ក្រុងក្លាស៍ស្គូវ: លោក Kenny Dalglish បានលើកឡើងថា ការវិលត្រឡប់មកវិញរបស់កីឡាករស៊ុតបញ្ចូលទីបានច្រើនជាងគេ Kyogo Furuhashi នឹងផ្តល់ឱ្យក្រុម Celtic នូវកម្លាំងជំរុញបន្ថែមមួយកម្រិតទៀត នៅមុនការប្រកួតវគ្គពាក់កណ្តាលផ្តាច់ព្រ័ត្រ ក្នុងកម្មវិធី Scottish Cup ជាមួយនឹងក្រុមគូប្រជែងដ៏ស្រួចស្រាល់ Glasgow Rangers។
ក្រុម Celtic ធ្វើដំណើរឆ្ពោះមកកាន់ការប្រកួត នៅកីឡដ្ឋាន Hampden Park នាចុងសប្តាហ៍នេះ ជាមួយនឹងកម្លាំងចិត្ត ក្នុងជ័យជម្នះ ២-១ កាលពីពេលថ្មីៗនេះ នៅឯទឹកដី Ibrox របស់ក្រុម Rangers ដែលបានឃើញថា ពួកគេនាំមុខដាច់ ៦ ពិន្ទុ នៅទីកំពូលតារាងពិន្ទុនៃក្របខ័ណ្ឌ Scottish Premiership។
លោក Dalglish ដែលជាអតីតកីឡាករឆ្នើមរបស់ក្រុម Celtic និងក្រុមជម្រើសជាតិស្កុតឡេន មានអារម្មណ៍ថា ការវិលត្រឡប់មកវិញ ក្រោយជាសះស្បើយពីរបួសរបស់កីឡាករម្ចាស់គ្រាប់បាល់ចំនួន ១៦ គ្រាប់សញ្ជាតិជប៉ុន Kyogo (Furuhashi) ដែលបានបង្ហាញខ្លួនជាលើកដំបូង ក្នុងឆ្នាំ ២០២២ ក្នុងនាមជាកីឡាករបម្រុង ក្នុងជ័យជម្នះ ៧-០ កាលពីថ្ងៃសៅរ៍ លើក្រុម St Johnstone នោះ នឹងផ្តល់ឱ្យក្រុមនូវការមានប្រៀបបន្ថែមទៀត។
«ទោះបីជាកីឡាករ Kyogo មិនបានចាប់ផ្ដើមលេងជម្រើសដំបូងក៏ដោយ ក៏រូបគេគឺជាកីឡាករបម្រុងពេញដោយបទពិសោធម្នាក់ ក្នុងការមកបង្កើតឱកាសឱ្យក្រុម»។ នេះជាប្រសាសន៍របស់លោក Dalglish វ័យ ៧១ ឆ្នាំ ដែលបានក្លាយជាបុគ្គលដ៏សំខាន់ម្នាក់ ក្នុងយុគសម័យដ៏ជោគជ័យបំផុតរបស់ក្រុម Liverpool បន្ទាប់ពីគាត់ផ្ទេរទៅកាន់ទឹកដី Anfield ក្នុងឆ្នាំ ១៩៧៧។
លោក Dalglish បានបន្តថា៖ «ប្រសិនបើក្រុម Celtic ភ្លាត់តាមពីក្រោយ ហើយបន្ទាប់មក រូបគេគឺជាអ្នកចូលមកបង្កើតឱកាសសម្រាប់ក្រុម នោះអ្វីៗ នឹងប្រសើរឡើង។ ប្រសិនបើក្រុម Rangers ឃើញរូបគេដូរអាវ ហើយត្រៀមខ្លួនដើរចូលទីលាន នៅ ២០ នាទី ឬ ៣០ នាទីចុងក្រោយនោះ អ្នកនឹងមិនមានអារម្មណ៍ស្រណុកសុខស្រួលប៉ុន្មានទេ មែនទេ?»។
«Furuhashi មានភាពអស្ចារ្យ តាំងពីដើមរដូវកាលមកម្ល៉េះ ហើយសូម្បីតែ នៅក្នុងការប្រកួតលើកដំបូង ដែលក្រុម Rangers ឈ្នះរូបគេបានបញ្ជូនបាល់ដ៏ស្អាតឱ្យកីឡាករ Allan McGregor ដើម្បីធ្វើការស៊ុត តែត្រូវបានរារាំងជានិច្ច។ ចលនា និងល្បឿនរបស់គេ គឺល្អណាស់»។ លោក Dalglish បានបន្ថែម។
លោក Dalglish បានបញ្ជាក់ដោយជំហររឹងមាំថា បើទោះបីជាលទ្ធផលនៃការប្រកួតនាថ្ងៃអាទិត្យយ៉ាងណាក៏ដោយ ក៏វានឹងមិនមានផលប៉ះពាល់ដល់ការប្រជែងជើងឯកនោះទេ ដោយសារតែក្រុម Celtic មានគម្លាតនាំមុខ ៦ ពិន្ទុ លើក្រុមលេខ ២ Rangers ជាមួយនឹងការនៅសល់ ៥ ហ្គេមទៀត៕ AFP/VN