.jpg)
Thiago Silva (ស្ដាំ) របស់ Chelsea ប្រជែងជាមួយ Karim Benzema របស់ Real ក្នុងហ្គេម កន្លងមក។ AFP
ក្រុងឡុងដ៍: ក្រុមតោខៀវ Chelsea ត្រូវប្រឈមនឹងក្រុមអធិរាជស Real Madrid នៅយប់ថ្ងៃពុធ ដែលនឹងកើតឡើង ក្រោយការរងបរាជ័យដ៏ធ្ងន់ធ្ងរបំផុតរបស់ពួកគេ ក្នុងរដូវកាលនេះ តែសមត្ថភាពខាំធ្មេញស៊ូរបស់លោក Thomas Tuchel ក្នុងការធ្វើឱ្យកីឡាកររបស់គាត់មានការផ្តោតស្មារតី គួរតែធានាថា ក្រុមម្ចាស់ជើងឯកក្របខ័ណ្ឌ Champions League កំពុងត្រៀមខ្លួនបានយ៉ាងប្រសើរ សម្រាប់តេស្តសាកល្បងចុងក្រោយនៃភាពអត់ធន់របស់ពួកគេ។
ទោះបីជាបរាជ័យ ក្នុងលទ្ធផល ៤-១ នៅផ្ទះខ្លួនឯង កាលពីថ្ងៃសៅរ៍ ក្រោមថ្វីជើងរបស់ក្រុម Brentford គឺស្ទើរតែជាមិនមែនការត្រៀមខ្លួនដ៏ល្អបំផុត សម្រាប់ការប្រកួតជើងទី១ ក្នុងវគ្គ ១/៤ ផ្តាច់ព្រ័ត្រទល់នឹងក្រុម Real ក៏ដោយ ក៏គ្រូបង្វឹករបស់ក្រុម Chelsea លោក Tuchel បានដោះស្រាយជាមួយនឹងស្ថានភាពដ៏លំបាកបំផុត ក្នុងអំឡុងពេលវឹកវរ ដែលកើតមានក្នុងក្លិបរបស់គាត់យ៉ាងល្អប្រសើរដែរ។
ក្នុងខណៈដែលម្ចាស់ក្លិប Chelsea លោក Roman Abramovich ត្រូវបានរដ្ឋាភិបាលអង់គ្លេសដាក់ទណ្ឌកម្ម ដោយចោទប្រកាន់ ចំពោះទំនាក់ទំនងរបស់គាត់ជាមួយប្រធានាធិបតីរុស្ស៊ី លោក Vladimir Putin បន្ទាប់ពីមានការលុកលុយលើប្រទេសអ៊ុយក្រែន ក្រុមតោខៀវបានធ្លាក់ចូលទៅក្នុងបញ្ហានៃការដួលរលំផ្នែកហិរញ្ញវត្ថុ ដែលគំរាមកំហែងដល់ការលេបត្របាក់ក្រុមរបស់លោក Tuchel។
ដោយមិនអាចចរចាកុងត្រាថ្មីជាមួយកីឡាកររបស់ខ្លួនបាន ដោយសារការដាក់ទណ្ឌកម្មនេះ ក្រុម Chelsea ត្រូវជួបនឹងភាពទាល់ច្រក ខណៈដែលខ្សែការពារសំខាន់ៗ Antonio Rudiger, Andreas Christensen និង Cesar Azpilicueta បាននិងកំពុងពិចារណាចំពោះអនាគតរបស់ខ្លួន។
បើទោះបីជាវាអាចមិនមែនការរំខានគ្រប់គ្រាន់ល្មម នាពេលខាងមុខក៏ដោយ ក៏ការព្រួយបារម្ភ កំពុងតែកើនឡើងដែលថា ក្រុម Chelsea អាចត្រូវបានជាប់ពិន័យរដ្ឋបាល ចំពេលមានភាពវឹកវរ ដែលបង្កឡើងដោយការដាក់ទណ្ឌកម្មនេះ។
Tuchel (កណ្ដាល) ទះដៃអបអរជាមួយកីឡាករ ក្រោយ Chelsea ឈ្នះ Lille នៅ Champions League វគ្គ ១៦ក្រុម ជើងទី២។ AFP
