.jpg)
Golovkin (ស្ដាំ) បង្ហាញខ្សែក្រវាត់ស្ថាប័ន WBC, WBA និង IBF ក្រោយចប់ប្រកួតទល់នឹង Canelo កន្លងមក។ AFP
ក្រុងតូក្យូ: អ្នកប្រដាល់ឆ្នើមក្នុងប្រភេទទម្ងន់មធ្យម Gennady Golovkin វិលត្រឡប់មកសង្វៀនវិញជាលើកដំបូង ក្នុងរយៈពេល ១៦ ខែនៅថ្ងៃសៅរ៍ ដែលការមានជ័យជម្នះលើកីឡាករសញ្ជាតិជប៉ុន Ryota Murata អាចនឹងបង្កើតឱ្យមានជំនួបលើកទី៣ ដែលត្រូវបានទន្ទឹងរង់ចាំជាយូរជាមួយកីឡាករ Saul Canelo Alvarez។
ម្ចាស់ខ្សែក្រវាត់របស់ស្ថាប័ន IBF ដែលមានរហស្សនាម «GGG» Golovkin ដែលឈ្នះ ៤១ ដង ស្មើ ១ ដង និងចាញ់ ១ ដង ក្នុងនោះផ្ដូលគូប្រកួតឱ្យសន្លប់ ៣៦ ដង នឹងត្រូវជួបជាមួយអ្នកប្រដាល់ Murata (ឈ្នះ ១៦ និងចាញ់ ២ ដង) ដែលគ្រងខ្សែក្រវាត់ស្ថាប័ន WBA ដើម្បីគ្រងខ្សែក្រវាត់រួមក្នុងការប្រកួតនៅសៃតាម៉ានៃភាគខាងជើងក្រុងតូក្យូ។
អ្នកប្រដាល់កណ្ដាប់ដៃធ្ងន់សញ្ជាតិកាហ្សាក់ស្ថាន ត្រូវបានកោតសរសើរថា ជាអ្នកប្រដាល់ដ៏មានកេរ្តិ៍ឈ្មោះល្បីល្បាញបំផុត ដែលដើរចូលមកក្នុងសង្វៀននៅប្រទេសជប៉ុន គិតចាប់តាំងពីអតីតម្ចាស់ខ្សែក្រវាត់ពិភពលោកក្នុងប្រភេទទម្ងន់ធ្ងន់ លោក Mike Tyson ដែលត្រូវបានវាយឱ្យសន្លប់នៅក្រុងតូក្យូ ដោយគូបដិបក្ខខ្សោយ Buster Douglas ដោយនោះអាចចាត់ទុកថា ជាបរាជ័យសោកសៅធំបំផុតរបស់វិស័យកីឡាប្រដាល់ ក្នុងឆ្នាំ ១៩៩០។
Murata លើកដៃ ក្រោយទទួលបានជ័យជម្នះ ក្នុងការប្រកួតកន្លងមក។ AFP
រង្វាន់ដែលជាដើមទុនដ៏ធំសម្រាប់កីឡាករ Golovkin គឺការឡើងសងសឹក ក្នុងជំនួបលើក ៣ ដែលអាចនឹងកើតមាន នាពេលខាងមុខ ជាមួយស្ដេចប្រដាល់ វៃ៉មិនរើសទម្ងន់ Alvarez នៅចុងឆ្នាំនេះ ដោយអ្នកប្រដាល់ម៉ិកស៊ិក មានប្រៀបស្ទើរតែគ្រប់ទឹកក្នុងការប្រកួត ២ លើកកន្លងមក។
ប្រសិនបើអ្នកប្រដាល់ទាំង ២ ដែលទំនងជាលាក់កំបាំងនូវភាពជាបដិបក្ខរវាងគ្នា និងគ្នាយ៉ាងពិតប្រាកដ នៅតែមិនចាញ់មិនឈ្នះ ក្នុងការប្រកួតនាពេលខាងមុខរបស់ពួកគេ នោះការតទល់គ្នាលើកទី៣ នៅខែកញ្ញា អាចនឹងបំបែកកំណត់ត្រានៃការលក់សំបុត្រ និងការចំណាយ ដើម្បីបានមើលតាមកញ្ចក់ទូរទស្សន៍។
