្រុម Crystal Palace នៅយប់ថ្ងៃចន្ទ។
ដោយមិនគិតលើលទ្ធផលនោះ ក្រុមមាន់ខ្នាយមាស នៅតែស្ថិតក្នុងភាពរឹងមាំក្នុងការប្រជែង ដើម្បីដណ្ដើមសិទ្ធិទៅលេង នៅក្របខ័ណ្ឌ Champions League នារដូវកាលក្រោយ បើទោះបីជាលោក Conte បានអះអាងថា វានឹងក្លាយជាអព្ភូតហេតុ ប្រសិនបើបានបញ្ចប់នៅចំណាត់ថ្នាក់ក្នុងចំណោមក្រុមនៅទីកំពូលទាំង ៤ (Top4) ក៏ដោយ។
«វាពិតជាពិបាកណាស់ ក្នុងការប្រជែង ដើម្បីបានសិទ្ធិទៅ Champions League។ យើងចង់ឈរនៅទីនោះ រហូតដល់ចប់រដូវកាល។ យើងត្រូវតែបន្តលេង ក្នុងវិធីសាស្ត្ររបៀបនេះ ជាមួយនឹងថាមពល។ ខ្ញុំពិតជារីករាយណាស់»។ នេះជាការលើកឡើងរបស់លោក Conte។
អ្នកចាត់ការសញ្ជាតិអ៊ីតាលីបន្ថែមថា៖ «ខ្ញុំមានក្ដីរីករាយនេះ តាំងពីមុនឈប់សម្រាកទាត់អន្តរជាតិម្ល៉េះ។ ខ្ញុំនិយាយថា វាពិតជាគួរឱ្យសោកស្ដាយ ដែលយើងត្រូវឈប់សម្រាក។ ខ្ញុំបានសុំឱ្យកីឡាករចាប់ផ្ដើមក្នុងរបៀបដដែល ដែលយើងបានបន្សល់ទុក។ យើងដឹងថា យើងនៅសល់ ៨ ហ្គេមចុងក្រោយ។ ក្រុម Arsenal មានប្រៀបជាងយើង តែក្នុងការលេងទល់នឹងពួកយើង នាពេលនេះ មិនមែនងាយស្រួលឡើយ»។
នៅឯកីឡដ្ឋាន London (London Stadium) ឯនោះវិញ ក្រុមញញួរធំ West Ham របស់លោក David Moyes បានរំកិលឡើងទៅនៅលេខ ៦ ដោយសារគ្រាប់ជ័យជម្នះរបស់កីឡាករ Jarrod Bowen នៅវគ្គទី២ ដែលជាការស៊ុតបញ្ចូលទី នៅថ្ងៃវិលមកលេងឱ្យក្រុមវិញ ក្រោយបាត់មុខ ១ ខែដោយសាររបួសប្រអប់ជើង។
ក្រុមម្ចាស់ផ្ទះ West Ham មានគ្រាប់បាល់នាំមុខដោយខ្សែការពារ Aaron Cresswell នៅនាទីទី៣២ ដែលស៊ុតបាល្រ់ហ្វ៊ីឃិកបញ្ចូលទីយ៉ាងគួរឱ្យស្ងើច មុនពេលខ្សែបម្រើការពារ Mason Holgate ជួយឱ្យក្រុមភ្ញៀវតាមស្មើវិញភ្លាមៗ ក្រោយសម្រាកវគ្គទី១។
តែយ៉ាងណាក៏ដោយ ក្រុម Everton ចាប់ផ្ដើមចាញ់ប្រៀប ដោយសារខ្សែការពារ Michael Keane ត្រូវបានបណ្ដេញចេញ ក្រោយទទួលបានការពិន័យកាតលឿងជាលើកទី២ ហើយទីបំផុត ខ្សែបម្រើប្រយុទ្ធ Bowen ក៏មានឱកាសរកបានគ្រាប់បាល់ជ័យជម្នះឱ្យក្រុម West Ham នៅនាទីទី៥៩។
បរាជ័យជាលើកទី៥ របស់ក្រុម Everton ក្នុងចំណោម ៦ ប្រកួតចុងក្រោយ បាននាំឱ្យពួកគេមានតែ ៣ ពិន្ទុប៉ុណ្ណោះ ពីលើក្រុមដែលស្ថិតក្នុងតំបន់គ្រោះថ្នាក់ ហើយបើទោះបីជាក្រុមរបស់លោក Frank Lampard នៅសល់ ២ ហ្គេមក្នុងដៃ លើក្រុមបាតតារាងលេខ ៣ Watford ក៏ដោយ ក៏កំណត់ត្រាជាមោទនភាពរបស់ពួកគេ ក្នុងការបានលេង នៅក្របខ័ណ្ឌកំពូលរៀងរាល់រដូវកាល ចាប់តាំងពីឆ្នាំ ១៩៥៤-១៩៥៥ នៅតែស្ថិតក្រោមការគំរាមកំហែងយ៉ាងធ្ងន់ធ្ងរប្រាកដណាស់។
លោក Lampard ត្រូវបានសួរសំណួរចំពោះអាកប្បកិរិយារបស់កីឡាករក្នុងក្រុម ក្រោយពួកគេបានធ្លាក់ចេញពីកម្មវិធីអេហ្វអេខាប់ (FA Cup) ក្នុងវគ្គ ៨ ក្រុមចុងក្រោយ ដោយការចាញ់យ៉ាងអាម៉ាស់ ក្រោមថ្វីជើងរបស់ក្រុម Crystal Palace ខណៈការធ្វើដំណើរទៅផ្ទះរបស់ក្រុមបាតតារាង Burnley នៅយប់ថ្ងៃពុធ បានក្លាយជាហ្គេមដ៏សំខាន់ ក្នុងយុទ្ធនាការប្រជែង ដើម្បីរស់របស់ក្រុម Everton៕ AFP/VN