.jpg)
Leclerc (ឆ្វេង) របស់ Ferrari អបអរសាទរ នៅលើវេទិកា ក្បែរអ្នកមកដល់ទីព្រ័ត្រទី៣ Russell របស់ Mercedes។ AFP
ក្រុងមែលប៊ន: កីឡាករ Charles Leclerc ធ្វើបានយ៉ាងល្អឥតខ្ជោះ ដោយនាំមុខ តាំងពីចេញដំណើរដំបូងរហូតដល់ទីបញ្ចប់ ដើម្បីធ្វើឱ្យក្រុមប្រណាំង Ferrari ទទួលបាននូវជ័យជម្នះទាំងស្រុង ពីប្រណាំងរថយន្ត Formula 1 (F1) ក្នុងកម្មវិធី Australian Grand Prix កាលពីថ្ងៃអាទិត្យ ខណៈម្ចាស់ជើងឯកពិភពលោក Max Verstappen មិនអាចបញ្ជារថយន្តឱ្យដល់ទីព្រ័ត្រ។
កីឡាករនាំមុខគេ សម្រាប់ការប្រណាំងជើងឯកពិភពលោក ទៅពីប្រទេសម៉ូណាកូរូបនេះ បានចាប់ផ្ដើមពីទីតាំងលេខ ១ ហើយមិនភ្លាត់តាមពីក្រោយគូបដិបក្ខឡើយ ដោយមានប្រៀបជានិច្ច សម្រាប់ការប្រណាំងទាំង ៥៨ ជុំ នៅឯទីលាន Albert Park រហូតបានលើកទង់ក្រឡាចត្រង្គ ដោយការទៅដល់ទីព្រ័ត្រមុនចំនួន ២០,៥ វិនាទី។
អ្នកបើកបរ Sergio Perez របស់ក្រុម Red Bull ដល់ទីលេខ ២ ខណៈដែលកីឡាករ George Russell ផ្ដល់កម្លាំងជំរុញ សម្រាប់ក្រុម Mercedes ជាមួយនឹងការមកដល់ទីព្រ័ត្រទី៣ ហើយមិត្តរួមក្រុមរបស់គេ Lewis Hamilton ដែលជាជើងឯកពិភពលោក ៧ សម័យកាល ជាប់លេខ ៤។
«ពិតជាអស្ចារ្យណាស់ រថយន្តពិតជាមិនគួរឱ្យជឿថ្ងៃនេះ។ ជាការប្រណាំង និងល្បឿនអ្វីក៏ល្អម្ល៉េះនៅថ្ងៃនេះ។ និយាយដោយត្រង់ រថយន្តអីក៏ល្អម្ល៉េះថ្ងៃនេះ។ ខ្ញុំធ្វើបានល្អពេញ ១ ចុងសប្តាហ៍នេះ តែវាមិនអាចទៅរួចទេ បើគ្មានរថយន្តដ៏ពិសេសនេះ។ ខ្ញុំពិតជាសប្បាយចិត្តណាស់»។ នេះជាសម្ដីរបស់អ្នកបើកបរ Leclerc។
កីឡាករវ័យ ២៤ ឆ្នាំ បន្ថែមទៀតថា៖ «ដោយជាក់ស្តែង យើងទើបតែបានប្រណាំង ៣ ដំណាក់កាលប៉ុណ្ណោះ ដូច្នេះ វាពិបាកក្នុងការគិតពីជើងឯក តែយើងមានរថយន្តដ៏ខ្លាំង និងអាចទុកចិត្តបាន។ វាជាការប្រសើរណាស់ ដែលបានត្រឡប់មកទីតាំងនេះវិញ»។
យ៉ាងណា នេះជាការប្រណាំងដ៏មហន្តរាយ សម្រាប់កីឡាករ Verstappen របស់ក្រុម Red Bull ដែលជាម្ចាស់ជយលាភី កាលពី ២ សប្ដាហ៍កន្លងទៅនៅអារ៉ាប៊ី សាអ៊ូឌីត ដោយបានអែបរថយន្តទៅកៀនផ្លូវ នៅជុំទី៣៩ ពេលឈរនៅលេខរៀងទី២ ខណៈពេលនោះរូបគេនិយាយតាមវិទ្យុទាក់ទងថា៖ «ខ្ញុំមានធុំក្លិនអ្វីប្លែកៗ»។
Verstappen បានលោតចេញពីរថយន្ត ស្របពេលមានផ្សែងហុយចេញពីម៉ាស៊ីន ហើយរូបគេបានរត់ទៅយកបំពង់ពន្លត់អគ្គិភ័យ ខណៈដែលនេះ គឺជាការប្រណាំងអត់ចប់ចុងចប់ដើមរបស់រូបគេជាលើកទី២ ក្នុងចំណោមការប្រណាំងដំបូង ៣ ដង នារដូវកាលនេះ។
ក្រោយបញ្ចប់ ៣ ដំណាក់កាល Leclerc នាំមុខគេ ក្នុងតារាងពិន្ទុសរុបដោយមាន ៧១ ពិន្ទុ ខណៈអ្នកលេខ ២ Russell មាន ៣៧ ពិន្ទុ។ Hamilton នៅលេខ ៥ មាន ២៨ ពិន្ទុ ហើយ Verstappen នៅលេខ ៦ មាន ២៥ ពិន្ទុ៕ AFP/VN