ដោយមានការដាក់កម្រិត ចំពោះចំនួនទឹកប្រាក់ ដែលពួកគេអាចត្រូវចំណាយលើការធ្វើដំណើរទៅប្រកួតក្រៅទឹកដី លោក Tuchel បាននិយាយបែបកំប្លែងថា គាត់សុខចិត្តបើកឡានក្រុងរបស់ក្រុមដោយខ្លួនឯង មុនពេលមានជ័យជម្នះ នៅ Champions League វគ្គ ១៦ ក្រុមចុងក្រោយរបស់ពួកគេ នៅឯផ្ទះរបស់ក្រុម Lille។
តែយ៉ាងណាក្ដី ទោះបីជាក្លិបមានភាពច្របូកច្របល់ក៏ដោយ ក៏លោក Tuchel នៅតែធ្វើឱ្យកីឡាកររបស់គាត់បន្តផ្តោតអារម្មណ៍បានយ៉ាងល្អប្រសើរ ដែលពួកគេ បានឈ្នះការប្រកួត ចំនួន ៦ដងជាប់ៗគ្នា នៅគ្រប់កម្មវិធីប្រកួតទាំងអស់ ពោលគឺភ្លាមៗ បន្ទាប់ពីលោក Abramovich ដាក់លក់ក្លិប។
វាជាការឈ្នះបន្តបន្ទាប់គ្នា ដែលគូសបញ្ជាក់អំពីគុណភាពដ៏ល្អបំផុតរបស់លោក Tuchel ខណៈដែលគាត់បានបង្វែរនូវការរងសម្ពាធណាមួយចេញពីកីឡាកររបស់គាត់ ជាមួយនឹងការឆ្លើយតបប្រកបដោយភាពវៃឆ្លាត និងការយល់ចិត្តយល់ថ្លើម ចំពោះសំណួរអំពីសង្គ្រាមនៅប្រទេសអ៊ុយក្រែន និងផលវិបាក ដែលមិនបានរំពឹងទុកសម្រាប់ក្លិប Chelsea។
ដោយដឹងច្បាស់ថា កីឡាកររបស់គាត់មិនអាចដោះស្រាយក្នុងការមានអារម្មណ៍សោកស្តាយចំពោះខ្លួនឯង ជាមួយនឹងការធ្វើដំណើររបស់ក្រុម Real មកកាន់កីឡដ្ឋាន Stamford Bridge កំពុងលេចស្រមោលស្ទុងៗនោះ លោក Tuchel បានព្យាយាមនិយាយសម្រាលពីទំហំនៃបរាជ័យ ទល់នឹងក្រុម Brentford។
«ក្រោយមានជ័យជម្នះ និងលទ្ធផលល្អយ៉ាងច្រើន ខ្ញុំឥឡូវនេះ នឹងមិនទទួលយកភាពសោកសៅនៃលទ្ធផលនេះ។ ហេតុអ្វីយើងគួរតែអ៊ីចឹង?»។ អ្នកចាត់ការក្រុមតោខៀវ លោក Tuchel បានលើកឡើងដូច្នេះ។
ពាក់ព័ន្ធនឹងបញ្ហាប្រឈម ដែលក្រុម Chelsea ត្រូវតបតទល់នឹងក្រុម Real ដែលកំពុងមានពិន្ទុនាំមុខគេ នៅក្របខ័ណ្ឌ La Liga នេះ លោក Tuchel ប្រាប់ថា៖ «វាជារឿងពិបាកណាស់ ព្រោះវាមិនមែនជារឿងប្រក្រតី សម្រាប់ពួកយើង ចំពោះអ្វី ដែលបានកើតឡើងនោះឡើយ។ វាជារឿងសរុបខ្លីៗ នៃហេតុការណ៍ចម្លែកៗ តែវាជារឿងរបស់យើង និងវាជាកំហុសរបស់យើង»។
សម្រាប់ជំនួបរវាងក្រុម Chelsea និងក្រុម Real នេះ កាលពីរដូវកាលមុន ក្នុងវគ្គ ៤ ក្រុមចុងក្រោយ គឺក្លិបយក្សអង់គ្លេស ទម្លាក់ក្លិបយក្សអេស្ប៉ាញ ដោយការយកឈ្នះពីការប្រកួតទាំង ២ជើង ៣-១៕ AFP/VN