Alvarez ដែលបានផ្ដូលគូប្រកួតទាំងអស់ ដោយប្រមូលខ្សែក្រវាត់ទាំង ៤ ស្ថាប័ន ក្នុងប្រភេទទម្ងន់មធ្យម កាលពីឆ្នាំមុន ក្នុងរយៈពេលតែ ១១ ខែ នឹងត្រូវដំឡើងគីឡូទៅទម្ងន់ធ្ងន់ (ចន្លោះពី ៧៥ ដល់ ៨១ គ.ក) ដើម្បីដណ្ដើមខ្សែក្រវាត់ស្ថាប័ន WBA ពីអ្នកប្រដាល់មិនចាញ់សោះសញ្ជាតិរុស្ស៊ី Dmitry Bivol នៅថ្ងៃទី ៧ ខែឧសភា។
Golovkin ដែលត្រូវឈានដល់វ័យ ៤០ ឆ្នាំ នៅថ្ងៃសុក្រនេះ មិនធ្លាប់ឈ្នះគូបដិបក្ខសញ្ជាតិម៉ិកស៊ិកនេះឡើយ។
ការជួបគ្នាលើកទី១ របស់ពួកគេ ក្នុងខែកញ្ញា ឆ្នាំ ២០១៧ ឃើញថា Golovkin បង្ហាញនូវទម្រង់ដ៏គួរឱ្យជឿជាក់ ដោយមនុស្សជាច្រើនជឿថា រូបគេនឹងមានជ័យជម្នះ តែចៅក្រមបានប្រកាសឱ្យការប្រកួតនោះស្មើគ្នា ហើយការរៀបចំឱ្យប៉ះគ្នាម្ដងទៀតនៅ ៨ ខែក្រោយ ត្រូវបានផ្អាកដោយសារ Alvarez ធ្វើតេស្តឃើញសារធាតុហាមឃាត់។
ហើយនៅទីបំផុត នៅពេលជំនួបទី២ នោះ បានកើតឡើងនៅក្នុងខែកញ្ញា ឆ្នាំ ២០១៨ Alvarez បានប្រឹងប្រែងរហូតបានជ័យជម្នះ ដោយការទទួលបាននូវការផ្ដល់ពិន្ទុដោយភាគច្រើន បន្ទាប់ពីបញ្ចប់នូវការប្រកួតដ៏ជក់ចិត្ត នាពេលនោះ។
កីឡាករ Golovkin បាននិយាយថា ការប្រជែងជាមួយ Alvarez មិនមែនជារឿងតែ ១ គត់ ដែលបើកបង្ហាញពីអាជីពរបស់គេនោះឡើយ នៅក្នុងបទសម្ភាសថ្មីៗនេះ ជាមួយវេបសាយ Bleacher Report ដោយចង្អុលបង្ហាញដល់ការការពារខ្សែក្រវាត់ពិភពលោក ២១ លើករបស់គេ ដែលជាការសម្រេចបានជាកំណត់ត្រាក្នុងប្រភេទទម្ងន់មធ្យម។
«ប្រសិនបើខ្ញុំនឹងឈានដល់ការប្រកួតលើកទី៣ ជាមួយ Canelo នោះ វាពិតជានឹងមានគំនិតផ្សេងៗគ្នា ហើយមិនមែនជាមួយនឹងគំនិត នៃការកែកំហុសណាមួយទេ។ ខ្ញុំមិនចូលប្រឡូកក្នុងវិស័យប្រដាល់ ដើម្បីបង្ហាញអ្វីមួយដល់អ្នកណានោះឡើយ»។ នេះជាការឱ្យដឹងបន្ថែមរបស់ Golovkin ដែលប្រាប់ប្រព័ន្ធផ្សព្វផ្សាយ DAZN ដោយបញ្ជាក់ថា រូបគេមិនត្រូវបានរំខានដោយលទ្ធផលពីការប្រកួត ២ លើកដំបូងនោះឡើយ៕ AFP/VN
