ក្រុងម៉ាឌ្រីដ: «វាមិនមែនពាក់ព័ន្ធនឹងដំបូន្មាននោះទេ។ វាមានអ្វីបន្ថែមទៀត នៅពេលដែលគាត់និយាយ របៀបដែលគាត់និយាយពីភាពស្មោះត្រង់របស់គាត់។ នោះហើយជាអ្វី ដែលធ្វើឱ្យអ្នកអាចទាញនូវទម្រង់លេងដ៏ល្អអស្ចារ្យរបស់អ្នកចេញមកបាន»។ នេះជាសម្ដីរបស់កីឡាករ Thomas Lemar។
ខ្សែបម្រើ Lemar ដឹងច្បាស់ជាងនរណាទាំងអស់នូវឥទ្ធិពលរបស់លោក Diego Simeone។ បន្ទាប់ពីមកចូលរួមជាមួយក្រុម Atletico Madrid ជាមួយនឹងតម្លៃ ៦០ លានអឺរ៉ូ ($៦៥ លាន) ដោយការចេញពីក្រុម Monaco ក្នុងឆ្នាំ ២០១៨ កីឡាករសញ្ជាតិបារាំងរូបនេះ ជួបការលំបាកយ៉ាងខ្លាំង។ រូបគេស៊ុតបញ្ចូលទីបានចំនួន ៤ គ្រាប់ ក្នុង ២ រដូវកាលដំបូងរបស់គាត់ ហើយមនុស្សជាច្រើនបានសន្និដ្ឋានថា ក្រុម Atletico នឹងព្យាយាមបន្ថយការចំណាយរបស់ពួកគេរដូវក្តៅបន្ទាប់។
តែគ្រូបង្វឹកលោក Simeone បានមើលឃើញកីឡាកររូបនេះ ដែលត្រូវការជំនួយ មិនមែនជាការផ្លាស់ប្ដូរក្លិប។ គាត់បានប្តូរ Lemar ពីការលេងនៅស្លាបខាងឆ្វេង ទៅតំបន់កណ្តាល ហើយពួកគេចូលរួមការងារជាមួយគ្នា។ កាលពីរដូវកាលមុន Lemar គឺជាកីឡាករមិនធ្លាប់មាន ក្នុងចំណោមខ្សែ-បម្រើទាំង ៣ និងជាកីឡាករស្នូល ក្នុងការជួយឱ្យក្រុម Atletico ឈ្នះជើងឯកនៅក្របខ័ណ្ឌ La Liga។
«ខ្ញុំបានពិភាក្សាជាមួយគ្រូបង្វឹកឆ្នាំមុន ហើយយើងបាននិយាយគ្នាពីរបៀបថា តើត្រូវកែលម្អស្ថានភាពរបស់ខ្ញុំក្នុងក្រុមយ៉ាងដូចម្ដេច»។ កីឡាករ Lemar បាននិយាយក្នុងកិច្ចសម្ភាសន៍ផ្ដាច់មុខជាមួយ AFP។
«គាត់បានស្តាប់ គាត់បានរកឃើញតំណែង ១ ដែលសមនឹងចំណុចខ្លាំងរបស់ខ្ញុំ។ ខ្ញុំមានក្ដីសុខជាងមុន ហើយវាធ្វើឱ្យកាន់តែងាយស្រួល សម្រាប់ខ្ញុំក្នុងការសម្របតាមស្តាយល៍លេងរបស់ក្រុម Atletico។ ឥឡូវនេះ គោលបំណងរបស់ខ្ញុំ គឺតបស្នងចំពោះគាត់ នូវលទ្ធផលល្អៗឱ្យបានច្រើនតាមដែលអាចលើទីលាន។
នៅពេលដែលកីឡាករ Lemar ធ្វើដំណើរមកពីក្រុម Monaco រូបគេ ជាខ្សែបម្រើស្លាបអ្នកបង្កើតឱកាស និងជាអ្នកស៊ុតបាល់បញ្ចូលទី ដែលជាម្នាក់ក្នុងចំណោមខ្សែប្រយុទ្ធវ័យក្មេងដ៏គួរឱ្យខ្លាចរអាបំផុតរបស់ពិភពលោក រហូតដល់ទាក់ទាញចំណាប់អារម្មណ៍ពីក្រុមហង្សក្រហម Liverpool និងកាំភ្លើងធំ Arsenal។
