ភ្នំពេញៈ អ្នកគាំទ្រប្រដាល់ភាគច្រើន ដែលបានទស្សនាការប្រកួតព្រឹត្តិការណ៍ «ស្តេចប្រដាល់អង្គរ» ដែលបានរៀបចំឡើងជាលើកដំបូង នៅលើទឹកដីខេត្ត សៀមរាប កាលពីយប់ថ្ងៃអាទិត្យ បានសម្តែងការខកចិត្ត និងឈឺចាប់ នៅពេលឃើញកីឡាករជើងខ្លាំងរបស់កម្ពុជាចំនួន ៣ នាក់ បានសន្លប់ក្រោមកណ្តាប់ដៃរបស់អ្នកប្រដាល់ចិន ត្រឹមទឹកទី១ ហើយ៣ នាក់ទៀត បានចាញ់ពិន្ទុ សម្រាប់ការប្រកួតបែបឃីកបុកស៊ីង ដែលខុសទៅនឹងជំនាញពិតគុនខ្មែររបស់ពួកគេ។
សម្រាប់ប្រកួតចំនួន ១០ គូ ដែលបានធ្វើនៅមុខអង្គរជាលើកដំបូងនេះ កីឡាករលំដាប់ខ្លាំងរបស់កម្ពុជា ឡៅ ចន្ទ្រា, ព្រមទាំង សូត្រ វាសនា និង ឈឿង ល្វៃ សុទ្ធតែបានសន្លប់ ត្រឹមទឹកទី១ ក្រោមកណ្តាប់ដៃរបស់អ្នកប្រដាល់ចិន ព្រោះការប្រកួតឃីកបុកស៊ីងនេះ គេកំណត់មិនឱ្យវាយកែង និងចូលចាប់ក្រៀកបុកជង្គង់ ទៅតាមជំនាញនៃប្រដាល់គុនខ្មែររបស់ពួកគេនោះទេ។
ចំណែកជើងខ្លាំង ឡៅ ចិត្ត្រា, ផល សោភ័ណ្ឌ, និង ព្រំ សំណាង ក៏បាន ចាញ់ពិន្ទុកីឡាករចិន សម្រាប់ការប្រកួតឃីកបុកស៊ីងនេះដូចគ្នា គឺមានតែកីឡាករ លន បញ្ញា និងកីឡាការិនី នូវ ស្រីពៅ ប៉ុណ្ណោះ ដែលបានយកឈ្នះអ្នកប្រយុទ្ធរបស់ចិន ដើម្បីទទួលបានពាន សម្រាប់ការប្រកួត «ស្តេចប្រដាល់អង្គរ» ជាលើកដំបូងនេះ។
ជាមួយលទ្ធផលនៃការប្រកួតនេះ បានធ្វើឱ្យអ្នកគាំទ្រភាគច្រើន ដែលបានទស្សនាការប្រកួត «ស្តេចប្រដាល់អង្គរ» នេះ មានការឈឺចាប់ និងខូចចិត្តខ្លាំង ដោយពួកគេបាននាំគ្នារិះគន់ថា ការប្រកួតនេះ មិនបានលើកតម្លៃនៃក្បាច់គុនបុរាណខ្មែរនោះទេ ព្រោះការរៀបចំនេះ បែរជាយកអ្នកមានជំនាញប្រដាល់គុនខ្មែរ ទៅប្រកួតឃីកបុកស៊ីង ហើយត្រូវបានកីឡាករមានជំនាញឃីកបុកស៊ីងរបស់ចិន វ៉ៃឱ្យសន្លប់គួរឱ្យសង្វេគ និងខ្លះទៀតចាញ់ពិន្ទុ ទាំងមិនអស់ចិត្ត។
អ្នកសារព័ត៌មានកីឡារបស់កម្ពុជា ម្នាក់ដែលបានចូលរួមផ្ទាល់ នៅក្នុងការប្រកួត «ស្តេចប្រដាល់អង្គរ» នៅខេត្តសៀមរាបនេះ បានប្រាប់ ភ្នំពេញ ប៉ុស្តិ៍ ដោយសុំមិនឱ្យបញ្ចេញឈ្មោះថា៖ «ការ ប្រកួតនេះ មើលទៅធំដុំណាស់ ដោយមានការផ្សព្វផ្សាយផុសផុលពេញប្រទេស ចំណែកការចំណាយទៅលើការរៀបចំវិញ អស់ច្រើនម៉ឺនដុល្លារណាស់ ចុះហេតុអ្វីឱ្យតម្លៃខ្លួនកីឡាករកម្ពុជា តិចម្ល៉េះ? តាមខ្ញុំដឹង មានតែកីឡាករកម្ពុជាម្នាក់ទេ ដែលបានតម្លៃខ្លួន និងប្រាក់រង្វាន់ចូល ១ ពាន់ដុល្លារ ចំណែកអ្នកផ្សេងទៀត បានមិនច្រើនទេ។ ចំពោះលទ្ធផលវិញ កីឡាករកម្ពុជាយើងបានសន្លប់ និងចាញ់ពិន្ទុច្រើនណាស់ ហើយបែបៗនេះ តើគុនខ្មែរយកមុខទៅទុកនៅឯណា?»។
