.jpg)
អ្នកចាត់ការរបស់ក្រុម Liverpool លោក Jurgen Klopp។ រូបថត Twitter
ក្រុងឡុងដ៍: អ្នកចាត់ការរបស់ក្រុម Liverpool លោក Jurgen Klopp បាននិយាយផ្ទុយនឹងការយល់ថា ការប្រកួតនាថ្ងៃអាទិត្យចុងសប្ដាហ៍នេះ នៅផ្ទះរបស់ក្រុមមេឃខៀវ Manchester City គឺជាការកំណត់ជើងឯករបស់ក្របខ័ណ្ឌ Premier League។
ជ័យជម្នះ នៅឯកីឡដ្ឋាន Etihad នឹងនាំឱ្យ Liverpool ឈ្នះការប្រកួតក្នុងលីគជាលើកទី១១ ជាប់ៗគ្នា ហើយធ្វើឱ្យពួកគេនាំមុខដាច់ ២ ពិន្ទុលើក្រុម Man City នៅទីកំពូលតារាងជាមួយនឹងការប្រកួតនៅសល់ចំនួន ៧ លើកទៀត។
តែទោះមានជោគជ័យលើក្រុម Man City ក៏ដោយក៏គ្មានការធានាថា Liverpool នឹងបញ្ចប់រដូវកាល ដោយរលូនឡើយ ដោយជំនួបជាមួយក្រុមគូប្រជែងរួមក្រុង Everton និងក្រុមគូប្រជែងស្លាប់រស់ Manchester United នឹងកើតមាននៅមុនដំណាច់ខែនេះ។
ក្រុមហង្សក្រហមនឹងធ្វើដំណើរឆ្លងកាត់ភាគពាយព្យឆ្ពោះទៅកាន់ទីក្រុងមេនឆេស្ទ័រ ជាមួយនឹងជ័យជម្នះ ៣-១ នៅក្រៅទឹកដីលើក្រុម Benfica ពីការប្រកួតជើងទី១ នៃក្របខ័ណ្ឌ Champions League ក្នុងវគ្គ ៨ ក្រុមចុងក្រោយ ដែលជាលទ្ធផលបានធ្វើឱ្យក្រុមម្ចាស់ជើងឯកទ្វីបអឺរ៉ុប ៦ សម័យកាល ស្ថិតនៅលើគែមនៃវគ្គ ១/២ ផ្ដាច់ព្រ័ត្រ។
«ប្រសិនយើងឈ្នះក្រុម Man City ដែលពិបាកនឹងកើតឡើងហើយនោះ ខ្ញុំគិតថា គ្មាននរណានឹងគិតថា នោះជាការកំណត់ជើងឯកឡើយ ដ្បិតគុណភាពរបស់ក្រុមគូបដិបក្ខ មិនធម្មតានោះទេ។ ឥឡូវនេះ យើងត្រូវលេងទល់នឹងក្រុមដ៏ល្អបំផុតក្នុងលោក តែយ៉ាងណាយើងនឹងព្យាយាមសាកមើល»។ គ្រូបង្វឹករបស់ក្រុម Liverpool លោក Klopp បានប្រាប់ទៅអ្នកសារព័ត៌មាន កាលពីថ្ងៃពុធ។
អ្នកចាត់ការសញ្ជាតិអាល្លឺម៉ង់បានបន្តថា៖ «គ្រប់គ្នាដឹងច្បាស់ពីសារៈសំខាន់នៃការប្រកួតនាពេលបន្ទាប់នេះ តែបន្ទាប់ពីហ្គេមនេះ នឹងមានការប្រកួតផ្សេងទៀត នៅក្នុងកម្មវិធីមួយផ្សេងទៀត ហើយក៏មាន នៅ Premier League ផងដែរ»។
«បើអ្នកមិនអាចឈរទី១ ទេ អ្នកចង់បានលេខ ២។ បើអ្នកតាមពីក្រោយ បន្ទាប់មកអ្នកចង់តាមឱ្យកាន់តែកៀក។ បើអ្នកទៅកាន់តែកៀកច្បាស់ណាស់ អ្នកប្រាកដជាចង់វ៉ាទៅមុខម្ដង។ នោះគឺជាកិច្ចការ ដែលត្រូវធ្វើហើយយើងនឹងធ្វើការប្រឹងប្រែងឱ្យសមតាមកម្លាំងរបស់យើង»។ នេះជាការបន្ថែមរបស់លោក Klopp៕ AFP/VN
