ក្រុងមេនឆេស្ទ័រ: កិច្ចខិតខំប្រឹងប្រែង ដើម្បីឈ្នះពានរង្វាន់ឱ្យបាន ៤ ក្នុង ១ រដូវកាលរបស់ក្រុមហង្សក្រហម Liverpool និងការតាមប្រដេញរបស់ក្រុមមេឃខៀវ Manchester City ដើម្បីបានស្មើនឹងប្រវត្តិសាស្ត្ររបស់ក្រុមគូប្រជែងរួមក្រុង Manchester United ដែលលើកពានដល់ទៅ ៣ កាលពីឆ្នាំ ១៩៩៩ កំពុងតែស្ថិតនៅលើផ្លូវឆ្ពោះទៅរកការប៉ះគ្នា ក្នុងរយៈពេល ២ សប្តាហ៍ខាងមុខ។
ក្រុម Man City ដែលកំពុងឈរនៅទីកំពូលតារាងពិន្ទុ នៃក្របខ័ណ្ឌ Premier League នឹងធ្វើជាម្ចាស់ផ្ទះ នៃការប្រកួត ដែលអាចកំណត់អ្នកគ្រងជើងឯកនាពេលខាងមុខ ទល់នឹងក្រុមលេខ ២ Liverpool នៅថ្ងៃអាទិត្យ នៅមុនពេលក្រុមគូប្រជែងដ៏ស្រួចស្រាល់ទាំង ២ ត្រូវប៉ះគ្នាម្តងទៀត ក្នុងកម្មវិធី FA Cup វគ្គ ១/២ ផ្តាច់ព្រ័ត្រ ក្នុងពហុកីឡដ្ឋាន Wembley នាថ្ងៃទី ១៦ ខែមេសា។
តែយ៉ាងណាក្ដី ឥទ្ធិពលនៃវគ្គ ៨ ក្រុមចុងក្រោយ នៅក្របខ័ណ្ឌ Champions League អាចនឹងក្លាយជាផលប៉ះពាល់ដ៏ធំមួយ ចំពោះក្រុមដែលកំពុងដណ្ដើមបានជើងឯកក្នុងស្រុក។
តាមការសន្មត ក្រុម Liverpool មាននូវការចាប់ឆ្នោតល្អប្រសើរជាង ក្នុងវគ្គ ៨ ក្រុមនេះ ដោយត្រូវជួបជាមួយនឹងក្រុម Benfica ស្របពេលដែលក្រុម Man City ត្រូវប្រឈមជាមួយការប្រកួតចំនួន ២ ជើងដ៏តានតឹង ទល់នឹងក្រុមម្ចាស់ជើងឯកលីគកំពូលអេស្ប៉ាញ Atletico Madrid។
អ្នកចាត់ការក្រុមហង្សក្រហម លោក Jurgen Klopp បានអះអាងថា ក្របខ័ណ្ឌអង់គ្លេស Premier League ជាពានរង្វាន់ដ៏សំខាន់បំផុត ដែលត្រូវប្រជែងឱ្យបានសម្រាប់ក្រុមរបស់គាត់ ដែលបានលើករួចហើយនូវពានលីគខាប់ League Cup នារដូវកាលនេះ តែនោះអាចមិនមែនជាគោលដៅចម្បងរបស់ក្រុម Man City ដោយសារពួកគេចង់បញ្ចប់ការរង់ចាំយ៉ាងយូររបស់ក្លិប ក្នុងការបានក្លាយជាជើងឯកនៅ Champions League។
ការទទួលបានលទ្ធផលផ្សេង ក្រៅពីការដណ្តើមបានជ័យជម្នះប្រកបដោយការជឿជាក់ ពេលដែលក្រុម Atletico ធ្វើដំណើរទៅប្រកួតនៅកីឡដ្ឋាន Etihad នៅរាត្រីនេះ នឹងធ្វើឱ្យលោក Guardiola ជួបការលំបាកលើការបង្កើតឱ្យមានតុល្យភាពក្នុងការជ្រើសរើសក្រុមរបស់លោក សម្រាប់ការដណ្តើមពាន ពេលប៉ះប្រកួតជាមួយនឹងក្រុម Liverpool។
«នៅក្នុងការប្រកួតក្របខ័ណ្ឌ Premier League នាពេលបន្ទាប់ យើងនឹងប៉ះជាមួយក្រុម Liverpool។ យើងដឹងច្បាស់ថា ពួកគេនឹងឈ្នះស្ទើរតែគ្រប់ហ្គេមទាំងអស់ ដោយសង្ឃឹមថា មិនមែនជាការប្រកួតលើកនេះចុះ តែយើងនឹងព្យាយាមធ្វើបែបហ្នឹងដូចគ្នា»។ នេះជាការលើកឡើងរបស់លោក Pep បន្ទាប់ពីក្រុម Man City របស់លោកយកឈ្នះក្រុម Burnley កាលពីថ្ងៃសៅរ៍ ដើម្បីបង្កើតឱ្យមាននូវការនាំមុខ ១ ពិន្ទុ លើក្រុម Liverpool វិញ។
អ្នកចាត់ការទូទៅរបស់ក្រុមមេឃខៀវដែលមានសញ្ជាតិអេស្ប៉ាញរូបនេះ បានបញ្ជាក់ប្រាប់ឱ្យដឹងបន្ថែមថា៖ «នៅពេលដែលអ្នកធ្វើដំណើរមកដល់ខែឧសភា ដើម្បីប្រជែងជើងឯក មានន័យថា អ្នកមាននូវរដូវកាលដ៏ពិសេសអស្ចារ្យមួយ។ ការបានឡើងទៅឈរនៅក្នុងចំណាត់ថ្នាក់នេះ គឺព្រោះតែយើងបានប្រឹងប្រែងយ៉ាងខ្លាំង ហើយយើងបានសម្រេចនូវសមិទ្ធផលនោះ ជារៀងរាល់រដូវកាល»។
ក្រុម Liverpool គ្រាន់តែរីករាយ ដែលអាចមកឈរក្នុងទីតាំងនេះ បន្ទាប់ពីពួកគេបានធ្វើឱ្យការតាមពីក្រោយដល់ទៅ ១៤ ពិន្ទុ កាលពីខែមករា មកនៅត្រឹមគម្លាតតែ ១ ពិន្ទុវិញ៕ AFP/VN