ក្រុងឡុងដ៍: លោក Mikel Arteta បានសុំទោសចំពោះទម្រង់លេងពិបាកទទួលយករបស់ក្រុមកាំភ្លើងធំ Arsenal ក្នុងបរាជ័យ ៣-០ នៅផ្ទះរបស់ក្រុម Crystal Palace ដែលនាំឱ្យមានផលប៉ះពាល់យ៉ាងខ្លាំង ដល់ការប្រឹងប្រែងរបស់ពួកគេ ដើម្បីបានបញ្ចប់ ក្នុងចំណោមក្រុមនៅទីកំពូលទាំង ៤ (Top4) របស់ក្របខ័ណ្ឌ Premier League។
សម្រាប់ហ្គេមនៅកីឡដ្ឋាន Selhurst Park កាលពីថ្ងៃចន្ទនេះ ក្រុមរបស់លោក Arteta ត្រូវធ្វើឱ្យបែកខ្ញែក ដោយសារគ្រាប់បាល់ដែលស៊ុតបញ្ចូលទីនៅវគ្គទី១ ដោយកីឡាករ Jean-Philippe Mateta និង Jordan Ayew។
បន្ទាប់ពីសម្រាកវគ្គទី១ ក្រុមភ្ញៀវមិនអាចប្រមូលផ្ដុំកម្លាំងឱ្យបានប្រសើរឡើងវិញឡើយ ហើយចុងក្រោយ បរាជ័យលើកទី២ ក្នុងចំណោម ៣ ហ្គេមចុងក្រោយរបស់ Arsenal ក៏កើតឡើងជាមួយនឹងបាល់ប៉េណាល់ទីរបស់កីឡាករ Wilfried Zaha នៅចុងម៉ោងនៃវគ្គទី២។
Arsenal បានធ្វើដំណើរចូលមកចុងសប្ដាហ៍កន្លងទៅជាមួយនឹងចំណាត់ថ្នាក់លេខ ៤ តែជ័យជម្នះ ៥-១ របស់ក្រុម Tottenham (Spurs) លើក្រុម Newcastle កាលពីថ្ងៃអាទិត្យ នាំឱ្យក្រុមកាំភ្លើងធំមានសម្ពាធកាន់តែខ្លាំង។
ការប្រជែង ដើម្បីបានសិទ្ធិទៅលេងនៅក្របខ័ណ្ឌ Champions League រដូវកាលក្រោយ តាមរយៈការបញ្ចប់ក្នុងចំណាត់ថ្នាក់ Top4 កំពុងតែក្ដៅគគុក ហើយក្រុម Arsenal កំពុងស្ថិតក្នុងហានិភ័យនៃការធ្លាក់ចេញពីផ្លូវនេះ។ ពួកគេស្ថិតនៅចំណាត់ថ្នាក់ទី៥ ដោយនៅពីក្រោមក្រុម Spurs ដោយសារគ្រាប់បាល់ចំណេញតិចជាង តែលេងតិចជាងក្រុមគូប្រជែងរួមក្រុងឡុងដ៍នេះ
១ ហ្គេម។
ក្រុមញញួរធំ West Ham និងបិសាចក្រហម Manchester United ដែលទាំង ២ ក្រុម តាមពីក្រោយក្រុម Arsenal ៣ពិន្ទុដូចគ្នា ក៏នឹកស្រមៃចង់បានឱកាសរបស់ពួកគេផងដែរ បន្ទាប់ពីមាននូវលទ្ធផល ដែលនាំឱ្យការប្រជែងតំណែង Top4 កាន់តែបើកទូលាយជាងមុន។
«យើងធ្វើឱ្យការប្រជែងមិនអាចទៅរួចដោយវិធី ដែលយើងបានលេង។ អ្នកត្រូវតែមានកាយសម្បទារឹងមាំ និងល្បឿន ហើយបន្ទាប់មក អ្នកត្រូវរកឱ្យឃើញវិធីដ៏ត្រឹមត្រូវ ដើម្បីលេង។ យើងពិតជាលេងមិនស៊ីចង្វាក់គ្នាមែន ហើយនោះគឺជាអ្វី ដែលមិនអាចទទួលយក»។ នេះជាការលើកឡើងរបស់លោក Arteta។
គ្រូបង្វឹកសញ្ជាតិអេស្ប៉ាញបន្ថែមថា៖ «យើងលេងមិនល្អសោះ ជាពិសេសនៅវគ្គទី១។ ខ្ញុំសុំទោសចំពោះអ្នកគាំទ្ររបស់យើងផង។ យើងមិនមានភាពរឹងមាំ ឬការតាំងចិត្ត ដើម្បីគ្រប់គ្រងស្ថានការណ៍នោះទេ។ នោះហើយជាអ្វី ដែលខ្ញុំមានអារម្មណ៍ខឹងសម្បាបំផុត»។
វាជាលទ្ធផលឈឺចាប់ដ៏ធំមួយ សម្រាប់អ្នកគាំទ្ររបស់ Arsenal ដោយសារវត្តមាន ក្នុងទឹកដីរបស់ក្រុម Palace នៃគ្រូបង្វឹករបស់ក្រុមឥន្ទ្រី លោក Patrick Vieira ព្រោះលោកជាអតីតវីរបុរសរបស់ក្រុមកាំភ្លើងធំ ដែលសម្រេចជោគជ័យក្នុងការជួយឱ្យក្លិបឈ្នះពានរង្វាន់នានាយ៉ាងច្រើន៕ AFP/VN