ក្រុងហ្ស៊ូរិច៖ អតីតប្រធានសហព័ន្ធបាល់ទាត់ពិភពលោក (FIFA) លោក Sepp Blatter និងអតីតប្រធានសហព័ន្ធបាល់ទាត់អឺរ៉ុប (UEFA) លោក Michel Platini នឹងឡើងសវនាការ នៅខែមិថុនា ដើម្បីប្រឈមជាមួយនឹងការចោទប្រកាន់ពីបទពុករលួយនៅប្រទេសស្វីស ពាក់ព័ន្ធនឹងការបង់ប្រាក់ចំនួន $២ លាន ដែលស្ថាប័នគ្រប់គ្រងកីឡាបាល់ទាត់អន្តរជាតិ បានប្រគល់ឱ្យលោក Platini។ នេះបើតាមការប្រកាសឱ្យដឹងពីតុលាការ កាលពីថ្ងៃអង្គារ។
ទាំងលោក Blatter និង លោក Platini សុទ្ធតែបានច្រានចោលដដែលៗ នូវការប្រព្រឹត្តខុស កាលពីមុន ជុំវិញការផ្ទេរប្រាក់ ដែលរដ្ឋអាជ្ញាស្វីស បានធ្វើការចោទមកលើពួកគាត់ទាំង ២ នាក់ កាលពីខែវិច្ឆិកា កន្លងទៅ។
រដ្ឋអាជ្ញា ចោទប្រកាន់ថា លោក Blatter ក្នុងឆ្នាំ ២០១១ បានរៀបចំឱ្យមានការចំណាយប្រាក់បែបទុច្ចរិតឱ្យទៅ លោក Platini ដែលបានពាក់ស្លាកប្រធានក្រុមជម្រើសជាតិ ពេលបារាំងឈ្នះជើងឯកអឺរ៉ុបឆ្នាំ ១៩៨៤ សម្រាប់ការងារជាអ្នកផ្ដល់យោបល់។ លោក Blatter និង Platini បានប្រាប់ថា ការបង់ប្រាក់នោះ គឺជាបង់ប្រាក់ខែឱ្យតាមក្រោយ (ការបង់ប្រាក់ឱ្យតាមក្រោយ ពេលបញ្ចប់កិច្ចការហើយ)។
អ្នកទាំង ២ ត្រូវបានសង្ស័យពីការក្លែងបន្លំ និងការចោទប្រកាន់ផ្សេងៗទៀត ចំពេលកើតមាននូវអ្វី ដែលបានក្លាយជាផ្នែក នៃរឿងអាស្រូវពុករលួយដ៏ធំបំផុត ដែលធ្វើឱ្យ FIFA មានការរង្គោះរង្គើជាខ្លាំង ហើយលោក Blatter ដែលធ្វើជាប្រមុខដឹកនាំ ក្នុងស្ថាប័នគ្រប់គ្រងបាល់ទាត់អន្តរជាតិនេះ រយៈពេល ១៧ ឆ្នាំ បានលាលែង ក្នុងឆ្នាំ ២០១៥ ដោយបន្ទាប់មក លោក Platini ក៏ចុះចេញដែរ ក្នុងឆ្នាំ ២០១៦។ ពួកគាត់ត្រូវបានហាមឃាត់រយៈពេល ៦ ឆ្នាំ ក្នុងការពាក់ព័ន្ធនឹងសកម្មភាពបាល់ទាត់ ជុំវិញបទរំលោភបំពានច្បាប់ក្រមសីលធម៌។
ការកាត់ក្តី នៅចំពោះមុខតុលាការឧក្រិដ្ឋកម្មរបស់សហព័ន្ធស្វីស នឹងត្រូវចាប់ផ្តើមនៅថ្ងៃទី ៨ ខែមិថុនា និងមានបន្តរហូតដល់ថ្ងៃទី ២២ ខែមិថុនា។ នេះបើតាមការឱ្យដឹងពីតុលាការ តាមរយៈវេបសាយរបស់ខ្លួន។
ការិយាល័យមេធាវីរបស់លោក Blatter បានបដិសេធ ក្នុងការធ្វើការអត្ថាធិប្បាយ។ ក្នុងរយៈពេល នៃការចោទប្រកាន់នេះ លោក Blatter បានប្រាប់ថា៖ «ខ្ញុំទន្ទឹងរង់ចាំ សម្រាប់ការម្រេចក្តីនៅចំពោះមុខតុលាការឧក្រិដ្ឋកម្មសហព័ន្ធ ដោយសុទិដ្ឋិនិយម ហើយខ្ញុំសង្ឃឹមថា រឿងនេះ នឹងឈានដល់ទីបញ្ចប់ ចំណែកការពិតទាំងអស់ នឹងត្រូវបានដោះស្រាយយ៉ាងត្រឹមត្រូវយុត្តិធម៌»។
មេធាវីសញ្ជាតិស្វីសរបស់ លោក Platini មិនអាចទាក់ទងភ្លាមៗបានឡើយ ដើម្បីសុំការធ្វើអត្ថាធិប្បាយ។ កាលពីពេលកន្លងមកមេធាវីរូបនោះ បាននិយាយថា កូនក្តីលោក គ្មានកំហុសទេ ហើយករណីនេះគួរតែត្រូវបានទម្លាក់ចោលជាយូរមកហើយ៕ AFP/VN