តែនៅពេលដែលតំណែងនោះ មិនអាចយកមកប្រើនៅក្រុម Atletico កីឡាករ Lemar ត្រូវតែព្យាយាមកែប្រែផ្លាស់ប្ដូរ ដោយរូបគេបានប្រាប់ថា៖ «ខ្ញុំបានខិតខំប្រឹងប្រែងយ៉ាងខ្លាំង ចំពោះចំណុចអវិជ្ជមានរបស់ខ្ញុំ និងបានកែប្រែវាឱ្យក្លាយទៅជាចំណុចវិជ្ជមាន ហើយខ្ញុំបានក្លាយជាកីឡាករបាល់ទាត់ ដែលល្អជាងមុន និងដែលមានភាពបត់បែនបានប្រសើរជាងមុន»។
កីឡាករវ័យ ២៦ ឆ្នាំ បានលេងឱ្យក្រុមជម្រើសជាតិបារាំង ក្នុងព្រឹត្តិការណ៍ប្រកួតប្រជែងជើងឯកអឺរ៉ុប និងប្ដេជ្ញាចិត្តធ្វើយ៉ាងណាឱ្យមានឈ្មោះក្នុងក្រុមមាន់គក សម្រាប់ព្រឹត្តិការណ៍ World Cup ឆ្នាំនេះ ដោយរូបគេបាននិយាយថា៖ «វាជាគោលបំណងដ៏ធំរបស់ខ្ញុំ។ ខ្ញុំត្រូវតែបង្ហាញនូវអ្វី ដែលជាតម្លៃរបស់ខ្ញុំ»។
ក្រុម Atletico បានប្រកួតចាញ់ក្រុមមេឃខៀវ Manchester City ក្នុងលទ្ធផលប្រកៀកប្រកិត ១-០ កាលពីសប្តាហ៍មុន ក្នុងការប្រកួតជើងទី១ នៅក្របខ័ណ្ឌ Champions League វគ្គ ១/៤ ផ្តាច់ព្រ័ត្រ តែបើគិតលើស្ថិតិ ពួកគេកំពុងមានបញ្ហា ខណៈកីឡាករ Lemar បានចូលលេងត្រឹមតែប្រមាណជា ៨-៩ នាទីចុងក្រោយប៉ុណ្ណោះ។
ក្រុម Man City បានធ្វើការស៊ុតដល់ទៅ ១៥ លើក ខណៈដែលក្រុម Atletico គ្មានសូម្បី ១ ដង ហើយក្រោយចប់ការប្រកួត គ្រូបង្វឹករបស់ក្រុមមេឃខៀវលោក Pep Guardiola បានលើកឡើងថា៖ «កាលពីសម័យបុរេប្រវត្តិនៅថ្ងៃនេះ និងក្នុងរយៈពេលរាប់រយពាន់ឆ្នាំមុន ការវាយសម្រុកចំពោះប្រព័ន្ធលេងរបស់ក្រុមមួយក្នុងទម្រង់ ៥-៥-០ គឺពិបាកខ្លាំងណាស់»។
កីឡាករ Lemar ត្រូវបានសួរថា អ្វីដែលគេនឹងនិយាយចំពោះការរិះគន់មកលើលោក Simeone រូបគេបានឆ្លើយថា៖ «ខ្ញុំគ្មានអ្វីត្រូវនិយាយចំពោះបញ្ហានេះនោះឡើយ ក្រៅតែពីក្រឡេកមើលលទ្ធផល អស់រយៈពេលជាច្រើនឆ្នាំមក។ ចូរក្រឡេកមើលលទ្ធផលនានា ចាប់តាំងពីលោកគ្រូបង្វឹករូបនេះ បានមកដល់ក្លិប Atletico Madrid»។
«វាប្រហែលជាមិនសូវជាល្អមើលប៉ុន្មានឡើយ តែវាទទួលបានផល។ ក្រុម Atletico ឈ្នះដែលនោះហើយ គឺជារឿងដ៏សំខាន់បំផុត»។ នេះជាការបន្ថែមរបស់ Lemar ពាក់ព័ន្ធនឹងការរៀបប្រព័ន្ធលេងបែបការពាររបស់លោក Simeone៕ AFP/VN