.jpg)
Spence (ស្ដាំ) ដាល់ទៅលើដងខ្លួនរបស់ Ugas អំឡុងការប្រកួតដណ្ដើមខ្សែក្រវាត់ កាលពីថ្ងៃសៅរ៍។ AFP
ក្រុងឡូសអេនជឺលេស: អ្នកប្រដាល់ Errol Spence បានវាយសន្ធាប់លើគូបដិបក្ខ Yordenis Ugas ក្នុងដំណើរផ្លូវនៃការតទល់គ្នា រហូតដល់បានឈ្នះ ក្នុងទឹកទី១០ ដោយលក្ខណៈបច្ចេកទេស កាលពីថ្ងៃសៅរ៍ ដើម្បីបញ្ចូលខ្សែក្រវាត់សមាគមប្រដាល់ពិភពលោក (WBA) របស់កីឡាកសញ្ជាតិគុយបា បន្ថែមពីលើខ្សែក្រវាត់ក្រុមប្រឹក្សាប្រដាល់ពិភពលោក (WBC) និងខ្សែក្រវាត់របស់សហព័ន្ធប្រដាល់អន្តរជាតិ (IBF) របស់ខ្លួន។
Spence ដែលឡើងសង្វៀនប្រកួត នៅចំពោះមុខអ្នកគាំទ្រ នាប្រទេសកំណើតរបស់ខ្លួន នៅឯកីឡដ្ឋាន AT&T របស់ក្រុម Dallas Cowboys (ក្រុមបាល់ទាត់បែបអាមេរិក) ក្នុងរដ្ឋតិចសាស់ នៅមិនទាន់ស្គាល់ពាក្យថា ចាញ់នោះឡើយ ដោយបង្កើនកំណត់ត្រាយ៉ាងល្អឥតខ្ចោះ ជាមួយនឹងការឈ្នះទាំង ២៨ ដង ក្នុងនោះវាយឱ្យគូប្រកួតសន្លប់ ២២ ដង នៅពេលដែលអាជ្ញាកណ្តាល លោក Laurence Cole បានប្រកាសបញ្ឈប់ការប្រកួត នៅនាទីទី ១:៤៤ ក្នុងទឹកទី១០ តាមការណែនាំរបស់គ្រូពេទ្យប្រចាំសង្វៀន។
ដោយនៅពេលនោះ ភ្នែកស្តាំរបស់កីឡាករ Ugas បានហើមប៉ោងកាន់តែខ្លាំងឡើងៗ បន្ទាប់ពីរងនូវការវាយចំៗពី Spence ដែលបានចាប់ផ្ដើមវាយសម្រុកលើអ្នកប្រដាល់គុយបាមិនដកដៃ ក្នុងទឹកទី៧ ហើយបន្តវាយសន្ធាប់ទៀត រហូតដល់សព្វយ៉ាងត្រូវចប់។
នេះជាការប្រកួតលើកទី១ របស់ Spence គិតចាប់តាំងពីមានរបួសភ្នែក ក្នុងអំឡុងពេលហ្វឹកហាត់ ដែលបង្ខំឱ្យរូបគេដកខ្លួនពីជំនួបជាមួយអតីតកីឡាករ Manny Pacquiao កាលពីខែសីហា កន្លងទៅ ខណៈដែលកីឡាករ Ugas ក៏ឈានជើងឡើងសង្វៀនជំនួសក្នុងជំនួបនោះ នៅនាទីចុងក្រោយ ហើយបានជូនដំណើរការចូលនិវត្តន៍របស់ស៊ុបភើរស្តារសញ្ជាតិហ្វីលីពីន ជាមួយនឹងជ័យជម្នះដោយ ការទទួលបានពិន្ទុជាឯកច្ឆន្ទ។
តែយ៉ាងណា កីឡាករវ័យ ៣៥ ឆ្នាំរូបនេះ មិនអាចតបតចំពោះការវាយសន្ធាប់ឆ្វេងស្ដាំយ៉ាងពេញកម្លាំងរបស់កីឡាករ Spence ឡើយ បើទោះបីជារូបគេបានធ្វើឱ្យកីឡាករអាមេរិកវង្វេងវង្វាន់ ក្នុងទឹកទី៦ ដោយការវាយឱ្យគូបដិបក្ខមានជំហរទ្រេតទ្រោត បន្ទាប់ពីបានម៉ាត់ រហូតដល់ប្រដាប់ការពារធ្មេញរបស់ Spence របូតចេញពីមាត់។
ជាមួយគ្នានេះ ពាក់ព័ន្ធនឹងការត្រូវបានគូប្រកួតវាយរហូតដល់របូតប្រដាប់ការពារធ្មេញនោះ កីឡាករ Spence បានប្រាប់ថា រូបគេមានការភាន់ច្រឡំដោយខ្លួនឯង ទើបធ្វើឱ្យមិនបានការពារខ្លួនឱ្យបានល្អ ដោយអ្នកប្រដាល់វ័យ ៣២ ឆ្នាំ បាននិយាយប្រាប់ថា៖ «ខ្ញុំគិតថា នៅពេលនោះ លោកអាជ្ញាកណ្ដាល បានប្រាប់ឱ្យឈប់។ នោះជាកំហុសរបស់ខ្ញុំ»។
វាអាចនឹងត្រូវបានកាត់ក្ដី ដោយច្បាប់ការវាយឱ្យដៃគូដួល ពោលគឺត្រូវបានរាប់ តែកីឡាករ Spence ដែលមិនត្រូវបានដាល់ រហូតដល់ដួលទៅលើកម្រាលម្ដងណានោះ បានអះអាងថា រូបគេមានជំហររឹងមាំនៅឡើយ។
លើសពីនេះទៀត Spence បាននាំមុខសម្រាប់ការផ្ដល់ពិន្ទុពីចៅក្រមទាំង ៣ នៅពេលការប្រកួតត្រូវបានបញ្ឈប់ ខណៈនេះជាការចាញ់ជាលើកទី៥ របស់ Ugas ក្នុងចំណោមការឡើងសង្វៀនទាំង ៣២ លើក ដែលរូបគេធ្លាប់ឈ្នះបាន ២៧ ដង ជាមួយនឹងការវាយឱ្យដៃគូសន្លប់ ១២ ដង។
នេះនឹងជាការវិលត្រឡប់មកវិញជាលើកទី២ របស់កីឡាករ Spence បន្ទាប់ពីមានរបួសយ៉ាងធ្ងន់ធ្ងរ ដោយលើកដំបូង នៅពេលដែលរូបគេនៅក្រៅសង្វៀនអស់រយៈពេលរាប់ខែ ក្រោយមានគ្រោះថ្នាក់ចរាចរណ៍ដោយរថយន្ត ក្នុងខែតុលា ឆ្នាំ ២០១៩៕ AFP/VN
