ក្រុងមេនឆេស្ទ័រ: លោក Pep Guardiola (Pep) បានពោលសរសើរចំពោះការអត់ធន់របស់ក្រុមមេឃខៀវ Manchester City បន្ទាប់ពីកីឡាករ Kevin De Bruyne បានបំបែកការតស៊ូដ៏រឹងប៊ឹងរបស់ក្រុម Atletico Madrid ដោយការដណ្តើមបានជ័យជម្នះ ១-០ ក្នុងការប្រកួតនៅក្របខ័ណ្ឌ Champions League វគ្គ ១/៤ ផ្តាច់ព្រ័ត្រជើងទី១ កាលពីថ្ងៃអង្គារ។
ក្រុម Man City របស់លោក Pep បានប្រើពេលយ៉ាងច្រើនសឹងពេញ ១ យប់ ដោយការប្រើរូបមន្ត ឬវិធីដែលពេញដោយកំហឹង ដើម្បីបំបែកជញ្ជាំងក្រហម-ស នៃតំបន់ការពារដ៏ណែនក្ដន់របស់ក្រុម Atletico សម្រាប់ការប្រកួតនៅកីឡដ្ឋាន Etihad នេះ។
តែលោក Pep បានបញ្ជូនកីឡាករ Phil Foden ឱ្យចូលទីលាន នៅពាក់កណ្ដាលវគ្គទី២ ហើយការបញ្ជូនបាល់យ៉ាងស្អាតអស្ចារ្យពីកីឡាករអន្តរជាតិអង់គ្លេស តម្រង់ទៅកីឡាករអន្តរជាតិបែលហ្ស៊ិក De Bruyne ដែលនៅទីបំផុត បានផ្តល់រង្វាន់ដល់ក្រុម Man City ជាមួយនឹងការមានប្រៀបនៃការប្រកួតនៅទឹកដីរបស់ខ្លួននេះ។
«ខ្ញុំមិនបានរំពឹងថា នឹងឈ្នះ ៣ ឬ ៤ ទល់នឹងសូន្យនោះទេ។ ខ្ញុំដឹងច្បាស់ថា ក្រុមណាដែលយើងកំពុងប្រឈមជាមួយ។ ពួកគេនៅជាមួយគ្នា អស់រយៈពេលជាច្រើនឆ្នាំមកហើយ»។ លោក Pep បានលើកឡើង។
អ្នកចាត់ការសញ្ជាតិអេស្ប៉ាញបន្តថា៖ «ពួកគេការពារបានល្អណាស់ រឹងណាស់ និងខ្លាំងណាស់។ យើងអត់ធន់បានល្អ។ អ្នកត្រូវលេងទល់នឹងក្រុមទាំងនេះ។ ពួកគេចង់ឱ្យអ្នកមានភាពអន្ទះអន្ទែង។ វាជាលទ្ធផលល្អ។ គួរឱ្យសោកស្ដាយ យើងមានឱកាស ២-៣ លើកទៀត ដែលកីឡាករ Kevin De Bruyne មិនអាចស៊ុតបញ្ចូលទីទៀត»។
ខណៈពេលដែលលោក Pep បានមួលគម្របបើកដបទឹក ដើម្បីជាការអបអរដ៏គួរឱ្យរំភើបចិត្ត ដែលគូសបញ្ជាក់ពីអ្វី ដែលជាយប់តេស្តសាកល្បង សម្រាប់ក្រុមរបស់គាត់ ដោយអ្នកចាត់ការរបស់ក្រុម Man City ដឹងថា ការប្រកួត គឺនៅឆ្ងាយពីការបចប់ណាស់។
«ទោះបីនាំមុខ ១-០ ក៏ដោយ ក៏ការធ្វើដំណើរទៅក្រុងម្រ៉ាឌីដ គឺតានតឹងណាស់។ យើងត្រូវតែគ្រប់គ្រងអារម្មណ៍របស់យើង។ វានឹងក្លាយជាតេស្តសម្រាប់ពួកយើង ពោលគឺភាពចាស់ទុំរបស់យើង។ យើងនឹងព្យាយាម ស៊ុតបញ្ចូលទី និងឈ្នះហ្គេមនេះ»។ លោក Pep បានបន្ថែម។
ក្នុងការកំណត់រដូវកាល ដែលមានរយៈពេល ១១ ថ្ងៃ សម្រាប់ក្រុម Man City ដែលតាមប្រដេញ ដើម្បីឈ្នះពានចំនួន៣នោះ នេះគឺជាជោគជ័យ ដែលមានលក្ខណសម្បត្តិគ្រប់គ្រាន់ ដែលបង្ហាញឱ្យឃើញពីទម្រង់លេងប្រកបដោយភាពអត់ធន់របស់ពួកគេ។
តែក្រុម Atletico បានទម្លាក់ក្រុម Manchester United រួចហើយក្នុងវគ្គ ១៦ ក្រុមចុងក្រោយនៅរដូវកាលនេះ ខណៈដែលក្រុម Liverpool កា្លយជាក្រុមរងគ្រោះ ដោយសារក្រុមរបស់លោក Diego Simeone នៅពេលហង្សក្រហម គ្រងជើងឯក ក្នុងឆ្នាំ ២០១៩-២០២០។
ហើយជាមួយគ្នានេះ ក្រុមជើងឯកលីគកំពូលរបស់អេស្ប៉ាញនេះ នឹងមានជំនឿជឿជាក់ថា ពួកគេអាចនឹងបង្កើតឱ្យមាននូវភាពភ្ញាក់ផ្អើលមួយផ្សេងទៀត សម្រាប់ការប្រកួតនៅជើងទី២ នាក្រុងម៉ាឌ្រីដ នាថ្ងៃទី ១៣ ខែមេសានេះ៕ AFP/VN