ជាមួយគ្នានេះជើងខ្លាំង ឡៅ ចិត្ត្រា ដែលបានចាញ់ Wei Wei Yang ដោយពិន្ទុ ក្នុងប្រភេទទម្ងន់ ៦៤ គ.ក្រនោះ ក៏បានប្រតិកម្ម និងបង្ហាញពីការមិនអស់ចិត្ត ចំពោះការប្រកួតឃីកបុកស៊ីង លើកនេះផងដែរ ដោយម្ចាស់មេដាយសំរឹទ្ធស៊ីហ្គេម រូបនេះ បានសរសេរបង្ហោះនៅលើហ្វេសប៊ុករបស់ខ្លួនថា៖ «បើវាយគុនខ្មែរជាមួយគាត់ម្ដងទៀត ខ្ញុំនឹងមិនយកតម្លៃខ្លួនឡើយ»។
តែទោះបីជាយ៉ាងណា អ្នកជំនាញ និងថ្នាក់ដឹកនាំរបស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ ២០២៣ (CAMSOC) បានលើកឡើង តាំងពីមុនការប្រកួតថា នេះជាការចាប់ផ្តើមយុទ្ធនាការផ្សព្វផ្សាយកីឡាប្រពៃណី អត្តសញ្ញាណជាតិ ដោយមិនផ្តោតខ្លាំងទៅលើលទ្ធផលចាញ់ឈ្នះពេកនោះទេ ប៉ុន្តែជាការប្រកួតដកស្រង់បច្ចេកទេស ដើម្បីត្រៀមការប្រកួត នៅស៊ីហ្គេម ជាពិសេសដើម្បីលើកកម្ពស់កីឡាប្រពៃណីរបស់កម្ពុជា នៅលើឆាកអន្តរជាតិ ក្នុងដំណើរឆ្ពោះទៅស៊ីហ្គេម ឆ្នាំ ២០២៣ ដែលកម្ពុជាត្រូវធ្វើជាម្ចាស់ផ្ទះ ជាលើកដំបូង។
លោក វ៉ាត់ ចំរើន អគ្គលេខាធិការ CAMSOC បានថ្លែងថា៖ «គោលបំណងនៃការប្រកួត (ស្តេចប្រដាល់អង្គរ) នេះ មិនមែនជាការប្រកួតស៊ីសាច់ហុតឈាម យកឈ្នះចាញ់នោះទេ គឺជាការប្រកួតមិត្តភាពអន្តរជាតិ ហើយជាការប្រកួត ដើម្បីជំរុញការផ្សព្វផ្សាយគុនខ្មែររបស់យើង ជាមួយគុនចម្រុះអន្តរជាតិ អ៊ីចឹងគោលបំណង មិនមែនរៀបចំឱ្យខ្មែរឈ្នះទាំងអស់ ឬក៏ចង់ឱ្យអ្នកប្រដាល់អន្តរជាតិគាត់ឈ្នះទាំងអស់នោះទេ»។
លោកបានបន្ថែមថា៖ «នៅត្រង់ចំណុចនេះ ខ្ញុំចង់ទាញអារម្មណ៍អ្នកទាំងអស់គ្នា កុំឱ្យគិតខ្លាំងទៅលើការឈ្នះចាញ់ ព្រោះមិនមែនជាការប្រកួតយកកិត្តិយសមេដាយនោះទេ គឺគ្រាន់តែជាការយកឈ្នះចាញ់ ដោយផ្នែកបច្ចេកទេស ហើយកីឡាកររបស់យើង មានឱកាសក្នុងការបញ្ចេញសមត្ថភាពរបស់ខ្លួននៅមុនស៊ីហ្គេមនៅវៀតណាម ជាពិសេស គឺក្រុមឃីកបុកស៊ីង នេះតែម្តង»។
តាមរយៈការប្រកួតឃីកបុកស៊ីងនោះ កីឡាករ សូត្រ វាសនា ត្រូវបានចិន Yang Hua ម៉ាត់ពោះបណ្តាលឱ្យសន្លប់ ក្នុងទឹកទី១ គឺដូចគ្នានឹង ឡៅ ចន្ទ្រា ដែលត្រូវបានអ្នកប្រយុទ្ធចិន Luo Chao ម៉ាត់ពោះទឹក បណ្តាលឱ្យសន្លប់ ក្នុងទឹកទី១ ដូចគ្នា។ រីឯ ឈឿន ល្វៃ បានសន្លប់ក្រោមកណ្តាប់ដៃចិន Han Wenbao នៅចុងទឹកទី១។ ចំណែក ឡៅ ចិត្ត្រា ចាញ់ពិន្ទុ Wei Wei Yang ហើយ ព្រំ សំណាង ចាញ់ចិន Wang Aogang ខណៈ ផល សោភ័ណ្ឌ បានចាញ់ជើងខ្លាំងរបស់ចិន Wei Rui ដូចគ្នា។
ផ្ទុយពីនេះកីឡាករ លន បញ្ញា បានយកឈ្នះពិន្ទុចិន Shang Xifeng ហើយកីឡាការិនី នូវ ស្រីពៅ បានយកឈ្នះ Li Lishan ដោយពិន្ទុដែរ។ ចំពោះការប្រកួតម៉ារ៉ាតុងលក្ខណៈគុនខ្មែរវិញ កីឡាករកម្ពុជា វ៉ាន់ វឿន បានឈ្នះពិន្ទុចិន Su Kexin ហើយ ឈុត សេរីវ៉ាន់ថង ឈ្នះ Wei Xi Qin ហើយការជួបគ្នា នៅវគ្គផ្តាច់ព្រ័ត្រ វ៉ាន់ថង បានទាត់ វ៉ាន់ វឿន ឱ្យខូចជើងក្រោម នៅទឹកទី២៕