ក្រុងលីសបោន: ក្រុមហង្សក្រហម Liverpool ចាប់ផ្ដើមមានប្រៀបទាំងស្រុង សម្រាប់ការប្រកួតវគ្គ ១/៤ ផ្តាច់ព្រ័ត្រនៅក្របខ័ណ្ឌ Champions League ទល់នឹងក្រុម Benfica កាលពីថ្ងៃអង្គារ ដោយសារគ្រាប់បាល់ពីកីឡាករ Sadio Mane, Ibrahima Konate និង Luis Diaz បានជួយឱ្យពួកគេមានជ័យជម្នះ ៣-១ ក្នុងការប្រកួតជើងទី១ នៅទីក្រុងលីសបោន (Lisbon)។
ខ្សែការពារកណ្ដាល Konate តែតបាល់បញ្ចូលទីគ្រាប់បាល់ដំបូងរបស់ខ្លួន សម្រាប់ក្រុម Liverpool ពីការទាត់បាល់ចេញជ្រុង មុនពេលខ្សែប្រយុទ្ធ Mane បំប៉ោងសំណាញ់ទី ដើម្បីធ្វើឱ្យក្រុមភ្ញៀវមានប្រៀបកាន់តែខ្លាំង សម្រាប់ការប្រកួត នៅកីឡដ្ឋាន Luz នេះ។
ក្រុមម្ចាស់ផ្ទះ Benfica បានបង្កើតឱ្យមាននូវក្ដីសង្ឃឹមឡើងវិញ នៅដើមវគ្គទី២ នៅពេលដែលការបង្កើតកំហុសរបស់កីឡាករ Konate បានបណ្ដោយឱ្យខ្សែប្រយុទ្ធ Darwin Nunez មានឱកាសបន្ថយការនាំមុខ តែខ្សែបម្រើ Diaz ដែលជាកីឡាករធ្វើបានយ៉ាងអស្ចារ្យស្ទើរពេញ ១ យប់ បន្ថែមគ្រាប់ទី៣ ដើម្បីឱ្យ Liverpool ឈានជើងម្ខាងទៅវគ្គ ១/២ ផ្តាច់ព្រ័ត្រ។
«ពួកគេបានប្រឹងប្រយុទ្ធ ដើម្បីរស់ (ឱ្យមានគ្រាប់បាល់ស្មើវិញ)។ យើងបានបើកចន្លោះប្រហោងតិចតួចដែរ សម្រាប់ពួកគេ។ យើងបានស៊ុតបញ្ចូលទីគ្រាប់ទី៣ ហើយខ្ញុំគិតថា គ្រប់គ្នាយល់ស្របដូចគ្នាថា យើងអាច និងគួរតែមានគ្រាប់ច្រើនជាងនេះបន្ថែមទៀត»។ នេះជាការលើកឡើងរបស់គ្រូបង្វឹកក្រុម Liverpool លោក Jurgen Klopp។
ក្រុម Liverpool នឹងមានទំនុកចិត្តកាន់តែខ្ពស់ ក្នុងការបញ្ចប់កិច្ចការរបស់ខ្លួននៅទឹកដី Anfield នាសប្តាហ៍ក្រោយ ដោយលោក Klopp មានភាពងាយស្រួលគ្រប់គ្រាន់ ក្នុងការសម្រេចចិត្តដូរកីឡាករ Mohamed Salah, Mane និង Thiago Alcantara ដោយមិនរារែក បន្ទាប់ពីការប្រកួតដំណើរការទៅបាន ១ ម៉ោង។
ជាពិសេស ខ្សែប្រយុទ្ធ Salah ប្រាកដណាស់ពិតជាត្រូវរក្សាទុក សម្រាប់ថ្ងៃអាទិត្យ នៅពេលក្រុម Liverpool ត្រូវប្រឈមជាមួយក្រុមមេឃខៀវ Manchester City នៅកីឡដ្ឋាន Etihad ជាអ្វី ដែលអាចជាហ្គេមកំណត់ សម្រាប់ការប្រកួតប្រជែងដណ្តើមជើងឯកដ៏តានតឹងនៃក្របខ័ណ្ឌ Premier League។
រឿងដែលគួរឱ្យសោកស្ដាយតែ ១ គត់ គឺថា កីឡាករ Salah មិនអាចមានឈ្មោះនៅលើក្ដារលោតឈ្មោះអ្នកស៊ុតបញ្ចូលទី ខណៈដែលកីឡាករអន្តរជាតិអេហ្ស៊ីប បានបណ្ដោយឱ្យឱកាសជាច្រើនបាត់បង់អសារឥតការ។
លោក Klopp បានបន្ថែមទៀតថា៖ «គ្រប់កីឡាករទាំង-អស់ ក្នុងស្ថានភាពនោះ ចង់ស៊ុតបញ្ចូលទី ហើយវាច្បាស់ណាស់ ដែល Mo (ឈ្មោះខ្លីរបស់ Mohamed Salah) ក៏ចង់រកគ្រាប់បាល់ឱ្យបានដូចគ្នាដែរ។ វាជាពេលវេលាដ៏លំបាក ក្មេងៗ (កីឡាករ) ទើបត្រឡប់ពីការប្រកួតនៅអាហ្វ្រិកវិញ ហើយស្ថានភាពនោះ ពិតជាមិនងាយស្រួលឡើយ។ ជាសម្ពាធដ៏ធំមួយ។ ពួកគេត្រូវការពេលវេលា ដើម្បីដោះស្រាយ ពោលគឺគ្រប់យ៉ាងនឹងប្រសើរឡើងជាមិនខាន»៕ AFP/VN